Mizo National Front
General Headquarters
Mizoram : Aizawl
Press Release
HNAHTHIAL DISTRICT FISHERY DEVELOPMENT OFFICER OFFICE THAR HAWNG
Vawiin March ni 30, 2023 (Ningani) hian Hnahthialah Hnahthial District Fishery Development Officer Office thar chu bialtu MLA, Dr.R.Lalthangliana Minister chuan, Pu K.Lalrinliana Fishery Minister awm laiin a hawng. Hawnna inkhawm hi Zofa Run Hnahthialah neih a ni.
Hawnna thu sawiin, khuallian Dr.R.Lalthangliana chuan District thar tihpuitlin nan DFDO staff thar pali nena thawk nghal tur an hawng thei chu lawmawm a tih thu a sawi a. Pu K.Lalrinliana Minister department tho DCSO leh DLAO office thar kuminah Hnahthiala hawn leh theih anih tur thu lawmawm a tih thu a sawi a. Tuipui ‘D’ ah Lawng te chi 4 min pe tur hi Fishery Minister Pu K.Lalrinliana hnenah lawmthu ka sawi nawn leh a ti. Kan lui sangha leh nungchangte hi kan humhalh loh chuan a tuartute chu keimahni kan ni a ti bawk.
Dr.R.Lalthangliana chuan Political party thenkhatin MNF sorkar chu engmah ti lo anga an puhna chu sawifiahin, covid hrileng karah Zoram pumah hna tam tak an thawh thu a sawi. A bial chhunga hna thawh thenkhat chauh a tarlang a. MNF sorkar hmasain Hnahthial, Saitual leh Khawzawl District thar pathum an puan tawh kha congress sorkar kum 10 chhung khan hmalakna a awm lo a, tun MNF sorkar thar atanga thla 8 chhung leka fuke kima an tihpuitlin thu a sawi. District dang chu MLA pahnih thum te, pali/ngaten an thut chilh rawn laiin; Hnahthial district chu MLA pakhat chauhin a thut chilh bik a, kohhran leh NGO zawng zawngten an pur rawn bik a, chungte chu phurrit ni lovin District khat enkawltu anih anga a tih tur a ti thei ve zel chu Pathian malsawmna ni zawka a ngaih thu a sawi.
UD & PA office building thar sak te, Convention Centre-te, cheng nuai 100 vel senga DRDA office thar sak te, cheng nuai 1000 man DC office sak thar te, cheng nuai 100 vel senga DUDO office building ropui tak sak zawh tawhte leh CMO office building thar cheng nuai 400 man an sak thar thu a sawi. District Hospital thar hlak pathum cheng nuai 1700/- man theuh, central sorkara ama zu sawi chhuah chu Hnahthialah pawh bultan thuai a nih tur thu a sawi bawk. Hnahthial Playground-ah Sports Minister nen Infiam mite tan phullem tha tak cheng nuai 1000 tlinglo deuh senga an phah thu a tarlang bawk.
District dangin an neih ve loh North East pawh thleng zo tur Dr.R.Lalthangliana chuan cheng nuai 840 sengin IIPC (Integrated Industrial Promotion Centre) building turu lutuk pawh an thawk mek a. Hnahthial PWD IB, a sakna rei tawh lutuk leh awngrawp tawh tak hmunah hian cheng nuai 400 man Rest House ang deuh bultan thuai a ni ang a, SASCI atangin cheng nuai 400 man vel thawh tan mek a ni bawk. PMGSY atangin Thingsai to Bualpui kawng cheng nuai 800 senna te, Thingsai to Tiau kawng cheng nuai 800 man thawh zawh tawh leh Hnahthial to South Chawngtui cheng nuai 800 hna thawhte leh school of agricultural sciences building pahnih cheng nuai 750 man ve ve sak chu a lawmawm hle a ni a ti.
Khual zahawm Pu K.Lalrinliana Fishery Minister pawhin, “Fishery department hi te takte ni mah i la, thawh tur erawh kan ngah hle. Vawiinah pawh staffs indaih lo tak chungin DFDO office thar kan hawng thei hi lawmawm ka ti hle a ni. Kan intodelh loh avangin state dang atangin sa chi hrang hrang kan lalut thin a, Doctor thiamte chuan sa ei aiin Sangha ei hi a hrisel zawk a ni tih an sawi thin. Sangha humhalhna tha tak Dan kan nei a, Mizorama Lui lian zual 16 kan neihte hi kan humhalh that chuan sanghaah kan intodelh thei. Tur (poison)-a Sangha kan hrai hian ram pawn thlengin an tlanchhe ve thin a. Sangha leh Luia chengte hi kan humhim that chuan inthlah pung chak tura Pathian ruat, mihringten kan ei tur atana Pathian min pek a ni. Fisheries rules atangin CYMA-te nen thawhhona tha tak kan nei a, Branch YMA zawng zawngte hi kan staffs ab ni mai. Kan ram luite hi tur, dianamo leh bomb hmangin suasam lo i la, kan ram lui dung nungchangteah hian kan intodelhna khawp a awm tih hria ang u. Lui dung Sangha mai ni lo, kan Dil sanghate pawh hi an thang chak hle a, mahni ei tur mai ni lo, State pawn thlengin a hralhna market a tha em em a. Sangha dil tanpuina pawh kan pe tha hle a, a tanpuina chauh beisei lovin tih takzetin i enkawl ang u,” a ti.
He hun hi Pu Laldawngliana MCS, Secretary Government of Mizoram, Fisheries department chuan a kaihruai a. Pu F.Vanlallawma, Director, Fishery department chuan report a pe. Pu R.Lalremsanga DC Hnahthial pawhin thu a sawi.
Minister-te hi Pu R.Lalremsanga DC Hnahthial, Pu Veenit Kumar IPS, SP Hnahthial, Pu Bijoy Gurung, Adll SP Hnahthial, Pu Lalremruata Sailo SDO (Sadar) Hnahthial, Dr.Lalrengpuii MO Hnahthial-ten an lo dawngsawng a ni.
Sd/-
(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/641
Dt.30.03.2023