Mizo National Front
General Headquarters
Mizoram : Aizawl.

Press Release

HLAWHTLING TUR CHUAN MITE AIA THAWHRIM A NGAI -Prof.F.Lalnunmawia, MLA

Vawiin May ni 31st, 2023 (Nilaini) hian Aizawl South III bialtu MLA Prof.F.Lalnunmawia chuan Maubuang High School Managing Board buatsaih HSLC pass lawmpuina hun leh Hualngohmun to Muallungthu Educational Staff Association (HMESA) buatsaih HSLC pass lawmpuina hunte a hmanpui.

Heng HSLC Pass lawmpuina hunah te hian thusawiin Aizawl South III Bialtu MLA chuan, “Tunlai khawvelah Khawtlangin zirna kan ngai pawimawh a, zirtirtu te kutah chauh dah lo va, khawtlang hruaitu leh nu leh pa ten kan ngaihsak thar ta hi a hlu hlein ka hria” a ti.

Prof.Mawitea MLA chuan HSLC pass tharte fuihin, “Zirnaah HSLC pass hi a kakpui thleng ang kan ni a. Tunah chuan nangmahni line ṭheuhah in kal tawh dawn a. In tui zawng in hriat a, in kalna tur in chian a ngai hle a. In subject thlan tur pawh uluk a ngai hle a ni. Tunlaiah Pass ṭawng ṭawng hian awmzia a nei tawh lo a, hlawhtling tur chuan mite aia thawhrim a ngai a ni. Chuvangin HSLC in zawh aṭang hian in zir leh zelna turah taima zawka zir a, tun aia in tih ṭhat chhoh kan beisei dawn cheu a ni ” a ti.

“Tunlai khawvel ah naupang atanga upa lam thlengin internet leh social media kan buaipui nasa ta hle a, hemi kawngah hian zirlaite insum theih a tul hle a, mahni zirlai lehkhabu chhiar tam hi hlawhtlin nan a pawimawh takzet a ni. Tin, lehkha thiam thei turin taksa hriselna leh insawizawina lam uar a tul hle a ni,” tiin, zirlaite chu zuk leh hmuam, ruihtheih thilah inthiarfihlim turin a chah a ni.

Sd/-

(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/724
Dt.31.05.2023