KUM THAR ATAN MIZO HNAM RUN HAWNNA HUN HMAN A NI

KUM THAR ATAN MIZO HNAM RUN HAWNNA HUN HMAN A NI

Mizo National Front
General Headquarters
Mizoram : Aizawl

Press Release

KUM THAR ATAN MIZO HNAM RUN HAWNNA HUN HMAN A NI

Vawiin January ni 15, 2024 (Thawhṭanni) hian Mizo Hnam Run hawnna hun hman a ni a. He hunah hian President Pu Zoramthanga chuan thusawiin, “MNF lungphum chu Pathian leh kan ram tan, tih a ni a. He thuthlungin a man a pek tawh hi a tam em em a. Khawkhawm, hmeithai, fahrah leh martar thisen tam tak a luang a ni. Party tam tak a lo dinchhuak tawh a, an ral leh ṭhin a, MNF erawh chu kum 63 chhung Pathianin a hruai tawh a. Kum 63 chuang Pathian leh kan ram tana kal tawh kan nih kha, inthlan vawi khat vang maiin kan nghing tur a ni lo,” tiin MNF mipuite a chah a ni.

MNF President chuan, “Uniform Civil Code chungchangah te, ramri thilah te Pathian leh kan ram tan nghet takin kan dinh ṭhin. Ramri chungchangah pawh Amit Shah, Home Minister ngeiin min rawn bia a, tawlh turin min rawn ti a. ‘Kan tawlh ai chuan ka ban a ngai ang’ tiin ka hrilh a. Min nawr zui ngam lo. Myanmar kan unaute raltlan pawh nawr let turin min ti a. Delhi-ah Prime Minister hnenah ngei, ‘kan unaute kan thawnlet thei lo,’ tiin ka hrilh a. Anmahni enkawl zuina turin sum ka dil zawk a ni. Sakhua leh hnam thilah NDA-in min thunun ngai lo a, Parliament House thlengin kan beiin kan auchhuak zawk a ni,” a ti a. “Sakhua leh hnam thil tak takah chuan hnam thuthlung fa leh fa lo chu kan hriat hle a ni,” a ti bawk.

MNF President chuan, “Kan ramah hian Party lian tak tak an lo awm tawh ṭhin a. Vung takin an vanglaiin awm ṭhin mahse, an tlachhe zel a. MNF Party erawh chu kum 63 chhung nghet takin ‘Pathian leh kan ram tan’ kan la dingnghet zel a ni. Tun dinhmunah pawh hian MNF hi Party ruhrel nei ṭha ber kan la ni a. Chu chu Pu Laldenga emaw, Pu Zoramthanga vang emaw ni lovin Pathian leh kan ram tan, kan tih tlat vang a ni,” a ti bawk.

Pu Zoramthanga chuan Party-a a nihna chungchang sawiin, “Pu Tawnluia nen kan sawi dun a, kum 80 chunglam ve ve kan lo ni tawh a, keini tel lovin kal tawh se kan ti a ni. Kan Party tan hian theih tawp kan chhuah zel dawn a, hotute pawh kan hrilh tawh a, hotuten remruatna an la rawn nei mai ang,” a ti a. MNF hruaitute ni lai term a tawp tawh thu sawiin, “Hotute hnenah keini chu min ngaihtuah tel tawh suh u, kan ti a ni,” a ti bawk.

He inkhawm hi Pu Tawnluia Sr Vice President-in a kaihruai a, Upa Denghmingthanga, Adviser-in hunserh a hmang a. MNF mipui kalkhawmte hian kum thar inhlan tharna leh ram tana ṭawngṭai rualna an nei bawk a ni.

Sd/-
(LALLENMAWIA JONGTE)
Secretary
Media & Publicity Deptt
Mizo National Front
Memo No. 05/2024
Dt.15.01.2024

Leave a Reply

Your email address will not be published. Required fields are marked *