Mizo National Front
General Headquarters
Mizoram : Aizawl
Press Release
CENTRAL SORKAR BJP KAIHRUAI LAKA HAMTHATNA AWM THEI CHAN HUAMA KAN RAM HRUAITUTEN BILL AN PASS HI LAWMAWM KAN TI- MNF
Mizoram Legislative Assembly chuan Parliament-in a pawm tak ‘Forest Conservation (Amendment) Act, 2023’ tha lo a ti a, dodalna Resolution putluh a pawm leh Bill putluh pariat (8) pawm a ni zui hi MNF chuan lawmawm a ti hle.
Mizo National Front chuan Mizoram Legislative Assembly pariatna thutkhawm vawi 12-na August ni 22 leh 23, 2023 a neihah kan ram tana him lo, sorkar laipuiin Parliament-a a pawm tak ‘Forest Conservation (Amendment) Act, 2023’ dodalna Resolution a pawm (pass) hi Mizo mipui tan thu lawmawm tak a ni. Nimin August ni 22, 2023 khan EF& CC Department Minister Pu TJ Lalnuntluanga’n tun hnaia Parliament In hnihin a pawm tak ‘Forest Conservation (Amendment) Act, 2023’ duh lohna Official Resolution a pu lut a, member-ten lungrual takin he resolution, “That this House unanimously resolves to oppose The Forest Conservation Amendment Act, 2023 in order to protect the rights and interest of the people of Mizoram” hi an pawmpui a ni. Hei hian kan ram tana him lo leh thalo do kawngah central sorkar BJP kaihruai laka hamthatna awm thei pawh chan huamin ram hruaituten ke an pen ngam tih a tilang chiang hleah MNF chuan kan ngai. Hmalam hunah pawh Mizoram tana tha lo do kawngah theihtawp chhuaha tangrual turin Mizo mipui MNF chuan a ngen a ni.
Ni hnih chhung awh thutkhawm neih chhung hian kan Minister-ten an chanpual theuhah, ram leh mipui tan, a tha zawnga dan tihdanglam leh siamrem kawngah ngaihtuahna an seng nasa hle tih a hriat a. Dan siam tura thlanchhuah an ni tih a taka an lantir hi entawn tlak kan ti a. Bill putluh pariat (8) zet a awm leh pawm a ni zui hi lawmawm kan ti a, heng bill pawm takte hian Mizo mipui tan leh kan ram tan rahtha zawk a chhuah ngei ang tih MNF chuan a beisei tlat a ni.
Nimin khan Taxation Minister Pu Lalchamliana bill putluh, ‘The Mizoram Goods and Services Tax (Amendment) Bill, 2023’; Labour Minister Pu Lalchhandama Ralte putluh ‘The Mizoram Shops & Establishment (Regulation of Employment and Conditions of Service) (Amendment) Bill, 2023; Law Minister Pu TJ Lalnuntluanga putluh, ‘The Mizoram Compulsory Registration of Marriages (Amendment) Bill, 2023’ te sawiho a nih hnuin pawm (passed) vek a ni a.
Vawiin khan Chief Minister bill putluh ‘The Mizoram Appropriation (Regularization of Excess Expenditure) Bill, 2023 chu pass a ni bawk a. Deputy Chief Minister Pu Tawnluia’n ‘The Mizoram (Protection of Rivers) Bill, 2023’, ‘ The Mizoram Ground Water (Control and Regulation) Bill, 2023’ leh ‘The Mizoram Municipalities (Amendment) Bill, 2023’ a pulut bawk a, sawiho a nih hnuin Speaker-in vote a la a, pawm a ni. Art & Culture Department Minister Pu R.Lalzirliana’n “The Mizoram Ancient Monuments and Archeological Sites and Remains (Amendment) Bill, 2023” a pulut a, hei hi sawiho anih hnuah pawm a ni bawk.
Sd/-
(B.LALHMANGAIHZUALA)
Joint Secretary
Media & Publicity Deptt
Mizo National Front
Memo No.MNF/Media/04/2023/825
Dt.23.08.2023