Mizo National Front
General Headquarters
Mizoram : Aizawl

Press Release

KAN CHAK LOHNA KAN PAWM A, INSIAMṬHAT NAN KAN HMANG ANG: LALRUATKIMA

Lunglei Municipal Council inthlan result puan a nih hnuah vawiin khan Lunglei Mizo Hnam Runah chhung inkhawm neih a ni a. He hunah hian Pu Lalruatkima, MNF Adviser chuan thusawiin, “MNF chuan kan chak lohna kan pawm a, insiam ṭhat nan kan hmang ang,” a ti a. “Chakna chang ta ZPM te kan lawmpui a ni,” a ti bawk.

Pu Lalruatkima chuan, “Kan inenletna tur hmahruai a ni, tih hi kan hotuten an hria a. ngaihtuahna an hmang dawn a ni,” a ti a. “Lunglei mipuiin duhthlanna thiang takin vote an thlak a. Result ṭha tak neitu ZPM-te MNF Party chuan kan lawmpui tak zet a, Lunglei hmasawnna atan theih tawp an chhuah ang, tih ka ring a. LMC member-te’n an mamawhte inthlahrung hauh lovin State sorkar-ah rawn thlen zel turin kan chah duh a ni,” a ti.

MNF Adviser chuan, “MNF sorkar chuan Lunglei hmasawnna atan ṭawngka mai ni lo, a tak ngeiin kan rawn thawk zel dawn a ni,” a ti a. “Campaign kharnaah khan ka sawi tawh a. Lunglei mipuite chungah thupha ka chawi nawn leh duh a. He sorkar hian kawng hrang hrangin Lunglei mipuite rilru kan tinain an duhkhawp kan tling lo tih kan hria a. Ngaihtuahna thar nen hma thar kan la dawn a ni,” a ti bawk.

“MNF party aiawha candidate zawng zawng te, inthlan buaipuitu official zawng zawngte leh Democracy a nih anga vote thlaktu mipui zawng zawngte chungah lawmthu ka sawi a. MNF tana ṭhahnem ngai taka thawktu unit, Block leh Sub Hqrs zawng zawng chungah lawmthu ka sawi tak meuh meuh a ni,” a ti bawk.

He inkhawmah hian Pu C Lalrinsanga Minister, Pu Lawmawma Tochhawng MLA leh Pu R Lalhnuna PAC member te’n thu an sawi bawk a ni.

Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/04/2023/647
Dt 3.4.2023