Mizo National Front
General Headquarters
Mizoram : Aizawl

Press Release

CHIEF MINISTER-IN ‘ZARI JAIL DIARY’ A TLANGZARH

Zoramin zalenna a sual laia Sipaiin an man, damchhung lung in tang tura a chungthu rel Pi B Vanlalzari lehkhabu ziah ‘Zari Jail Diary’ chu vawiin hian Synod Conference Centre-ah Pu Zoramthanga Chief Minister, MNF president ni bawk chuan a tlangzarh.

Pu Zoramthanga chuan thusawiin, “Pi Zari tawrhna thlentu IGP kahhlum avang khan remna a awm theihna atana inbiakna a kal chak phah hle a. Mizote kan chakna, ngaih pawimawh kan ṭulna a rawn hringchhuak ta a ni. Mi tam tak thihna, nunna an hlanna, fahrah leh hmeithaia tam tak an awm phahna, zalenna sualnain a hrin chhuah remna ropui zia hi kan chhut ṭhin tur a ni. Hetianga inremna ṭha leh hlawhtling hi Asia hmun dangah awm kan hre lo. Pathianin he ram tana rahṭha ti chhuak tur hian thil hrang hrang a remkhawm a ni,” a ti.

Chief Minister chuan, “Pathianin entawntlak remna min pek chhan hi thil tum ropui a nei a ni. Mizote anga ram khat mumal taka luah, ṭawng khat hmang tam, sakhaw khat bia, Pathianin harhtharna a pek zin ber, population ration-a missionary tirchuuak tam ber hnam hi Pathianin hetianga min dah chhan hi a nei a. Pathianin a chanchinṭha hril tura min chhawpchhuahna hi a ropui a ni. Pathianin remna min pek chhan, min humhim chhan, hetianga min din chhan hi hun hnuhnunga chanchinṭha hril tura min dah vang a ni,” a ti.

Dr R Lalthangliana Health Minister pawhin thusawiin, Pi B Vanlalzari case neih lai leh Jail tan lai hi MSU Shillong President a nih lai a nih thu a sawi a. “Pi B Vanlalzari Jail tang la chhuak tur hian zirlai pawlin theih tawp kan chhuah a, Mizoram lamah te kalin donation kan khawn a. Chumi aṭanga pawisa kan hmuhchhuah chu hmangin Supreme Court lamah thu kan thlen ta a ni. A thubuai ngaihtuah a ni a, parole-a chhuah an phalsak ta a ni,” a ti.

Dr Thangtea chuan, “He lehkhabu vawiina kan tlangzarh hi a danglam em em a, Zofa hmun hrang hranga chengte hnam rilru leh hnam hmangaihna min put tirtu nise ka duh hle a ni. A ni anga sawisak tuara hreawm taka tan tir hi an awm ka ring lo. He lehkhabu hi Zofate inpumkhatna leh nationalism tuh thartu nise ka duh hle a ni. Ram hmangaihna avanga nunna chan martar te leh kha hun thima mi hrang hrangin kan tawrhna kha hrechhuakin, Zofate inpumkhatna hring chhuak se ka va duh em. Pathianin ram min pe a, duh dan a nei ang. He hnam tana luangkhawm a, dingchhuak tur kan ni. Hnam tana tuar tawh zawng zawngte tuarna kha nationalism thinlung min put tirtu ni se ka duh hle a ni,” a ti bawk.

He lehkhabu ziaktu Pi B Vanlalzari pawhin thusawiin, Jail-a a tan chhung zawnga Pathianin a hruaina chu lawmawm a tih thu a sawi a. “Ram min pe a, hnam min petu Pathian chungah lawmthu ka sawi a, ka thisen tlemte ram leh hnam tana a far ve thei kha lawmawm ka ti a ni. Pathianin ram leh hnam min pe a, he ram tana rinawm taka kan awm hi kan tih tur a ni. Tu emaw Party tana tuar ka ni lo, Mizo hnam tan ka tuar a ni, tih hi ka pawm dan a ni a, Mizo hnam tan tih hi ka nunpui ber a ni. Kan hnam tana tuar theia ka awm hi Pathian hnenah lawmthu ka sawi a ni,” a ti.

‘Zari Jail Diary’ tlangzarhna inkhawm hi Prof. Rualkhuma Colney-in a kaihruai a, lehkhabu thlirlawkna hun Lalhruaitluanga Chawngte-in thlirlawkna hun a hmang a ni.

Sd/-LALLENMAWIA JONGTE
Secretary
Media & Publicity Dept.
Mizo National Front
Memo No.MNF Media/02/2021/460
Dt.02.06.2022.