Tumah ring zo lo thalai kan in chhuah belh zel chua…J Sawma

Tumah ring zo lo thalai kan in chhuah belh zel chua…J Sawma

Mizo National Front
General Headquarters
Mizoram : Aizawl

Press Release

‘Tumah ring zo lo thalai kan in chhuah belh zel chuan Zonun zemawi leh mipui rorelnain a tuar ang tih a hlauhawm’ – J Malsawmzuala Vanchhawng.

Ni 2 chhung awh Vantawng Group YMA Inkhawmpui vawi 25-na, Thenzawl Police Training Centre-a neihah nimin lamah Rorel inkhawm neih a nih hnuin, vawiin khan Vantlang Inkhawm neih anih bakah, YMA Branch hrang hrang ten Lengkhawm zai leh Mizo hnam lam hmangin intihsiakna an nei a. He hun hmanpuitu Pu J Malsawmzuala Vanchhawng, Mizoram State Commission for Child Rights Member chuan naupangte enkawl kawngah tanlak nasat a tul thu sawiin, Chhungkuaa seilen chu naupang zawng zawngte chanvo bulthum a ni a ti a, Naupang tanpui ngaite enkawlna hmun, CCI/Home-ah te dahluh ngai an awm lohna turin, nu leh pa, pi leh pu, leh an laina hnaiten Zo nun ze mawiin a ken tel, naupangte enkawl puitlin kawnga kan mawhphurhna kan hriat thar leh theuh a tul a ni a ti.

Pu J Malsawmzuala Vanchhawng hian mi thenkhatin Mizoram chu chhe ta em em, thalaite pawh laktlak loh leh ruihhlo vanga buai ta em em angin an sawi fo a, a tak takah chuan thian chhan thih ngam thalai rual sang tam tak, khawtlang tana mi tangkai, khawtin leh veng tinah an la tam em em zawk a ni a ti a, a chhe lai ringawt kan in hrilh tam lutuk chuan ‘tumah ring zo lo, Politician tumah ring lo, khawtlang hruaitute pawh ring zo lo, Dan kengkawhtu police te pawh ring chuang lo, mipuite rawngbawl hna thawktu sorkar hnathawkte pawh ring chuang lo, Dan rorelna pawh ring chuang lo kan insiam belh zel thei a, chu chuan ‘Zo nun zemawi’ bakah mipui rorelna, democracy lungphum a ti nghing nasa hle thei a ni a ti.

Pu J Malsawmzuala Vanchhawng hian pawl ropui tak, YMA leh tlawmngai pawl dangte bakah Kohhran hote venpuina hnuaiah, tunhma nena khaikhinin Mizoramin hma a sawn nasa hle a, UN Assembly ruahmanna bawhzuia Niti Aayog in tehna hrang hrang a duan chhuahah pawh Mizoram chu India ram state te zinga hmahruaitu 12 zingah a tel phak a, Economic Survey in a tarlan thil tam tak atang pawhin Mizoram hmasawn chak zia a hmuh theih a ni a ti a, YMA member te chu engtiklai pawha beiseina nung nei tura chahin, lungrualna tha tak nen, ram leh hnam tana an tih theihte hlen theuh tum turin a chah a, an khawih phak chin theuh leh an thunun phak chin zel theuhah, a tha zawnga damlamna thlentu an nih theuh chuan, chumi infinkhawm chuan Mizoram chu hmasawnna lamtluangah chak leh zualin a kaltir ngei ngei dawn a ni a ti.

Vantawng group YMA Inkhawmpui ah hian an huamchhunga YMA Branch 13 ten Mizo Lengkhawm zai leh Mizo Hnam lam hmangin intihsiakna an nei a, Zanin vantlang inkhawmah khuallian Pu J Malsawmzuala Vanchhawng in intihsiak lawmman a sem ang a, Inkhawmpui Khualzahawm Police Training School Principal Pu HL Thangzuala leh Central YMA Vice President Pu Lalhmachhuana ten thu sawiin, inkhawmpui hi a tiak ang.

Sd/-

(PC.LALRINHLUA)
Secretary
Media & Publicity Dept
Mizo National Front
Memo No.MNF/Media/04/2023/644
Dt.31.03.2023

Leave a Reply

Your email address will not be published. Required fields are marked *