Mizo National Front
General Headquarters
Mizoram : Aizawl

Press Release

HEALTH MINISTER-IN ZOFEST SIALSUKAH KHUALLIAN NIIN A HMAN PUI A, S.CHAWNGTUI GOLDEN JUBILEE HMANPUIIN, TARPHO GODOWN A HAWNG

Zofest 2022 Sialsuka neih chu December ni 8, 2022 (Ningani) zan khan Dr R. Lalthangliana, Health & Family Welfare, etc. Minister chuan khuallian niin a hmanpui a. Khawvel hmun hrang hrang atanga Zofest hmang tura lokalte duhsakna a hlan a, MZP hruaitute chu he hun an buatsaih theih avangin lawmthu a hrilh a, Covd-in hun rei tak min tibuai a, Zofest pawh kan hmang lo rei ta a, Covid donaah Mizoram kan thawhhona a tha a, Pathianin mal min sawm a ni, a ti. Zofate hi khawvelah kan inzarpharh nasa hle a, EUROPE ram thlengin ka fang chhuak a, kan tlem emaw kan tam emaw kan awm ve zel a ni. Geographical boundary hian Zofate min then mahse; Zofate hi kan thinlungah kan inthen dawn lo, kan inpumkhat telh telh dawn a ni. Khawvelah indo thuthang kan hria a, Myanmar politics buai avanga kan unau lo tla thlate tha taka lo dawngsawngtute chungah lawmthu ka a sawi a, USA leh Tuipui ral ram hla tak tak atanga tanpuina lo luang chhuak hi ropui ka ti a ni. Bangladesh lama kan unauten harsatna an tawk mek bawk a, a tawp thlengin phur takin kan lo dawngsawng ang, kan ei chuan an ei ve zel ang a, kan nghei leh kan nghei tlang mai ang. Zofa nih hi a nuam a, kan in hmangaihna ang hi hnam dangten an nei ve phak lo. Engtik niah emaw chuan Zofate hi inzawmkhawmin in pumkhata rorelna pakhat hnuaia kan awm hun hi a la thleng ngei ang, a ti.

Dr.R.Lalthangliana chuan Zofate hi tam lo mah ila; India ram leh khawvel kap eng theitu kan ni bawk. Ngaihtuahna fim tak erawh kan hman a tul a, kum zabi 21-na hi Zofate tan chona a ni. Zofate tan theihloh a awm tur a ni lo, peih rei leh daih rei hi a pawimawh ber ani tih hria ang u. Taimak leh tuarchhel hi Zofate dinhmun sang taka kan awm theihna tura pawimawh ber a ni. Zofa hnam peng hrang hrangte hi chhul khat chhuak, hringtu thuhmun kan nihna hi a takin lantir zel ang u, a ti bawk.

He hunah hian Pu H.Lalbiakzauva MLA chu uaptu a ni a. Tv. Lalrengkima Asst.Secretary Organising Committee chuan inhmelhriattirna hun a hmang a, Lalremruata Hlawndo in a khuh hawnna sawiin, Upa Lalbiakdika UPC NE-in hunserh a hmang. Hnam lam hrang hrang entir a ni bawk a. Thupui chu Lalhruaitluanga Chawngte Adviser-in a sawi bawk a ni. He hun hi USA, Australia, Myanmar leh State hrang hrang atangin palai thahnem tak an rawn kal a ni.

Vawiin hian Minister Dr.R.Lalthangliana hian S.Chawngtui Golden Jubilee hmanpuiin, Jubilee Lungphun a hawng a, Jubilee dar a vaw bawk a ni. Tluang taka he khuain kum 50 a tling chu a lawmpui thu a sawi a. Jubilee-in a Ken pawimawh chu thil kan neih sa, kan lo chan tawh kha Jubilee hian a kenglet a. Miretheite chawmdawl hna bakah leiba leh kan mihuat zawngte ngaihdam hi Jubilee-in a kentel pawimawh tak a ni bawk. He lai bial leh Champhai District inkalpawhna kawng hnai tak, tuna thawh zawh mek hi, MNF kut chhuak a ni a, kan chei chhunzawm zel dawn a ni, a ti a. Jubilee lawmpui nan cheng 50000/-, Oxygen Concentrator leh Thingpui lumna Dekchi lian a hlan nghal bawk. Dr.R.Lalthangliana hian kumin December thla chhung chu a bial mipui tan ration card-a buhfai la zawng zawngte ama suma a khulhsak vek tur thu a puang nghal bawk a ni. Tarpho Godown a hawng in leh a, Godown hi Congress sorkarin a titawp sak, MNF sorkar tharin a dinthar leh a ni. Godown hrim hrim hi ka vawi khat hawnna a ni a, lawmawm ka tiin ka tan thil chhinchhiah tlak a ni, a ti a. He Godown hi Baby Construction-ten NABARD loan hnuai, cheng vbc 39.81senga an sak a ni a, bialtu Lunglei DCSO kutah a statute hian an hlan nghal a ni. Dr.R.Lalthangliana hian Khawhri leh Aithur khua a tlawhin party mipuite nen inkawmhona hun an hmang bawk.

Heng hmunahte hian Dr.R.Lalthangliana chuan thu sawiin, ‘Kan sorkar hian hna ruak chu a ngah khawp mai a, hna thar lak min tibuaitu ber chu Covid kha a ni, thla 6, thla 7 vel a reh chauh a, Covid-in min tihbuai kha kan theihnghilh leh tan tawh a, nimina Sialsuka PHC ka hawn ang kha tam tak kan hawng tawh a, Congress sorkar kum 10 chhung khan pakhat pawh an hawng ve lo. District thar 3 building ropui tak tak sa uaia kan hawn pawh kan hre lo leh tan tawh a ni,” a ti

MNF Adviser Dr.R.Lalthangliana chuan ZPM awmzia dik tak chu a phaw vuakah lang lian angin awm mahse, a chhungril a kawrawng hle a. Social media-ah chauh an lian hle a ni. Congress hi India ram party hlun, India ram leh Mizoramah ro an rel nasa tawh a, kum 10 kal ta vel atang khan an rawih telh telh a. Health Minister ka nihna ang pawhin India ram hmun hrang hrangah Minister meeting kan neihah hian Congress Minister an vang hle mai a. Mizoramah pawh Chakma leh Tuikuk bial hi an tlin vena awm chhun a ni deuh mai a. Mizo hlang awmnaah an vang pharh mai a, inthlan leh ah pawh Congress bial 5 ah hian BJP hi sum nen an chet nat ka ring a, an lak hek ber tur chu Congress an ni tlat. Party dang lo piang leh mahse, a tlai tawh ang. Chuvangin inthlan lehah MNF bak sorkarna siam tur kan awm chuang lo, Pathianin kan tana a hun ruat hi a la kal tluangzel dawn a ni,” a ti bawk. Khawhri-ah hian Congress Unit President Pu MC.Biakthansanga leh Joint Secretary Pu B.Lalruatliana-te chhungkua, Aithur-ah voter-9, Tarphoah Congress Unit President Pu Lalramenga, Vice President Pu Lalchunglura-te telin voters-14 te chu MNF-ah a lawmlut nghal a ni.

Sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/574
Dt.09.12.2022