Mizo National Front
General Headquarters
Mizoram : Aizawl

Press Release

HNAM RILRU PUIN LEHKHA ZIR ANG U: LALRUATKIMA

Dt.30.6.2022 :  Dinthar YMA Hall-ah Dinthar Local Council huaihawtin pass tharte lawmpuina hun hman a ni. He hun hi bialtu MLA Pu Lalruatkima Minister chuan khuallian niin a hmanpui.

Pu Lalruatkima chuan zirlai kalkhawm hmaah thusawiin, “Hnam rilru puin lehkha zir ang u. Hnam tlawmngai, huaisen leh rinawm kan ni a, chu kan nihna chu hrerengin nunpui zel turin zirlaite ka chah duh a. Mizote hian kan rinawmna leh dikna hi khawi hmunah pawh kan lantir tur a ni. Kan hnam tan, kan khawtlang tan leh kan ram tana mi thawhhlawk ni turin kan zirchhuak tur a ni,” a ti.

Bialtu MLA chuan, “Zanina zirlai lokal khawmte hian kawngzawh tur thui tak in la nei a. In tun hun hi hmang ṭha rawh u. Tun hun in hman ṭhat chuan nakina in awmdan tur a hril dawn a ni. Kan tunlai khawvel changkang zelah hian eng hna pawh thawk dawn ila lehkha thiam a pawimawh. Agriculture lam kan thawk dawn emaw, sumdawnna kawng kan zawh dawn emaw, eng kawng pawh zawh dawn ila lehkhathiam a pawimawh a ni,” a ti a. Tumruhna nena taima taka lehkha zir zel turin zirlai kalkhawmte a chah bawk.

I&PR Minister chuan, hnam dangte el ngam, el pha leh an tluk loh nih tum turin zirlai chu a chah a, chu chu Mizo tlangvalten an thei a ni, a ti a. “Tunlai khawvelah hian ṭhalaiten lehkhabu kan chhiar tlem ta hle a, lehkhabu chhiar i uar thar ang u. Lehkhabu kan chhiar tlem chuan ṭhiante zingah a mawl pawl nih a hlauhawm. A fing pawl kan nih theih nan lehkhabu kan chhiar tam a pawimawh a. Lehkhabu chhiar tam na na na chu kawng engkimah an vengva nge nge a ni,” a ti.

Pu Ruatkima chuan, “Social Media kan buaipui lutuk ang tih a hlauhawm khawp mai, chin tawk kan neih thiam a pawimawh,” a ti a. “Pathian ṭih chungin kawng engkimah ke kan pen tur a ni, chumiah chuan hlawhtlinna a awm a ni. Tin, kan nu leh pate zah a, chawimawi tur kan ni tih hrereng ang u. Kan nu leh pate hriatna kawngah te hre lo zawk pawh a ni ang, dimdawi takin zahna nen kan enkawl tur a ni,” a ti bawk.

He hunah hian Pu R Thanglura, Dy Mayor chu khualṭha atan hman a ni a, thusawiin, “In mobile phone aiin lehkhabu ṭha kawm tam ula, khawlai len aiin mahni ina tawm ngam ni rawh u. Pathian ṭih chungin thawhrimna leh rinawmna nen ke pen ula hlawhtlinna in chang zel ang,” tiin zirlaite fuihna thu a sawi.

Pass tharte lawmpuina hun hi Pu R Lalawmpuia, Chairman Dinthar Local Council-in a kaihruai a ni.

Sd/-LALLENMAWIA JONGTE
Secretary
Media & Publicity Dept.
Mizo National Front
Memo No.MNF/Media/02/2021/458
Dt.01.06.2022.