Mizo National Front
General Headquarters
Aizawl : Mizoram
Press Release
KUMIN 2023 INTHLAN HI MNF SORKAR HUN A LA NI – Prof.F.Lalnunmawia, MLA, Adviser MNF
Vawiin June ni 9, 2023 (Zirtawpni) chawhnu hian Aibawk MNF Unit buatsaih mithar lawmluhna hun hman a ni a, bialtu MLA leh MNF Adviser Prof.F.Lalnunmawia’n a hman pui.
Lawmluh inkhawmah hian Prof.F.Lalnunmawia MLA chuan thu sawiin, “Mizoram state kan nih hnua inthlanah kum sangbi tawpa number 8 a awmin sorkar a inthlak thin a, number 3 a awmin a ngai an tlingnawn leh ṭhin a, Kum 10 danah sorkarna a inthlak thin” a ti.
MNF Adviser chuan, “Kum 1989 inthlanah Congress an sorkar a, Kum 1993 inthlanah an tlingnawn leh a ni. Kum 1998 inthlanah sorkar a inthlak a, MNF-in sorkarna changin kum 2003 inthlanah sorkarna a chang nawn a. Kum 2008 inthlanah sorkar a inthlak a, Congress an sawrkar ve leh thung a, kum 2013-ah an tlingnawn zui. Tichuan, kum 2018-ah sorkar a inthlak a, MNF kan sorkar veleh thung. ‘History repeats itself’ an tih angin kan ram politics hun tawng pangngai angin kumin 2023 inthlan lo awm tur hi MNF sorkar chhunzawm hun a ni. Heng inthlan lo awm tawhah te hian party dang (ZNP, UDA, ZPM) sorkar ve beiseina boruak leh thawm a lian viau thin a; mahse, an sorkar zo leh thin lo a ni” a ti bawk.
“Mi thenkhatten kan sorkar lo ding tawh hnuaiah Mizoram hi hmasawn lo hle angin an sawi mek; thu dik tak erawh chu kum 20 kal ta leh vawiina Mizoram dinhmun chu inthlau tak a ni. Saptawng a ‘Rome was not built in a day’ an lo tih angin hmasawnna hi thawk leh khata thleng nghal vek thei a ni lo a, kum tam tak chhunga a tahtawla thleng thin a ni. India ram state zinga naupang ber pawl Mizoram, state kan hmuhna kum 37 vel leh kan thenawm State, kum 50-70 kal ta a state lo ni tawhte nena inkhaikhin ngawt chi a ni lo. Chutih rualin India ram state hmasawn ber zing ami kan ni hi a lawmawm hle zawk a ni,” a ti bawk.
He lawmluh inkhawm hi Pu Vanlalpara, President MNF Unit-in a kaihruai a, Prof.F.Lalnunmawia MLA MNF Adviser hian MNF zawm thar voters 66 a lawm lut a ni.
Sd/-
(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/734
Dt.09.06.2023