KAN RAM DINCHHUAHNA TUR CHUAN ECONOMIC NATIONALISM NGAIH PAWIMAWH….

Mizo National Front
General Headquarters
Mizoram : Aizawl

Press Release

KAN RAM DINCHHUAHNA TUR CHUAN ECONOMIC NATIONALISM NGAIH PAWIMAWH HMASAK BER A TUL -K.Vanlalvena, MP, Rajya Sabha

Vawiin June ni 14, 2024 (Zirtawpni) hian Mizo Hnam Run chhung inkhawm neih a ni a. Hun hnihna political session-ah Rajya Sabha MP Pu K. Vanlalvena leh Pu R.Lalhnuna Political Affairs Committee (PAC) MNF.Gen.Hqrs. te chuan thu an sawi.

Pu K.Vanlalvena MP (RS) chuan kan ram dinchhuahna tur chuan Economic Nationalism ngaih pawimawh hmasak ber a tul thu a sawi a. Nationalism nei lo hnam an dinchhuak ngailo a, maruari ho pawh vai sumdawng hausa hming emaw kan ti hial tawh a, hnam hming tih hre lo tam tak kan awm tawh. India ramah sumdawn an thiamin an hausa em em a, UT leh State erawh an nei lo a, Nationalism an neih loh vang a ni, a ti.

Pu K.Vanlalvena chuan, “Hnam ding chhuak tawh sa pawh nationalism an neih loh chuan an buai zel a. Mizote hi political nationalism-ah chuan kan thangharh tawh hle a. Assam, Manipur leh Burma lamah buaina neuh neuh kan tawh changin kan tangrual tha a, economic nationalism-ah erawh kan mit a la keu lo hle a ni. Religious nationalism vawng nung zelin economic nationalism hi kan ngai pawimawh ber tur a ni. Tangka a hausa ringawt hi hausa an ni lo, sorkar hnathawk hlawh pung thur thurin kan per capita income sang hle mahse; vai ram atanga ei tur kan chawkluh theih loh chuan kan nghei a ni mai,” a ti.

“Khawvela ram lian apiang economic nationalism-ah an chiang a. Dawr tinah artui an zuar a, vai artui vek a ni. Bawng lah khawchhak lama kan chawkluh hlir a ni a. Kan ramah buh, vaimim leh bekang, an chaw tur pawh a tha duh em em a, economic nationalism-ah hian i harh thar mawlh ang u,” a ti bawk.

Pu R.Lalhnuna PAC, MNF General Headquarters pawhin, MNF chu an inenfiah ang a, reiloteah an sorkar leh mai tur thu te, ZPM chu an sorkar hun chhung reiloteah an insawi anga an awm loh dan te, sum inrenchem tlangaupui reng khan Adiver to Chief Minister leh OSD-ah an ruat dan chungchangah sum an inrenchem lohziate sawiin, an sorkar hi an kal rei a rin loh thu a sawi.

ZPM sorkar chu a la thar lam a, mipui an la ngawi rih mai mai a, tunah an tih dikloh tam tak a awm hman tawh a, mipui hi ngawi rengin an na veng veng a. Zoram hian hma a sawn a, a dinchhuah theihna tur chuan MNF a sorkar leh ngei a ngai a ni a ti.

He hun hi Pu BC. Lalbiakngura President, Mizo National Senior Front (MNSF) Hqrs. chuan kaihruaiin, Pi R. Zathangi Adviser, Mizo National Women front (MNWF) Hqrs. chuan hunserh a hmang.

Sd/-
(R.LALHMANGAIHA)
Secretary
Media & Publicity Deptt
Mizo National Front
Memo.No.106/2024
Dt. 14.06.2024.

Leave a Reply

Your email address will not be published. Required fields are marked *