Mizo National Front
General Headquarters
Mizoram : Aizawl
Press Release
Vawiin March ni 27, 2023 Thawhtanni hian Mizo Hnam Runah chhung inkhawm neih a ni a, hun hnihna a thusawitu Pu C.Zahmuaka (Ex Parliamentary Secretary) Adviser, MNF General Headquarters ni bawk chuan thusawiin, Kum 2020 March thlaa Covid 19 Hripui len tirha Mizoram puma Inkharkhip khauh tak a awm tak avang khan hun awl, mahni in chhung lum ngeia lehkhabu a ziah, ‘Ka hringnun zin kawng (Zalenna Sualna ka tel vena)’ tih a ziah chu sawi zauna hun a hmang a ni.
Pu C.Zahmuaka chuan, he lehkhabu ah hian Mizo Hnam Movement a taka tawn hriat nei anih avangin he lehkhabu hi ziak lo thei lo anih thusawiin , Kum 1967, November thla tâwp lama Buarpui khuaa Parliament Joint Session Vawi 5-na neihna hmun tûr pana hmahruaia a kal dan chanchin ngaihnawm tak in asawi a, Parliament Secretary, Pu Lalchungnunga B.A. Keifang khua leh a kalpuite chu Chhingchhip bul Lunglei panna lamlian an kân laiin Vai sipaiin an kâp hlum ta hlauh mai a. Hetiang vânduaina hi a thlen tâk avângin Session-a kal Member pawh tlêm tê an nih tâk avâng leh, Speaker Vanhela ngei pawh a kal theih loh avângin Parliament Session neih pawh chu ni khat chauh ‘Parliament Joint Session koh leh thuai ni rawh se,’ tiin an tin darh tak thu asawi a.
Pu Hmuaka chuan, Hemi hnu hian Sihfa dai vêlah Parliament Files leh Document pawimawhte chu House of Representative(HR) Speaker, Pu Vanhela B.A. chuan ka kutah a dah avângin him tak leh fimkhur takin ka vawng thin a. Hetih hun lai hian, Speaker Vanhela chuan a nupui fanaute chu Sihfa khuaah a dah nghe nghe a ni, a ti. Kum 1967 kum chuan Sihfa khuaah Kristmas leh Kumthar chu chhûngte bulah lungmuang takin Office Staff, Tv.Hmaa nên chuan kan hmang thei ta zawk a ni, a ti.
Ramhnuai sipai chuan, Parliament Joint Session Lungpho thlama Kum 1967, July thlaa Sailukawt kawtchhuah lam ram hmun zawl nuam taka nei tura khawtual volunteer ten lian leh Sei tha tawk tak an lo zawh tawh chu Parliament Memberte leh House of Representative inkawp leh Office hnathawktu te chuan Joint Session nghakin an luah dan chanchin te a sawi bawk a ni.
Heng a sawi bakah hian he lehkhabu, ‘Ka hringnun Zing kawng (Zalenna Sualnaa ka tel venna)’ tih ah hian kim atakin a ziah thu leh thudik tak hre turin, mipui ten lei vek turin ka sawm bawk che u ani, a ti bawk.
Mizo Hnamrun chhung Inkhawm hi Pu BC Biakngura, General Secretary MNF Gen.Hqrs. in a kaihruai a, Pu KS.Thangmawia Jt. Secy.MNSF Hqrs chuan hunserh a hmang a. Pu M.S Dawngliana MNF Gen.Secy., hnen atangin LMC inthlanna tur, Lunglei zin Report ngaihnawm tak ngaihthlak a ni bawk.
Sd/-
(LALTHAKIMA)
Joint Secretary
Media & Publicity Dept.
Mizo National Front
Memo No. MNF/Media/04/2023/635
Dt. 27.03.2023