HUN HARSAA RAM HRUAI TLAKA PATHIANIN A RUAT HI HUN LAWMAWMAH PAWH PATHIANIN A HUNG CHHUAK LEH ANG: LALRUATKIMA

Vawiin hian Mizo National Youth Front, Aizawl West II huaihawtin Executive Committee cum Political Training, ST Farm, Luangmual-ah neih a ni a. He hun hi Pu Lalruatkima Minister, MNF Adviser ni bawk chuan a hmanpui.

Pu Lalruatkima chuan thusawiin, “Social Media lamah te mi ṭhenkhatin kan ram chhe ta lutuk anga an ziak fo mai hi zirtirna dik tawk lo a ni a. Kan ramah hian thil ṭha tam tak a thleng mek a, a thleng zel bawk ang. Sorkar, Kohhran leh mipuite hi kawng hrang hrangah kan ṭha em em a. Insiamṭhatna tur thil ṭhenkhat erawh chu kan nei tlang tih erawh zep thu a awm lo. A hnam ang te, a sorkar angtea chhe ta vek ang hiala insawi fo erawh hi chu a dik lo a ni,” a ti.

MNF Adviser chuan tun sorkar ding mek chuan hripui leh thil dang avangin hun harsa a tawng tam hle tih a sawi a. “Pu Zoramthanga sorkar, hun harsaa ram hruai tlaka Pathianin a ruat hi hun lawmawmah pawh Pathianin he ram hruai tur hian a hung chhuak leh ngei ang tih ka ring a. Kum 2023 inthlanah pawh hian Pathian leh mipui zarah MNF chuan sorkarna a chan leh ngei ka ring a ni,” a ti bawk.

Pu Ruatkima chuan, “Pu Zoramthanga hruai sorkar hnuaiah hripuiin min ti khaihlak deuh mahse, hmasawnna hnathawh hmuh tur a tam em em a. Kan kawngte pawh tunhma lakah chuan a lo ṭha ta hle a. Ration buhfai leh gas kan hnianghnar a, nitin mamawh kan hnianghnar a, ramri humhalh thuah te sorkar-in a thawk ṭha hle. He sorkar hian inthlan hmaa kan inzawrhna kan Manifesto kan tihlawhtling tam tawh em em bawk a ni,” a ti bawk.

Pu Ruatkima chuan, ṭhalai kalkhawmte chu ram vei tura chahin, “Ṭhalaite’n ram an vei loh chuan kan hnam hmalam hun a ngaihtuahawm viau ang. Chuvangin, ram leh hnam veina tak tak thinlung kan put a ngai a. Hnam chhan a, ram tana ding turin ṭhalaite hi kan pawimawh a ni,” a ti bawk.

He hun hi Pu Lalnunthara Fimate, Vice President MNYF, Aizawl West II-in a kaihruai a ni.

Sd/-
LALLENMAWIA JONGTE
Secretary
Media & Publicity Dept.
Mizo National Front
Memo No.MNF/Media/02/2021/438
Dt.09.06.2022.