Mizo National Front
General Headquarters
Mizoram : Aizawl
Press Release
DR.THANGTEA’N S.VANLAIPHAI PHC TLAWHIN, DARZO-AH EDUCATION AWARENESS CAMPAIGN A HMANPUI
CAPT.LALHLEIA MEMORIAL INTERVILLAGE BADMINTON TOURNAMENT HNAHTHIALAH A KHAR BAWK
Vawiin May ni 27, 2023 (Inrinni) zing kar hian Health Minister Dr.R.Lalthangliana chuan S.Vanlaiphai PHC a tlawh a, thawktuten mamawh hrang hrang an sawite chu ngaihthlak sakin, a tul ang zela hmalaksak an nih tur thu a sawi a, hospital-a damlote kan nan tangka fai a hlan. He Hospital hi Lawngtlai tlangdung leh Sangau lam te, a khaw chheh vel damloten an pan rawn ber anih avanga a dinhmun ehfiaha a tlawh ngei ngei ngai anih thu a sawi.
Vawiin hian Higher & Technical Education Minister Dr.R.Lalthangliana chuan Darzo Community Hall-ah ‘Quality on Education Awareness Campaign’, Samagra Shiksha, Hnahthial District huaihawta neih chu khuallian niin a hmanpui a. HSLC & HSSLC hlawhtling tharte lawmpuiin chawimawina thuziak a hlan nghal. A bial chhungah HSCL leh HSSLC-ah pass vekna school an awm nual chu lawmawm a tih thu a sawi a, pass tharte kal zelna turah duhsakna hlanin, pass zo ve ta lote beidawng mai lo turin a chah. MLA bial danga an la tih ngai loh, he lai bialah hian thiamna tak tak paw chhuak thei tura naupangte inchher chhoh dan tur zirtir a, mi thiamte sawma infuihna neiin, career guidance a buatsaih tur thu a sawi.
He lai bialah hian tun hma chuan India ram leh Mizoram huapa mi thiam IAS-te, Central Service-te, Science lama thiamna sang leh mi hmingthang tam tak an lo chhuak tawh thin a. Tunah erawh Central Service, All India Service leh Mizoram sorkarah mi pawimawh ni pha, mi thiam chhuak thar kan nei ngai ta lo a, kan inenfiah a ngai takzet a ni. Chutiang chiah chu kan chho phalo anih pawhin enga ti nge MCS, MPS leh Doctor thiam chhuak thar kan neih tak loh tiin, he lai tlangdung mai ni lo, Mizoram pumah chhawr tlak thiamna nei kan tlem tak em em tih hi ka zawhna a ni, a ti. Thlawhna khalh thei pawh thangtharah kan awm ta lo chu tan lak a tulzia sawiin, thiamna tak tak chhawr tlak nei turin zirtirtu, nu leh pa leh zirlaite harh thar a tul takzet thu a sawi.
Matric an zirlaiin current eng a la awm lo a, tlaivar thak, sam kang hmui chuai chuaia an beih nasat thin thu a sawi a. Tun laiah engkim a awlsam tawh a, heng awlsamna leh hahdamnate hi a ni lo zawnga hman chuan min pawt hniam theitu a ni a ti a. Tunlaiah hlawhtling tur chuan a pangngai ringawt ni lo, thiam filawr chin nih a ngaih ziah tawh chungchang kalkhawmte a hrilh.
He hun hi Pu Micky R.Lalenkawla, DEO & DPC, Samagra Shiksha Hnahthial District chuan a kaihruai a, Pu H.Vanlalsiama, Headmaster, Sawikunga H/S Darzo chuan hunserh a hmang.
Hemi hnu hian ‘Capt.Lalhleia Memorial Inter-Village & District Open Badminton Tournament, 2023 Hnahthial’ a neih chu khuallian niin a kharna hun a hmanpui leh a. He hun hi Zofa Run, Hnahthialah hman a ni a, Aizawl atangin Ex-MNA hruaitu engemaw zatin an hmanpui. Bialtu MLA Dr.R.Lalthangliana chuan Hnam sipai Capt.Lalhleia tournament hmangtu zawng zawng chungah lawmthu sawiin, Aizawl atanga EX-MNA leh a thawhpuiten hnam sipai ram tana boral ta hriatrengna hun an hmanpui avanga a lawm takzet thu a sawi.
Dr.R.Lalthangliana chuan tun MNF term-ah hian inthlanna hrang hrangah MNF a chak zel dan sawiin, “Sinlung Hills Council-te leh MP Lok Sabha-ah te hnehna kan chang tawh a. Mizoram pum VC thlanah 76% hmuin hnehna sang tak kan chang a, Local Council-ah 85 awmah 76 hmuin hnehna kan chang a, LADC seat 25 awmah 20 kan hmu bawk. LMC-ah ZPM chu tifuh an inti ve deuh a, an inhampuar hma ta lutuk a, an mar pung mai a, MLA candidate engemaw zat an puang ve ngawt a, tunah chuan an dul leh hle tawh a ni,” a ti. Congress pawh an sual vang ni lovin an hun a la thleng rih lo. Tuna MNF MLA-te hi an bial theuhah an che thain an taima tlang em em vek a, MNF hi Pathian leh mipui zarah a sorkar leh ngei dawn a, Covid-te leh harsatna dang awm tawh lovin Mizoram tan nasa takin hna kan thawk dawn a ni, a ti bawk.
Sd/-
(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/719
Dt 27.05.2023