Mizo National front
General Headquarters
Mizoram : Aizawl
PRESS RELEASE
INTHLAN HMACHHAWN TURIN KAN DINHMUN A THA BER: Er. Lalrinawma
Vawiin June ni 5, 2023 Thawhtanni khan Mizo Hnam Runah chhung inkhawm neih a ni a. He huna thusawitu MNF Adviser & Minister Er. Lalrinawma chuan, kumin MLA inthlanpui hmachhawn turin MNF dinhmun a tha ber, a ti.
Er. Lalrinawma chuan tunlaiah jubilee lawmna hrang hranga a tel thu sawiin, hengte hi (MNF leh India) remna thuthlung rahchhuah a ni, a ti. “Remna thuthlung leh a rahchhuah hi kan sawi nawn a, kan inhrilhhriat fo a tul. Zalenna hi a hlu a, a hlutna kan la hmu zel dawn. Thangtharte hnenah remna thuthlung leh zalenna hlutzia hi kan sawi nawn fo a ngai,” a ti.
“Assembly House-ah Uniform Civil Code duh lohna resolution kan pass kha a pawimawh hle,” tiin, India khua leh tuite tan dan pakhat hnuaiah awmtirtu tur a nih thu Pu Rinawma chuan a sawi a. “Kan inremna thuthlungah khan kan hruaitu hmasaten fing takin India constitution siamthat phah hial khawpin kan inhumhimna tur an lo dah tel mai bakah, university leh zirna tha kan neih theihna tur an dah a. Tin, ram inhlanchhawnah a neitu nihna chanvo min pe vek bawk a ni,” a ti.
“Kan hnam pasalthaten nunna hial hlanin ram tan an inpek laiin, keini an hnung zui zeltute hian beisei ang kan hmu lova vuivaina a awm a nih pawhin kan thuthlung i vawng reng ang u,” tiin party mite a chah.
Er. Rinawma chuan sorkar hmalak dan sawiin, “Hmasawnna ruhrel thawk tura kan hotuten ke an pen laiin, kan hriat ngai loh hripui, vawk hrite a lo leng a. Heng karah hian theihtawp chhuahin hma kan la a. Central atanga lokal tur Rs. vbc 3000 chuang kan hloh chungin kan kal hram hram thei a. Tunah hian inthlan hmachhawn turin kan dinhmun hi a tha ber a, kan party boruak pawh a kang chho zel a ni,” a ti.
Inkhawm hi Pu Gogo Lalremtluanga, Secretary Gen. Hqrs-in a kaihruai a, Pi Lalmuankimi, Jt. Secretary Gen. Hqrs-in hunserh a hmang a. Pu PC Lalkristiana (Secy), Pu HP Zonunsanga (Secy) leh Pu JV Pahlira (Jt. Secy)-ten zin report an pe bawk a ni.
Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/726
Dt. 05.06.2023