Mizo National front
General Headquarters
Mizoram : Aizawl
PRESS RELEASE
Dy CM IN A DEPT HMASAWNNA LEHKHABU A TLANGZARH
Vawiin ni 12.05.2023 zirtawpni chawhnu khan Dy. Chief Minister leh MNF Sr. Vice President Pu Tawnluia chuan press mite hmaah a department chanpual hmasawnna hnathawh tarlanna lehkhabu a tlangzarh a. Kum li chhungin a department chanah hmasawnna tam tak a awm tih a sawi.
Dy CM Office chamber-a tlangzarh inkhawmah hian Pu Tawnluia chuan MNF sorkarah hmasawnna lian tham anga lang lo MR regularize-na tur te, medical hamthatna leh an leave pawh mumal taka siam te, Provisional Employee tiin an hlawh pawh kum tin 4% zela pung chhoh tur a nih thu te; Administrative Training Institute (ATI) pawh nasa taka thuam changtlun a ni a, sorkar hnathawk gazetted officer chinte kumtluana training pek an nih thu leh Group B chin hna latu, Mizoram Sectretariat Service Selection Board (MSSSB) din a nih dante a sawi.
“PHE hnuaiah JJM Scheme chu tluang takin a kal a. He project hnuaiah hian thingtlang chhungkaw tin hnenah tui connection pek tum a ni a, tunah hian tam tak pek an ni tawh a. Solar pumping hmanga pek an ni. Aizawl chhim tlangdung chawmtu tur Tawi tlang atanga tuilak hna kalpui mek pawh covid awm lo sela chuan kan commission tawh ang,” a ti.
Pu Tawnluia chuan: “Aizawl chawmtu tur GAWSS Phase-III – Setlak lui 37 MLD (Ni tin tui litre nuai 370) pawh trial run hmabak a nih thu leh hei hi a puitlin hunah chuan Aizawl khawpui a chawm hneh hle ang. District khawpui tin kan ngai pawimawha an dinhmun pawh a ziaawm hle,” a ti a. “Urban development hmalakna hnuaiah a theih chin chinah project lian pui pui kan khawih a. AMRUT-II kalpui a nih bakah Smart City hnuaiah project lian tam tak lungphum kan phum tawh a ni,” a ti.
Vawiina lehkhabu tlangzarh ‘MNF Sorkar Dy. Chief Minister Pu Tawnluia Dept Hmasawnna’ tih hi Media & Publicity Department, MNF General Hqrs. buatsaih a ni a. Inkhawm hi Pu VL Krosshnehzova, GS (Media & Publicity, MNF Gen Hqrs)-in a kaihruai a ni.
Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/701
Dt. 12.05.2023