Mizo National Front
General Headquarters
Mizoram : Aizawl
Press Release
HMASAWNNA HNA THAWHIN RAM HMEL A TIDANGLAM MEK ZEL HI LAWMAWM KAN TI.
– MNF
April ni 25, 2023 Thawhlehni khan Chief Minister Pu Zoramthanga chuan Keitum leh Artahkawn inkar Tuichang Lei dawh thar (Double Lane Built-up Steel Girder Bridge), cheng nuai 1010.53 senga dawhzawh chu a hawng a. Hemi ni vek hian Power & Electricity Department changtu Pu R.Lalzirliana chuan Vankal Solar Park, cheng nuai 2107 senga din chu a hawng bawk.
Tuichang Lei hawn thar hi Sorkar hmasa Congress hunlai, kum 2016 a bul tan a ni a. Covid hripui vangin hna a khaihlak rei em em a, sum awmsa in a daih loh vangin Sorkar chuan SASCI atangin nuai 259.45 pek belh a ni. Kumin March 31 khan zawh a ni ta a. Lei dawh nana sum sen zawng zawng hi Cheng nuai 1010.35 a ni. Lei sei zawng hi metre 68 niin Thir hmanga dawh niin, a chhuat erawh RCC a ni.
Tin, Vankal Solar Park hi kum 2018 August thlaah lungphum phuma bultan niin, Ministry of New & Renewable Energy (MNRE) leh Mizoram Sawrkar ṭangkawp siam a ni. Nizung chakna hmangin kawlphetha Mega Watt 20 a pe chhuak thei a, India hmarchhaka a hmasa ber leh lian ber a ni. Vankal Solar Park-ah hian power lak luh leh pek chhuahna tur 232/33 kV Sub-Station leh Control Room-te bunfel a ni a. Hmun dang atanga power lokal nen thlunzawm in, Mizoram puma hman theih tura ruahman a ni.
Ram acre 144 a zauah Solar Plate/Module 52453 bun a ni a, heng bakah hian Inverter 113, Inverter Control Room (ICR) 7 leh Main Control Room (MCR) 1 a awm bawk a. Chhinchhiah danin Vankal Solar Park hian a chak lai berin power Mega Watt 19.06 thleng a pe chhuak thei a ni.
Nimin ni 26.4.2023 khan, Rural Development lama Mizoram hmasawnna chu Puducherry RD Minister, AK Sai J.Saravanan Kumar leh a official te chuan Mizoram rawn tlawhin, Mizoram sorkarin MGNREGS a kalpui dan hi tha an tih vanga lo kal an ni a. Mizoram hian RD Minister Pu Lalruatkima enkawlna hnuaiah, MGNREGS ah kum khatah ni 100 ah ni 100 kan inhlawh thin laiin Puducherry hian ni 22 chauh te an thawk hman a ni. Kan minister te hian an zawn theuhah kan ram tan theihtawp an chhuah a ni.
Tun hnaiah Political Party thenkhatin sorkar kal tawh leh kal mek te’n engmah thawk lo leh Mizoram chu sawpchhe vek anga an sawi hi a dik lohzia a lang zelah MNF chuan kan ngai. Hmasawnna thawk lo leh buaipui lo sorkar an awm ngai lo tih hi kan sawi duh bawk a. Kum 40 chhunga ram lo hruai tawhte khan theihtawp chhuahin hma an la vek a. Ngaihpawimawh leh thlurbing lam erawh a inang vek lo.
Thuneihna lalthutthlenga thut chak vanga kan ram hruaitute chak lo leh hmasawnna thlen lo anga an puhna hi thu belhchian dawl lo tak a ni tih a lang zel dawn. Pu Zoramthanga kaihruai MNF sorkar hian tun term-ah zalen taka hnathawhna hun kum hnih tha chauh a neia, heti chunga hmasawnna hna thawh thahnem tak kan neih ten ram hmel a tidanglam mek hi MNF chuan lawmawm kan ti hle.
Mi thenkhat leh Political party thenkhatte’n kan hnam leh ram thatna reng reng an hmu thei lo hi anmahni inenfiah an ngai hle-ah kan ngai.
Sd/-
THANGKIMA
Secretary
Media & Publicity Department
Mizo National Front
Memo No.MNF/Media/
04/2023/679
Dt. 27.4.2023