Mizo National Front
General Headquarters
Mizoram : Aizawl

Press Release

IN SURRENDER IN A LEHLAM VE VE PAWM THEIH REMNA THUTHLUNG AN ZIAK NGAI LO
-Pu Tawnluia, Dy.Chief Minister

Vawiin November ni 16, 2022 Nilaini hian Deputy Chief Minister Pu Tawnluia chuan, India sorkar leh MNF ten inremna thuthlung an ziah fel hnua Mizo Hnam Sipai, Arakan a awmte lo chûanchhuahna hmasa ber ‘Peace Camp’ sakna hmun Parva-ah MNF Diamond Jubilee puala siam ‘Remna Kawtchhuah Hriatrengna Lung’ phun a hawng.

Deputy CM Pu Tawnluia’n Remna kawtchhuah lungphun a hawn zawh hian Parva-III Community Hall-ah Vantlang inkhawm neih a ni a.

Pu Tawnluia chuan, ‘MNF kum 60 tlin lawmna kal meka thil chhinchhiah turte leh hriatrengna lung phun buaipuitute chungah lawmthu a sawi a.

Pathianin MNF a hruaidan sawiin, kum 1961-ah Pu Laldenga hoa din a ni a. Nikum 2021 khan MNF in kum 60 a lo thleng ta a, a lawmna kumin kum tluana neih a nih thu sawiin, a lawmna hnuhnung ber vawiina lo thleng hi lawmawm ka ti a. Hei hi kan ngaihlu a ni tih Zoram Mipuite hriatah kan puang duh a ni a ti.

MNF Senior Vice President chuan, Kum 1961-a MNF din a nih khan thil tum a nei a. Zohnahthlak zawng zawng te zalenna sang tak nei a ‘Rorelna pakhat hnuaia awm tura hmalak’ chu a tum lian ber pakhat a ni tih sawiin, kum 1964-ah MNF Volunteer 22 ten Pu Laldenga te ruahmanna in Chittagong bulah training an nei a. Anni chuan Silai leh a mu ṭhahnem tak akin Mizoram an pan a, Mizoram an lo luh hmasak berna Parva daiah hian an ralthuam te an thukru ta a. Khawtlang mipui tlemtein an hria a, “India sorkar in a hriat loh nan in lo hum a, Mizoram Independent sualna kawngah Parva hian tha in thawh nasa in in pawimawh em em a. In chungah lawmthu ka sawi a ni” a ti.

Deputy CM chuan ramhnuai aṭanga an chhuah chhan sawifiahin, “Party zawng zawngten ‘remna siam rawh u’, kohhran zawng zawng ten ‘remna siam rawh u’, Ṭhalaite – zirlai pawl, NGO – YMA, MZP, MSU ten ‘remna siam rawh u’. Kum 20 zet kan tuar tawh a, kan hah tawh a ni. ‘Inremna zawng rawh u’ tia min ngen avangin a tawpah inremna kawng kan zawh a. Kum 1986 June 30 ah Delhi-ah inremna thuthlung ziah a ni ta a. Mizoram chu state puitling a hlankai kan nih bakah special provision neia chanvo pek kan ni a. Hnam sipaite tan ramhnuaiah awm a rem tawh lova. Kan silaite nen Arakan aṭangin kan lo haw a. Rengtlang paltlangin Luidung zawhin Parva ah hian India sorkar aiawh nen ‘Remna Chibai’ inbuk tawnin hun hlimawm tak kan hmang a. Hei hi hriatreng tlak kan tiin Remna Kawtchhuah hmun hi chhinchhiahin awm rawh se, tiin vawiinah hian Lungphun kan hawng ta a ni a ti.

Pu Tawnluia chuan, ‘Mi ṭhenkhatin “MNF te an in surrender, Independent an sual peih tawh lo” tiin thudik lo vawrhdarh an awm ṭhin a,’ Hei hi dawt a ni. In surrender reng rengin a lehlam ve ve pawm theih Remna Thuthlung an ziak ngai lo. MNF hian mipuite phak tawk leh mil zelin ke pen a tum a, Remna siama lo chhuak turin min duh a, chuvangin inremna siam a lo ni ta zawk a ni. Inremna ziah a nih tak avangin Ralthuam kan hman tawh loh tur silai te erawh kan tung ta mai zawk a ni a ti.

Kan hnam sipaite kha an in surrender lo a. Zoram mipuiten min au lo sela chuan vawiin thleng hian ramhnuaiah kan la awm anga, nula tlangvalin min la zawm zel ang, a ti.

MNF Senior Vice President chuan, ‘Remna Kawtchhuah Hriatrengna Lungphun chu a pawimawh tih sawiin, Ṭhangthar zelten,’tun hma khan kan nula tlangvalten Independent an sual tawh a ni tih leh mipuite ngenna angin Inremna hnuaiah helaiah hian lo chuang chhuakin an ralthuamte an lo tung ta a ni tih’ an hre thei dawn a ni a ti.

MNF in silai a neih hmasak ber kan thuhrukna hmun pawh hi vawnhima enkawla, chhinchhiahna siam a ṭul dawn a ni a ti bawk.

Deputy CM Pu Tawnluia chuan, ‘SEDP first installment kan sem tawh a, 2nd installment hi kan pe leh nghal mai dawn a. Nakkumah kumina pek zat chiah hi a thar hlak kan tuam leh dawn a ni. Nakkum tawp inthlanpuiah sorkarna kan lak leh hunah midang pawh kan pe zel ang’ a ti.

Parva khua hi India sorkar leh MNF in June 30, 1986-a inremna an ziah tihhlawhtlin a nihna tura MNF sipaite lo hmuahna hmun a ni a. Arakan aṭangin Rengtlang lawn liamin parva lui kanin Hnam Sipai 392 (nunau chhiar tel lovin) an lo luta, Martar 22 te ruhro chu a hmahruaituah hmangin
July 24, 1986 khan Mizoram chhunga Parva khuaah hian an chawl a. India sorkarin ropui takin a lo Welcome a, Remna Chibai inbukna hmasa ber an inbuk a ni. Parva aṭang hian ke vekin Bungtlang South thleng an kal leh a, chuta ṭang chuan MST Bus in Lunglei, Aizawl lamah thiar an ni ta a ni.

Vawiin Remna Kawtchhuah Lungphun hawnna inkhawm, Parva Community Hall a neihah hian Pu TJ Lalnuntluanga, MNF Adviser leh Transport Minister etc. changtu, Chairman, Literature & Documentation Sub-Committee, MNF Diamond Jubilee Celebration Committee chuan a kaihruai a. Rev. Rohlupuia Renthlei, BCM Parva Pastor Bial tu chuan hunserh a hmang. Pu K. Lalthawmmawia, NCC, MNF General Hqrs. hnen aṭangin inlawmna thu ngaihthlak a ni a, Pu VL. Kroshnehzova, Gen. Secy, MNF General Hqrs & Secretary, Literature & Documentation Sub Committee, MNF Diamond Jubilee Celebration Committee hnen aṭangin Report ngaihthlak a ni bawk. Pu K. Vanlalauva, MNF Treasurer, Pu D. Thangliana, NCC, MNF & Ex-MLA, Pu Samuel Zoramthanpuia, MSU President, Pu Rochungnunga, GS, MNF Gen. Hqrs. ten thu an sawi bawk. Pu H. Vanlalrawna, GS, MNF General Headquarters chuan lawmthu sawiin hun a khar a. Tlai lamah khawtlang huapin ruai ṭheh a ni.

Sd/-
LALLIANZUALA FANAI
Joint Secretary
Media & Publicity Department
Mizo National Front
Memo No.MNF/Media/03/2022/557
Dt.16.11.2022