Mizo National Front
General Headquarters
Aizawl : Mizoram
Press Release
GOVT.SIALSUK HIGH SCHOOL PLATINUM JUBILEE LAWM HAW RUNPUI, DR.R.LALTHANGLIANA MINISTER-IN HMANPUI
Vawiin December ni 2, 2022 (Zirtawpni) hian Sialsuk High School kum 70 tlin champha, Platinum Jubilee leh haw runpui lawmna chu Sialsuk Govt.High School tualah hman a ni a. He hun hi khawtlang hruaitu VC member, NGO hrang hrang, sokar department aiawh hrang hrang te, Sialsuk khaw chhuak hmun hrang hranga awm aiawh kalkhawmten Sialsuk High School Platinum Jubilee lawmna leh ropui taka khaw haw RUNPUI an buatsaihna a ni.
Khuallian Dr.R.Lalthangliana Health Minister chuan, Jubilee Lungphun hawng paha thusawiin, vawiin hi kan Chief Minister zahawm tak khuallian tura tih a ni a, phai lamah hna pawimawha zin a ngaih vangin min rawn bia a, a aiawha lokal ka ni. Government High School Platinum Jubilee leh haw runpui hmangtute zawng zawng chibai ka buk che u a ni. Sialsuk hi Mizorama mi hmingthang tam tak lo chhuahna, keini MNF phei chuan kan hlapui phuahtu ‘Zoram hi kan ram a ni’ tih phuahtu Pu Laltanpuia pianna hmun, Pi Romani (Thalawiin Lelte) phuahtu pianna, Zirsangzela Hnamte, Miss Mizo hmasa ber Lalbiakzuali pianna, thu leh hla thiam James Dokhuma leh Darrokima leh mi hmingthang tam tak lo chhuahna hmun a ni. Kum 1906 thleng khan Sialsuk hmuna Thawngliana Hospital-ah hian lehkha a lo thleng a, Sialsuk hi Health History-ah record tha tak awmna a ni bawk. Kan pian leh murna hi khaw lian tak anih loh pawhin tumruhna leh taimakna kan neih tlat chuan mi ropui tak anih theih tih hria ang u, a ti.
Dr.R.Lalthangliana Minister chuan, “Tunlai khawvelah Certificate tha tak neih ringawtin hna tha a hmuh theih tawh loh a, thiamna tak tak neih a ngai tawh a ni. Vawiin hian zirtirtu leh zirlaite hi thiamna tak tak nei turin chona ka pe duh che u a ni. ZMC atana pawimawh tur thiamna sang tak bik nei Professor kan mamawh pawh a zawnin kan zawng a, a ram mi kan inhmu zo lo a, vai pitar leh putar pension tawh cheng nuai 250000/- ten kan ruai a, a rilru nat thlak ka ti thin. Central service leh All India service-ah kan tlahniam zel bawk a, vawiina lokal zawng zawngte hian kan rilru ngaihtuahna siam tharin theihloh a awm lo tih hriain ngaihtuahna thar nei vek ang u. Platinum Jubilee leh khaw haw runpui hmangtu zawng zawngte hian khawvel hi chho zawngin en lo i la, chhuk zawnga kan en theilo a nih pawhin a phei zawng talin i en tawh ang u,” a ti bawk.
Khualzahawm Prof.F.Lalnunmawia bialtu MLA pawhin Souvenir tlangzarh pahin thu a sawi a ni.
He hun hi Pu R.Lalruatkima, VCP Sialsuk & Chairman, Organising Committee chuan a kaihhruai a, Upa Lalsawmliana chuan hunserh a hmang a ni. Pu Nghaklianmawia MCS (Rdt) leh Pu R.Lalduhawma High School Teacher-ten inhmelhriattirna hun an hmang a. High School Headmaster lo ni tawhte chawimawina hun hman a ni bawk a, zan lamah Sialkhawpui Thalaite Night intihhlimna hun an hmang bawk a ni.
Health Minister hian Aibawk PHC chu tlawhin mamawh an neih hrang hrangte a enfiah a, Dr.Zoliankimi Medical Officer leh staffs-ten an lo dawngsawng a, ZMC-a Academic Block building-a department hrang hrangte chu a tlawh haw nghal bawk a ni.
Sd/-
(R.LALHMANGAIHA)
Secretary
Media & Publicity Dept.
Mizo National Front
Memo.MNF/Media/03/2022/568
Dt.02.12.2022.