Mizo National Front
General Headquarters
Mizoram : Aizawl

Press Release

CHIEF MINISTER PU ZORAMTHANGA, MNF PARTY PRESIDENT-IN MNF AIZAWL SOUTH-I BLOCK CONFERENCE A HMANPUI

Nimin September ni 28, 2023 khan Mizo National Front Aizawl South-I Block Conference, YMA Hall, Bethlehem Vengthlanga neih chu MNF Party President Pu Zoramthanga, Chief Minister chuan khuallian niin a hmanpui a. Pu K. Vanlalvena, Rajya Sabha MP; Aizawl South-I Constituency-a MNF Party Candidate tur chu khual thlengtu a ni. MNF Aizawl South-I Block Conference-ah hian MNF Party zawmtu mi thar duhawm tak tak, Congress aṭangin mi 345, ZPM aṭangin mi 170, Neutral aṭangin mi 458 leh BJP aṭangin mi 1; an vaiin mi 974 te chu Pu Zoramthanga, MNF President-in a lawmlut nghal bawk.

He huna khuallian Pu Zoramthanga, MNF President chuan thu sawiin, Aizawl South-I bialin MNF party aṭanga candidate an neih ṭhatzia leh MNF Party-ah pawh mi ṭha leh mi chak zinga mi, mi viak ṭha tak an dintir dawn tih a sawi a; Aizawl South-I mipuite chu MNF Candidate lo thlang tling ngei turin a ngen a ni. Pu Zoramthanga chuan, MNF opponent lian ber Congress chu an term a tawp thawkhat tawh tih sawiin, central leh state-ah an tlahniam hle a, inthlan dawt lehah an dinna tur bialah pawisa dah kham dawn ta ila, kan dah huai ngam lo khawp ang, a ti a; artelukawn thei dinhmunah an awm mek a ni, a ti.

MNF Party President chuan ZPM chungchang pawh sawiin, Lunglei Municipal Council election leh by-election ṭhenkhatah chakna changin an han sang deuh a, an kalphung buai avangin tunah chuan an hniam raih raih tawh a ni, a ti a; ZPM chu party politics duh lova movement tih hming pua bul rawn ṭanin, politics boxing ring chhung an luh hnuah an tum dan leh kalphung an thlak leh tawh a, Election Commission of India ah party recognition an dil a, an duh loh an luak hnu kha an rawn ei leh vek tawh a ni,” a ti a. ZPM kalphung thar sawi chu mipuiin an hrechiang tulh tulh a, party dang angin organisation ṭha, rorelna fel leh mumal an neih loh rah a rawn lang a, an boruak a hniam tulh tulh tih sawiin, inthlanpui lo awm turah Sorkarna siam tur khawp MLA an neih a rin loh thu a sawi bawk a ni.

ZPM chuan Sorkarna lo siam tawhtute zawng zawng chu hmasawnna hna thawk lo leh chhe ta veka puhin beidawnna ruamah Zoram hi dah vek an tum a ni, Pu Zoramthanga chuan a ti a. ZPM leader-in ‘Chakma vote kan mamawh lo’ tih thu a sawi leh, a hnuah CADC-ah Unit an va din leh si dan tarlangin ZPM leader chuan sawi awm loh tak a sawi ṭhin a ni, a ti.

Pu Zoramthanga, MNF President chuan MNF chu a din tirh aṭangin rinawm takin a dinna ngaiah kum 60 chuang nghet taka ding tlat a nih thu leh dinhmun sawh sawn ve mai mai ngailo party a nih thu a sawi a. Harsatna tam tak paltlanga Pathianin a lo hruai chhuah tawh MNF Party hi Mizoramin a tawh mek harsatna period aṭangin Pathianin min hruai chhuak dawn a, malsawmna period-ah, hunin a finfiah tawh MNF Party hi Pathian leh mipui zarah Mizoram hmasawnna nasa zawk thlentir turin Pathianin min Sorkar-tir leh ngei dawn a ni, Pu Zoramthanga chuan a ti.

Khual thlengtu Pu K. Vanlalvena, MP(RS) pawhin thu sawiin, MNF Sorkar chuan kan ram leh hnam himna tiderthawng thei thil reng reng chu India rorelna sanga pass pawh ni se Mizoramah hman a nih ve ngai dawn lo tih a sawi a. Mizoram pawna awm kan unau harsatna tawkte lo ṭanpui zel tur leh Zofate tana ding turin MNF hi a sorkar leh ngei ang tih hi a rinhlehawm loh a ni, a ti. Pu K. Vena chuan, “Vawiin hian MP ka nihna anga thu sawi lovin Aizawl South-I MNF Official Candidate ka nihna angin thu ka sawi a; MNF Party chuan a din tirh aṭang rengin Zofate insuihkhawm lehna hi a thupui ber a ni a, keini Zofate ṭhendarha awmte hi kan lo insuihkhawm lehna turin Pathianin ruahmanna min chhawpchhuah sak zel niin a lang ṭan a, Zofate ṭhendarha awm te hi kan insuihkhawm leh ngei hi ka ring tlat a ni,” a ti.

Aizawl South-I Block Conference-ah hian resolution pathum (3) an pass a. “Mizoram Chief Minister Pu Zoramthanga kaihhruai MNF Sorkar hi ṭha kan tiin kan ring tawk a, kan thlawp tlat a ni” tih leh, ‘Harsatna tinreng karah CM Pu Zoramthanga kaihhruai MNF Sorkarin hmasawnna hna tam tak, lian tham tak tak a thawk reng thei te, khawvel leh India ramin sum leh paiah harsatna a tawk chunga SEDP a sem thei leh tun thlenga sem a la ni zel hi lawmawm kan tiin ropui kan ti tak zet a ni” tih te bakah Aizawl South-I bial candidate atan Pu K. Vanlalvena, MP(RS) ruat a nih avanga lawmthu sawina te a tel a ni.

Pu H. Lalhlimpuia, Block President chuan Block Conference hi kaihruaiin, Upa Lalremsiama, Bethlehem Vengthlang Presbyterian Kohhran Upa chuan hunserh a hmang a. Block Conference-ah hian block huamchhunga party mite an kalkhawm ṭha hle a, Conference hun hlimawm leh hlawk tak an hmang a ni.

Sd/-
(THANGKIMA)
Secretary
Media & Publicity Department
Mizo National Front
Memo No.MNF/Media/04/2023/862
Dt 28.09.2023