Mizo National Front
General Headquarters
Mizoram : Aizawl

PRESS RELEASE

DAM CHHUAHNA AWM CHHUN CHU NATIONALISM, KAN MARTARTE THISEN A HLU TULH TULH DAWN: Pu Zoramthanga

Vawiin ni 20.09.2023 Nilaini chawhma dar 11:30 khan Mizo Hnam Runah Martar Day hman a ni a. Thusawitu MNF President & Chief Minister Pu Zoramthanga chuan Mizo hnam damchhuahna awm chhun chu nationalism a ni, a ti.

Pu Zoramthanga chuan: “Israel-te pawh nationalism banga inhung tur an nih laiin an inhung phui zo lova hnam sawm an ral. Kum 2000 an vahvaih hnuah Juda leh Benjamin hnam tlem (Isarel)-te an dingchhuak a. Kum 1948 khan an nationalism-in a dinchhuahtir chauh a ni.

“Pathianin keini hnam tlem te pawh ram min pe a. Khawchhak atanga lo tla thlain ram, hnam leh lal thuthlung nen kan nationalism chu kum 1966-ah a lo tho ta a. Kum 20 chhung hnam thinlung thisena baptis-in a awm a. A tawpah kum 1986-ah inremna kan lo nei ta a ni.

“He hnam thinlung (nationalism) hi a rei tulh tulh a, hnam tlem zawk tan chuan a hlu tulh tulh a ni. Dam chhuahna awm chhun a ni. Kan chhehvel en ila nationalism tel lo chuan hnam engzat nge buai tawh? Kan hnam martarte thisen hlutna hi a rei tulh tulh anga kan hre tulh tulh dawn a ni,” a ti.

“He ram (Zoram) hi martarte thisena baptis a ni a. Kan hnam hi a ral tep thin, mahsela tling lo takin hnam thuthlung _‘Pathian leh kan ram tan’_ tih kengtuten harasatna karah an vuan tlat zel a, a rawn tho chhuak leh thin. MNF chu tuar tura din, harsatna su tura din a ni. Chutiang chuan ram an enkawl chuan a puitling thin.”

Pu Zoramthanga chuan B34 Gulmohar Park-ah remna palai tura Pu Denga leh Pu Tawna-te nen an kal thusawiin, Morarji Desaia sorkarin phatsanin tan ina an tantir thu a sawi a, “MNF hotuten India nen remna an siam tiin dawta min hek avangin ramhnuai hqrs lam chuan Pu Denga chu president leh primary member a nihna an paihsak hial. Tin, India sorkar chuan Pu Denga chu foreign-a Ambassador ni turin an thlem a, kei pawh IAS confer tur leh Pu Tawna Sipaiah an thlem. Amaherawhchu kan dinna kan sawn chhin lo, tlanchhuah dan chiah kan ngaihtuah,” a ti.

“MNF hi a san lai leh chhiat em em lai a awm. Mahse martarte thisenin a suk fai puan sintute kan ni a, mawina leh malsawmna kengtute kan ni a. Kawng dang hawi thei kan ni lo. Harsatna leh lungngaihna karah tap chungin kan kal zel ang, a tawpah Pathianin malsawmna min pe ngei ang.”

Tunlai politics boruak sawiin: “MNF chu chhia zawng zawng min bel a. Congress, PC leh Union sorkar-te pawh chhe hlawm vek angin an chhuah thin. Thangtharte rilruah dik lo takin zirtirna an kalpui a, mite an fuihpawrh bawk a. Amaherawhchu, a sut turin Pathianin ‘thil thleng’ a rawn thlentir zel a ni.

“Keini chiah kan tha, kalphung thar nen an tih laiin, candidate tur an lo infawm hnem lutuk a, an lo tiam tam lutuka an buai ta vek a nih hi. An hotute chu an chief minister kal vut vut tawh a. A lo thlen hma pawh hian kan zo lo nghal a ni,” a ti.

Chief Minister chuan: “Kan sorkarah buaina – ramri buaina, hripui, vawk hri, raltlan nen, heng zawng zawngah hian kan thiam vang pawh ni lovin Pathianin min pui thin,” a ti a. “Thisenin kum tam nationalism kan lo buaipui tawhna zarah South East Asia huapin Zoram remna ang hi a awm lo. Bangladesh, Burma, Manipur, Nagaland, Meghalaya-te pawhin in remna ang hi kan duh ve an rawn ti vek a ni.

“Party thar zing em emte hian nasa takin min bei mah se, pawm lama kan unaute chuan kan hnam nationalism hi an rawn en a, tha an ti vek mai. MNF hi sorkar leh turin an duh vek. MNF a sorkar leh loh chuan kan tan a pawi, an ti. Lak tlak loh khawpa min chhuahtute hian nationalism hi min chhuhsak thei lo. Pawn lama kan unaute chuan Bangladesh, Burma, Tripura, Manipur atangin martarte thisena puan sufaite an rawn en a, MNF a sorkar loh hi keini aiin an hlau zawk.

“MNF chu hrehawm nasa tak tuartu a ni a, kan thuthlung meichher – _Pathian leh kan ram tan_ tih nghet taka kan vawn tlatna hi felnaa ruat a ni. Midangte tana ding turin Lalpan Zoram leh kan chhehvel unaute hi a chhanchhuak zel dawn a ni,” tiin chhel taka ding tlat turin party mipuite a sawm a ni.

He hunah hian MNF Presdent Pu Zoramthanga chuan Congress hruaitu hlun – Pu PC Lalthanzuala, Mamit chu MNF-ah a lawmlut bawk a. Lawmluh thar Pu Thanzuala pawhin thusawiin Mamit District-a bial pathum – Dampa, Hachhek leh Mamit constituency-te chu MNF tan bial him a nih thu leh a hnungah MNF-a lut tur mi tam tak an la awm tih a sawi bawk.

Martar Day program hi MNF Vice President Pu Vanlalzawma’n a kaihruai a. Commr. Lalkiamlova’n hunserh a hmang a. Martarte sunna hun hman a ni bawk.

Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/846
Dt. 20.09.2023