Mizo National Front
General Headquarters
Mizoram : Aizawl

 

Press Release

INDEPENDENCE PUAN HRIATRENGNA LUNGPHUN HAWNG

 

Remna tluan tling kan neih hi – Export tur hlu ber kan neih chhun a ni: Pu Zoramthanga

Khawvela Political Party zingah Lalpa hming lam hmasa an awm ve ka ring lo: Pu Tawnluia

 

October 22, 2022: Tukin zing dar 7 khan MNF President Pu Zoramthanga chuan Mission Veng South-a Pu C. Rochhinga in kawtah ‘Independence Puanna Hmun Hriatrengna Lungphun Hawnna’ a nei a. Mizoramin export tur kan neih hlu ber chu MNF leh India sorkarin inremna an ziah – remna tluan tling a nih thu a sawi. Lungphun hawnna hmun hi Ni 1, March, 1966 zan laia MNF-in independence puanna hmun kha a ni.

MNF President leh Chief Minister Pu Zoramthanga chuan lungphun hawngin thu a sawi a. ” Ni  1, March 1966 khan heti laiah hian independence puan a ni a. A hunlai kha chuan a ropui lo khawp mai. Amaherawhchu, a thawm erawh a lian hle a ni,” a ti.

India rama Mizoram a beh dan sawiin: “British an chhuah dawn khan India-in min awp si lova, mithiamten engtinnge kan awm dawn an ti. Ngaihdan hrang hrang – Pakistan (tuna Bangladesh)-ah bet ang u, Burma-ah, India-ah, Crown Colony (British)-ah bet ang u, tih leh independence an ti. Hetah hian hmun ruak (political vacuum) a awm ta a. India-ah kan tel ta ringawt mai a ni,” a ti a. Ram buai hnu sawi chhunzawmin, Pu Laldenga hova India nen an indawrnaah India Preamble siam a nih laiin kan tel ve lohna Constitution in siam a, barh luih kan ni, tia India sorkar an hnial thu a sawi.

Pu Zoramthanga chuan: “Union Home Minister, Assam CM leh Pu Laldenga ten Shillong-ah tripartite agreement an siam laiin, Pu Dengan silai kan hmang lovang a ti a. Amaherawhchu, February 1966 atangin para military leh sipai an rawn tir ta zel a. Pu Laldenga’n agreement an bawhchhia tia Assam CM hnena sipai an rawn tirh chhan a zawhna chu chhan a ni ta lo,” a ti a. “Hetiang a nih avang hian silai kenga zalenna sual a ngai ta! India Consitution lak atangin tumahin min phelh dawn lo. Hemi lak atanga tal chhuak turin keimahni leh keimahnin independence kan lo puang ta a. Kum 20 zet zalenna kan sual a ni.”

“Amaherawhchu, mipui leh kohhranten inremna an duh a. Pakistana kan awm lai – kum 1972-ah keini chuan kan tel ve lohna India Consitution chhungah inremna siam a tul avangin kan duh dan clause kan siam ve a ngai kan ti a, NGO leh mipuite hnenah ‘In duh dan rawn thlen rawh ru,’ kan ti a. Rawtna tam tak a lo lut, a. Tichuan, Article 371G a lo chhuak ta a ni,” a ti.

Inremna turah hian MNF chuan ramhnuaia an article of association an chhawm lut thei lo a. Mihring leh ralthuam zawng zawng surrender vek a ngai ang bawkin Constitution-a Article 371G telh tura India sorkar an kar thu a sawi bakah Pu Zoramthanga chuan, “Kan lo luh dawn chuan interim sorkar kan la ang kan ti a. Kha UT sorkar thlan tlin kha electoral roll-a awm miah loten thla ruk chhung luahin CM leh Dy CM kan han luah thei mai kha India sorkar ropuina leh a puitlin em em na a ni,” a ti.

Kum 20 rambuai kha thla ruk interim sorkar atan an pek kha, tunah kum 36 remna (time-tested peace) a lo awm phah ta tih sawiin MNF President chuan: “South East Asia huap pawhin MNF leh India inremna aia inremna hlawhtling hi khawiah nge awm?” a ti a. “Keini (Mizoram) chuan export tur engmah kan nei lo. Remna tluan tling kan neih hi export tur hlu ber kan neih chhun chu a ni. Article 371G ang hi America federal sorkar pawhin an nei lo,” a ti bawk.

Zofate kalkawng hi Pathian remruat a nih thu sawiin, “Independence chu kan duh ber a nih laiin special protection hnuaia kan awm hi chanchin tha hrilna remchang zawk a ni. Khawvel mipui hmun ruka thena hmun khatte hnenah passport ngai lovin chanchin tha kan hril thei. Pathianin Mizote hi mission min pe a, chu chu a chanchin tha hril a ni. Bangladesh chuan independence kum khat an sual a, an independent mai. Keini chuan kum 20 kan sual a, tuna kan awm dan hi Pathianin tha a ti. Pathian remruat dana kan kal chuan kan kal sual ngai lo ang.

“Bible Society of India-ah hnam dangte thawh zat Mizoten kan thawk. India rama ringtu kalkhawmte hian Mizo bek an thlir thuap a ni. Israel ten kum 40 Aigupta an pannaah Pharoa ro (hausakna) an hmang angin, keini pawhin chanchin tha hril turin India hian min tumsak thui ta khawp mai,” Pu Zoramthanga chuan a ti.

Pu C. Rochhinga (L) in kawta lungphun hawnna program hi MNF Diamond Jubilee Celebration Committee hnuaia Literature & Documentation Sub-Committee buatsaih a ni a. Lungphun hawnna inkhawm hi Sub-Committee Chairman Pu TJ Lalnuntluanga (MoS)-in a kaihruai a, Sub-Committee member Pu K. Lalthawmmawia (NCC)-in hunserh a hmang a, Sub-Committee Secretary Pu VL Krosshnehzova(GS)in report a pe a. Tin, Pi Remliani Chawngthu D/o Pu C. Rochhinga (L) chuan thutawi a sawi bawk a. He hunah hian party hruaitu thahnem tak an tel.

Tukin zing 7 vek khan MNF Diamond Jubilee Celebration Committee buatsaihin Diamond Jubilee Lungphun hawnna chu hmun hrang hrangah neih a ni bawk a: Phunchawng dai, Sairang Road-ah MNF Sr. Vice President & Dy CM Pu Tawnluia chuan lungphun a hawng a. Program hi MNF Adviser & MoS Pu Robert Romawia Royte-in a kaihruai a ni.

MNF Vice President Pu Tawnluia chuan, “MNF hi Pathianin Mizo hnam tungding tura min din kan ni a, Mizo hnamte khawvela pholanga tiṭhanglian turin min din a ni. Kan hnam pa, Pu Laldenga hova MNF din a nih khan ‘Pathian leh kan ram tan’ tiin din a ni. Keini chuan Lalpa hming kan lam hmasa ṭhin. He khawvela Political Party awm zingah hian Lalpa hming lam hmasa an awm ve ka ring lo,” a ti.

“MNF chu hnam martar nei party kan ni a, kan party hian a hrereng. Mizo hnam tung dinga tiṭhang liantu party kan ni. Lu chhum, ban chhum huama kan President kalta Pu Laldenga hova din kan ni. MNF din ni October ni 22 chu ram tana kan inpek ngheh deuh deuhna ni lo ni zel rawh se,” Pu Tawnluia chuan a ti.

Jubilee lungphun hawnna hi Melthumah MNF Vice President Pu Vanlalzawma hovin neih a ni a. Selesihah MNF Vice President Pu Lalthlengliana leh Zemabawkah MNF Treasurer Pu K Vanlalauva-ten lungphun an hawng bawk a, party mi thahnem tak an tel zel a ni.

Sd/-
(MALSAWMPUIA RALTE)
Joint Secretary
Media & Publicity Department
Mizo National Front
Memo No. MNF/Media/03/2022/535
Dt. 22.10.2022