Mizo National front
General Headquarters
Mizoram : Aizawl
PRESS RELEASE
ENG PAWH HMACHHAWN ILA PUITLING TAKIN I AWM ANG U: Pu Tawnluia, MNF Sr. Vice President
Tun ministry-ah hian anti-incumbency lian tak a awm lova a lawmawm hle_
Vawiin ni 13.11.2023 Thawhtanni chawhma khan Mizo Hnam Run inkhawm neih a ni a. Pu Tawnluia, Dy CM & MNF Sr. Vice President chuan thusawiin inthlan result puan hmabakah eng pawh lo thleng se, puilting taka hmachhawn turin party mipuite a chah.
Dy. Chief Minister chuan tluang taka MLA Election 2023 neihna tura State election hotute leh govt official te, political party te, TV leh Print Media leh MPF-te thawhhonaah lawmthu a sawi a. Mizoram mipui 80% ten vote an thlak chu lawmawm a tih thu a sawi bawk.
ECI-in vote chhiar hun tura Pathianni a ruat chungchangah: “Party leh Sorkar ang chuan kan duh lo hle a, hma kan la zel a ni,” a ti.
“Tunah hian tupawh lo sorkar se an thiltih leh an hnathawhah teh thin ni se. Sorkar kal tawhten engmah ti lo ang maia an sawi thin hi a tha lo. Political party-ten manifesto kan duante hi inteh nan hmang ila a duhawm hle ang.”
“Kan hmabak vote chhiar hunah – Chak thei kan ni a; Chak lo thei kan ni bawk. Khawvela kan awm chhungin dam lohna leh harsatnate a awm thin. Hlimna leh lawm chang a awm bawk angin, eng pawh hmachhawn thiam turin i inbuatsaih ang u. Chu chu mi puitlingte tihdan a ni,” a ti a. “Hnehna kan chang a nih pawhin chapona leh midangte deuna a awm thei. Kan party chu puitling takin i awm ang u,” a ti.
MNF Sr. Vice President chuan MNF sorkar chu mipuiin an dem lova a hriat thu a sawi a. “Hripui te, raltlan leh harsatna hrang hrang kara sorkar hmalakna chu a tha thawkhat a. Lalpa hming lam theia kan awm hi a lawmawm tak zet a. Result chhiar hunah pawh lawm thiam turin i inbuatsaih ang u,” a ti.
Tuichang bial chungchang sawiin, a elpui lamah sum leh pai nasa chelek ni mah se, tling tura a inbeisei thu a sawi a. State sorkar siam tur pawhin MNF Party chuan majority a neih ngei a rin thu a sawi bawk.
MNF sorkar hmalakna sawiin, “Kum 20 chuang kan buaipui tawh Bru raltlante chu Tripura-ah dah ngheh an ni a. Ramri chungchangah pawh kan Chief Minister hi a huai a ni. Tunah chuan silai ni lovin dawhkana chingfel turin kan inrem thei ta,” tiin Assam border chungchang a sawi a. Assam Rifles sawn phei chu a khirh lutuk a, Pu Laldenga interim sorkar hunlai atanga hmalak a ni tawh thu a sawi.
Pu Tawnluia chuan MNF leadership chungchang a sawi a. “Pu Laldenga awm loh hnuah Pu Zoramthanga’n min hruai a. Party chhungah vawi khat chu amah challenge-tu vangin vote kan thlak a (vote sang chuangin a hneh). Kha bak kha vote thlakin hruaitu kan thlang leh tawh ngai lo. Kan president hi Pathian tih mi leh tawngtai mi a ni a. Mahni inthunun thei, mi taima leh huaisen a ni a. Tin, hmachhawp nei mi – ‘a man of vision’ a ni. Hmalam hun kum 10/20 thlirin min kaihruai thin.
“Tuna ministry a kaihhruainaah pawh mipuiah anti-incumbency (sorkar lai thlak duhna) lian tak a awm lo hi a lawmawm hle a. Mizo nationalism keng nungtute hi mipuiten kan kutah sorkarna an dah leh ngei dawn a ni, a ti bawk.
Hnam Run inkhawmah hian MNF MLA Candidate – Dr. ZR Thiamsanga (Champhai N), Pu K. Vanlalvena (Azl S-I), Pu R. Lalzirliana (Azl N-I), Er. K. Lalsawmvela (Azl W-III), Pu Lalmalsawma Zasai (Siaha AC) leh Pu J. Malsawmzuala Vanchhawng (Serchhip AC)-te pawhin chak ngei tura an inrin thu an sawi theuh bawk a ni.
Inkhawm hi Dr. ZR Thiamsanga, MLA & Adviser (MNF GHQ)-in a kaihruai a. Dr. H. Lallenmawia, Adviser (MNF GHQ)-in hunserh a hmang bawk a ni.
Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/917
Dt. 13.11.2023