HNAHTHIAL-AH MIZO HNAMRUN BUILDING THAR HAWN A NI

HNAHTHIAL-AH MIZO HNAMRUN BUILDING THAR HAWN A NI

Mizo National Front
General Headquarters
Mizoram : Aizawl

Press Release

HNAHTHIAL-AH MIZO HNAMRUN BUILDING THAR HAWN A NI

MINISTER DR.THANGTEA’N DISTRICT THAR NEIH AVANGA HMASAWNNA THENKHAT A PUANG

Vawiin September ni 15, 2023 (Zirtawpni) chawhma dar 10:30(am) khan South Tuipui bialtu, Health Minister Dr.R.Lalthangliana chuan Hnahthial Peniel venga Mizo Hnam Run sak thar chu party mipui luah theih turin a hawng. He building hi chhawng 5-a sang, bialtu MLA hmalakna a zara puitlin theih a ni.

Vawiin chhun khan ‘MNF South Tuipui West Block’ huaihawtin, ‘RD Conference Hall, Bazar veng, Hnahthial’ ah ‘MNF South Tuipui Block Meet’ neih a ni a. Bialtu MLA Dr.R.Lalthangliana chuan khuallian niin a hmanpui.

Dr.R.Lalthangliana chuan Congress sorkarin kum 10 chhunga thil tih theih loh bur anga a sawi kha, MNF sorkar atanga thla 8 lekah a hma a an lo intiam tawh angin Hnahthial, Saitual leh Khawzawl District-te chu fuke kima an tihpuitlin nghal thu a sawi. District tharin a kentel Covid hrileng karah tun hmaa an la neih ngai loh thil thar tam tak a bial chhunga an neihte sawiin; a langsar zualte chu -Hnahthial District bawrhsap piasa cheng nuai 1000 senga sak hawn tawh te, UD & PA department hnuaia District Urban Development Officer Office cheng nuai 70 senna luah tawh te, District AH & VETY Hnahthial-ah cheng nuai 250 sengin Hospital cum laboratory, DVO Quarters leh VO Quarter sakte leh Mizoram hmun danga awm ve lo, Integrated Industrial Promotion Centre (IIPC) cheng nuai 846 senga sak mek te, Chief Medical Officer Office tur cheng nuai 330 senga sak zawh tawhte leh cheng nuai 153 senga District Rural Development Office sak zawh tawh luah mek te, Project Director Quarter atan cheng nuai 137 chuanga sak mekte a tarlang.

Heng bakah hian Agriculture department hnuaia cheng nuai 150 senga ware house sak zawh tawh te, cheng nuai 682 senna phullem phah te, cheng nuai 700 senna School of Agriculture Sciences (SAS) ah Admistrative Building, Academic building leh Girls Hostel sak zawh luah mek te, DCSO office hawn tawh te, PWD Division neih thar te, District Child Protection Unit pawh DCPO hova neih thar te, Block Agriculture Office thar leh DIPRO neih tharte a sawilang a. Karleh lawkah cheng nuai 500 senga sak CMO office hawn tur thu a sawi bawk.

District thar 3 tan District Hospital lian cheng nuai 1700 theuh senga sak tur chu a lung phum thuai anih tur thu te sawiin, heng zawng zawng a thlen theihna chhan chu Chief Minister Pu Zoramthanga rilru zau leh thil phal vang anih avangin, a bikin Chief Minister hnenah a lawmthu a sawi nawn.

Dr.Thangtea chuan District-in a kentel Sub-division neuh neuh la tihhlawhtlin tur, la zawh hman loh a tam a. A agenda la zawh lohte chhunzawm turin amah leh MNF official MLA candidate dangte thlang tling leh turin mipui a sawm nghal.

Pu Lalrintluanga Sailo MLA, Dy.Govt.Chief Whip pawhin MNF chu Hnam thinlung pute luan khawmna a ni a, a danglam bik a ni. Kan CM hovin eptuten dawta sual tin rengin min bei thin. Lunglei LMC leh Zemabawk LC by-election ah ZPM chu an han tling ve a, an thaw lian ta hle mai a, tunah chuan an zuih ral leh ta. Mizoram MLA bial 40 awmnaah ZPM chuan mi lar, sumdawng leh sorkar hnathawk pension ho candidate-a an sawmte hi mi 53 an ni tawh. Kan thalai tam tak hi ZPM bumin an awm mek a, thlaite hmakhaw nun an tichhe vek a. Inthlan zawhah chuan thalai tam tak beidawngin an siam ngei ang. Pu Lalduhoma hi mi bum thiam tak a ni a, pastor bial khata awm thin kan ni a, a kohhran upa nih dan thlengin ka hria. ZPM hi mi beidawng kalkhawm an ni a, Pu Duhoma berin kan tlin loh chuan ka peih tawh lo ang a ti a, party hrang hrang atanga beidawng kalkhawm an ni. Mi beidawng pain mi a hruai chuan ram ropui a thlen theih loh a ti bawk.

He hun hi Pu J.Lalchhuana President, West Block chuan kaihruaiin, Pu R.Lalbela NCM chuan hunserh a hmang. Pu C.Lalruatkima Block Secretary leh Pu VL.Liansanga Block Secretary-te hnen atangin introduction leh block report ngaihthlak a ni a. Pu B.Lalromawia Block Vice President chuan lawmthu sawiin hun a khar.

Sd/-

(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/843
Dt.15.09.2023

Leave a Reply

Your email address will not be published. Required fields are marked *