Mizo National Front
General Headquarters
Mizoram : Aizawl
Press Release
COMMERCE & INDUSTRY MINISTER-IN ZOKHAWTHAR LAND CUSTOM STATION HNATHAWH MEK TLAWH /H & TE MINISTER-IN GOVT. CHAMPHAI COLLEGE-A COMMERCE BUILDING HAWNG
Vawiin April ni 27th, 2023 (Ningani) zing hian Commerce & Industry Minister Dr.R.Lalthangliana chuan Zokhawthara SASCI sum hmanga hnathawh mek ‘Inftrastructure Development for border trade facilities/Land Custom Station’ chu a tlawh a. He hna hi Lushai Engineers-ten cheng vaibelchhe 15 senga an thawh a ni. “Zokhawthar hi a tirah mi tlemte chauh an awm a, tunah chuan khawpui a ni ta. Kum 1998-2008 inkar, Pu Zoramthanga kaihhruai sorkar hnuaia khaw lian anih theihna tura kan din leh hma kan lak a ni a, a dintu chuan a enkawl zui zel ang che u,” a ti.
Commerce & Industry Minister chuan India ram hmun hrang hranga border trade 25 chauha hmalak tur zingah Zokhawthar leh Zorinpui tihchangtlunna tur, a hma daiha hma a lo lak tawh chu tel vein nimin piah lawka New Delhi-ah Land Ports Authority of India Chairman, Pu Mishra nen an inkawm khan a thlen thu a sawi a. Pu Mishra chuan DPR an lo siam nghal tur thu hrilhin, hei hi Prime Minister Office pawhin an thukhawm hnuhnung bera an ngaih pawimawhzia thu amah chu a lo hrilh tih a sawi. ‘Hei hian Land Custom mai ni lo, Integrated Check Post a kentel ka ring,” a ti. Kawrpuichhuah integrated check post rang taka kalpui dan tur a sawi pui bawk thu sawiin, he ta tan hian cheng vaibelchhe 552 zet Home Ministry-ah a hmaa a lo thlen tawh thin chu a thlen nawn leh tih a sawi a. Pu Mishra chuan pawisa chu sanction nghal mek anih thu a lo hrilh tih a sawi bawk.
Bialtu MLA Pu TJ.Lalnuntluanga, Law Minister pawhin thusawiin, Zokhawtharah hian Land Custom Station chauh ni lo, Integrated Check Post changtlung tak an mamawh thu te, he lai hmun hi bungraw man tlawmna hmuna siam an duh thu te, Zoram hmun hrang hrang atanga bazarna hmunpui atan siam an duh thu a sawi. Zokhawthar hi chenna in 1000 lai awmna hmun anih avangin PHC tha leh khelmual tha an mamawh thu a sawi bawk. India leh Myanmar inkalpawhna tur Zokhawthar leh Khawmawi inkar lei hi Bailey Bridge satliah ni lo, PWD atanga cement concrete a siam tura hma an lak mek thu a sawi a bawk.
Vawiin chawhma hian Government Champhai College-a Commerce building chu H & TE Minister Dr.R.Lalthangliana’n a hawng. Hawnna inkhawm College Multipurpose Hall-ah khualzahawm Law Minister Pu TJ.Lalnuntliluanga leh Dr.ZR.Thiamsanga MLA-te pawhin thu an sawi. He hun hi Dr.Zarzoliana, ASDP (RUSA) chuan a kaihruai a, Rev.C.Lalchhuanawma’n hunserh a hmang. He building hi component 9 (RUSA 2.0), infrastructure grants to college atanga cheng nuai 100 senga Sky Ridge Construction & Consultancy Services, Aizawl-ten an sak a ni. Floor thum awmin room hrang hrang 13 a awm a ni.
Khuallian Dr.R.Lalthangliana chuan Champhai khawpui hi Myanmar nena kan inrini khawpui anih avanga Mizoram tan District khawpui pawimawh tak anih thu a sawi a. Tunlaiah sorkar hna ringawt ni lo, India leh khawvelah non-government organisation/company hrang hrangah eizawnna tling hnathawh tur a tam tawh tih sawiin; vawina hawn tak commerce building pawh a tangkai ngei ang tih kalkhawmte a hrilh a. “Building tha neih ringawt hi a tawk lo a, zir thiamna tak tak nei thei turin tan la zel ang che u. NAAC team lokal thin ho hi an hlauhawm loh, chona leh phurna siamtuah lo hmang ang che u. He College hian A plus grade hmu ngei turin chona lian tak ka pe che u a ni. Tun lai khawvel zirnaah a thiam pangngai nih ringawt a tawk lo a, a pangngai nih ringawt hi thawk tak tak turin an tling pha tawh lo. A thiam fal nih a ngai zel tawh. Kan awmna leh khawchhuahna background hian min tihnual lo se, khawi hmun atang pawhin a tum tak tak tan chuan Mizoram, India leh khawvelah a a ber a hauh theih tih hriain, zirlaiten tan la sauh sauh ang che u. Tum tak tak tan theihloh a awm lo, a theih vek a ni. Tun atanga reiloteah Champhai atang hian Civil Services emaw, a tlukpui leh aia sang thiamna nei engemaw zat rawn chhuak ngei ngei rawh u. Eng subject-ah pawh thawkrimte tan hlawhtlinna a awm zel a ni,” a ti bawk.
Vawiin chawhnu hian Minister hian Hnahlanah PHC chu a tlawh leh nghal a, an mamawh hrang hrangte enin, a tul ang zela building, quarters leh thawktute pawh ngaihtuahsak an la nih tur thu a sawi.
Minister hi Pi Esther Lalruatkimi, Principal Secretary, H & FW, H & TE; Dr.PC.Lalramliana, Principal Director, H & FW; Pi Sangchhin Chinzah Director, H & TE; Dr.Vanlalsawma Director, DHS; Dr.Lalmalsawmi Sailo, Director H & ME; Dr.Eric Zomawia, MD, NHM; Pi Lalsangpuii, Adll Director C & I (Commerce Dept); Dr.Zarzoliana, Addl Director, SPD, RUSA; Pu Lalfakzuala, Sr.EE, H & FW leh official dangten an tawiawm a. Dr.Lalrinchhana, DC Champhai, Pu Rinpuia SP Champhai leh official dangten Champhai atangin an lo tawiawm bawk.
Sd/-
(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/04/2023/677
Dt.27.04.2023