Mizo National Front
General Headquarters
Mizoram : Aizawl

PRESS RELEASE

KUM 2023 MLA GENERAL ELECTION ATANA MNF OFFICIAL CANDIDATE-TE PUAN AN NI

Vawiin October ni 4, 2023 Nilai hian Vanapa Hall-ah MNF MLA General Election 2023, Official Candidate puanna leh Campaign Kick-Off neih a ni a, he hunah hian Pu Zoramthanga MNF President chuan thusawiin, hun rei tak kan nghah hnuin vawiinah candidate tha tak tak puanna hun kan nei a, party thenkhat chuan candidate an inchuh laiin kei ni chuan Pathian tanpuinain Candidate kan set fel thei hi lawmawm hle a ni, a ti a. Candidate kan set tha tak tak te hi mipuiten lo tawiawm theuh tur leh lo support theuh turin kan sawm che u a. Pathian leh mipui zarah sorkarna kan la ngei ang, a ti.

Pu Zoramthanga chuan, MNF chu a din tirh aṭangin rinawm takin a dinna ngaiah kum 60 chuang nghet taka ding tlat anih thu leh dinhmun sawh sawn ve mai mai ngailo party a nih thu a sawi a. Harsatna tam tak paltlanga Pathianin a lo hruai chhuah tawh MNF Party hi Mizoramin a tawh mek harsatna period aṭangin Pathianin min hruai chhuak dawn a, malsawmna period-ah, hunin a finfiah tawh MNF Party hi Pathian leh mipui zarah Mizoram hmasawnna nasa zawk thlentir turin Pathianin min sorkar tir leh ngei dawn a ni, a ti.

MNF President chuan, MNF opponent lian ber Congress chu an term a tawp thawkhat tawh tih sawiin, central leh state-ah an tlahniam hle a, inthlan dawt lehah an dinna tur bialah pawisa dah kham dawn ta ila, kan dah huai ngam lo khawp ang, a ti a; artelukawn thei dinhmunah an awm mek a ni, a ti bawk.

Pu Tawnluia, MNF Sr.Vice President pawhin inlawmna thusawiin, Mizo hnam party tana an hun hlu tak seng a, lo kal zawng zawngte zahna chibai kan buk cheu a. He hun kan thleng thei hi lawmawm a tih thu a sawi.

Mnf hi hnam party a ni a, Pu Denga hova din niin Kum 60 hmel pawh kan hmu a, kan changvawn “Thenkhatin tawlailirte an ring a, thenkhatin sakawr te an ring. Keini erawh chuan Lalpa kan Pathian hming chu kan lam zawk ang” (Sam 20:7) hi kan rin tlat avangin Pathianin min hruai zel a ni, a ti.

MNF Sr.Vice President chuan, Pu Zoramthanga hi kan ring tawk a, tute emaw sorkar tum ang mai maiin leader hrang hrang kan nei ve lo a. MNF sorkar hi kan sorkar chhung in hun harsa tak tak kan tawk a, hmalakna pawh kan theih ang tawk in a tha a ni, a ti a.

MNF hi Mizote luah chin ram, hnam leh sakhaw himna tura huaisen taka hmala thin a ni a, Mizo hnamin harsatna a tawh apianga sorkarna chang tura thlanawm ber party, dinna nghet tak nei a ni,’ a ti.

Pu Tawna chuan, MNF sorkar dinglaiin hmuh lawk loh harsatna tam tak tawk mahse; mipuite rawngbawl hna thawhna kawngah leh hmasawnna ruhrel din kawngah theihtawp a chhuah a, ei leh bar leh nitin khawsakna mamawh thil chi hrang hrangah harsatna lutuk tawk lovin, covid 19 hri leng leh ramria buaina avang a hun rei tak motor kawng dan pinte min pal tlangpui a, hun danga la thleng ngai lo, khawchhak tlangdunga lirnghing te, vawk pul hrileng te pawh min paltlangpui a.

Tin, Assam nena buaina chhuakah khan MNF sorkarin huaisen taka Mizoram chin humhalh tura dinna nghet tak a nei te leh, Myanmar, Bangladesh leh Manipur atanga kan unau harsatna tawk, himna zawnga Mizorama lo tlanlutte a lo tuamhlawm dan te, huaisen taka an thlavanga hauh dante chu rampum huap leh khawvel mithmuha Mizote min timawitu a ni a, hei hian MNF hi hnam party nihna dik tak tichiangtu a ni, ati bawk.

Pu Tawna chuan, Mizoramin harsatna a tawh apianga tawngtaisak thintu leh a tul a pianga pen chhuak thin Kohhran ho kan nei te, sorkar hmalakna nghet taka thlawp tlat thin NGO leh zirlai pawl kan neite hi kan vannei hle a ni, a ti bawk.

He hunah hian MNF thalai ten Ram leh hnam tana MNF pawimawhna hrang hrang Essay inziah siak leh Reels Contest an buatsaih lawmman semna hun hman a ni bawk. Essay inziah siakah hian lawmman 1-na dawngtu chu Laltremruati, Ramhlun South. Govt.Aizawl West College a zirlai niin, lawmman 2-na dawngtu Lalruatpuia, Republic veng, 1st Semester B.Ed.,IASE niin, lawmman 3-na dawngtu F.Vanlalduhsaka B.Sc(Phy), 5th Semester, PUC leh Consolation Prize hi mi 10 hnenah pek an ni a, Reels Contest-ah lawmman 1-na dawngtu chu Lalhmingthanga Renthlei, Sihphir, 2-na Zomuanpuia Armed veng leh 3-na JS Tharmawii Ramthar veng bakah Consolation prize hi mi 10 hnenah pek a ni bawk.

He hun hi Pu Vanlalzawma Vice President chuan kaihruaiin, Rev.Dr. Vanlalbela’n hunserh a hmang a, lawm thusawiina hun Pu K. Vanlalauva Treasurer-in a nei bawk. Chawhnu lamah MNYF in programme hlimawm tak an hmang zui bawk a ni.

Sd/-

(LALTHAKIMA)
Jt. Secretary
Media & Publicity Department
Mizo National Front
Memo No. MNF/Media/04/2023/867
Dt. 04.10.2023