PRESS STATEMENT
June 24. 06.2023)
Chief Minister chhuanawm tak kan nei
Mi thenkhatin hnathawk mang lo, engmah ti lo ang hialah he sorkar hi an chhuah fo a. Kan Chief Minister Pu Zoramthanga kaihhruaina hnuaiah hian hripui rapthlak tak leng leh harsatna hrang hrangin min tlakbuak karah nasa takin he sorkar hian hmasawnna hna a thawk mek zel a. MNF sorkar hi mahni thiltih that puan chhuah leh infak lam uar lo tak, mipuite tana ngawi renga hnathawk mawlh mawlh mai thin a ni a. Hetiang a nih avang hian party thenkhatin hnathawk mang lo anga sorkar an puhna hi awih tawk an lo awm thin a. Tun tumah hian Mizoram Chief Minister Pu Zoramthanga hmalakna thenkhat tlem a zawng chauh han puanchhuah kan tum a ni.
Mizoram Chief Minister zahawm tak Pu Zoramthanga hmalakna avang liau liauin Union Budget-ah Aizawl Bypass Road Cheng Vbc 500 leh Bamboo Link Road Cheng Vbc 100 dah a ni a. Union budget-a Mizoram hming a hranpa meuha a lang ve ta hi kan Chief Minister zahawm tak hmalakna liau liau a ni a, a ropui kan tiin chhuanawm kan ti hle a. Hei bakah hian leiverh lian tham tak 2.40 KM, Sairang chhak Kurung lui kanin Rangvamual epah Twin Tunnel (9m ve ve) – Bawngkawn Brigade ruam – Muthi ruam – Tuirial Airfield – Seling thlen hmaa chhuak turin buaipui mek a ni a. Hemi kawng hi tender tawh a ni a, tunnel bik hi DPR final tep a ni tawh bawk a ni.
District pathum MNF sorkar hmasaa pek tawh chu sorkar hmasa khan kum 10 chhungin a tihlawhtling duh lo a, 2018-a MNF sorkar a lo din leh khan Saitual, Khawzawl leh Hnahthial-ah hian District tihpuitlin nghal a ni a. Tunah hian tha takin hna an thawk mup mup tawh a, hna thar tam tak thalai tan a siam bakah mipuiin an chhawr tangkai hle a ni.
Kum 2000 kum tira Peace Bonus Rs 182.50 crs Non Plan head-a Finance Ministry atanga CM Pu Zoramthanga’n a sawichhuakte kha thil mak a ni a. Niminpiah maiah pawh SASCI Part I 2023 – 2024 hnuaiah Chief Minister ngennain, Union Finance Secretary chuan cheng nuai 20,000 Mizoram pek belh a nih tur thu, Pu Robert Romawia Royte Minister hnenah a lo sawi bawk a ni.
Kan Chief Minister Pu Zoramthanga hi India sorkar mai ni lo khawvel pawhin hruaitu tha leh rintlakah a ngai a, remna palai atan pawh vawi tam tak hman a lo ni tawh bawk a ni.
PWD bika CM hmalakna te i lo thlir thuak thuak teh ang:
SEDP, PMGSY, SASCE, SASCI, NABARD, CRIF, NEC, World Bank leh Asian Development Bank fund hmangin cheng vbc 50 chung lam hnathawh ringawt pawh hi paruk a awm a. Kawng siam (strengthening, re-design, repair & rehabilitation) thawh zawh tawh 6 a awm a, kawng siam (construction & maintenance, improvement & upgradation, strengthening, widening, patch repair, re-surfacing etc) thawh zawh tawh, kawng thui tham tak tak 110 chuang a awm a. PWD enkawlna hnuaiah ringawt pawh Building rotling tham 78 chuang sak zawh tawh a ni.
Agriculture links road SASCI hnuaiah km 47 laih a ni tawh a, khelmual 25 laih mek leh laih zawh tawh awmin, futsal ground 8 siam a ni a. Volleyball/Basketball Court 13 siam niin, women centre, market shed, community centre 28 sak a ni tawh a, vantlang inthiarna leh waiting shed ringawt pawh 64 siam a ni. Hei bakah hian lei (Bridge) 17 dawh mek leh dawh zawh tawh a awm bawk a, heng leite hi a then phei chu sei tak takte a ni hlawm a ni.
Heng kan han tarlan bakah hian, pavement, tuiluankawr, retaining wall, culvert leh road safety thahnem tak siam a ni bawk a ni. Heng kan han tarlante hi PWD enkawlna hnuaia mite chauh an ni.
Heng hmasawnna hnathawhte hi a chipchhiara tarlang tur chuan bu chhah fe mai daih a ni a, tarlan mai a remchang lo hial zawk a ni. Kan han tarlan takte hi PWD bik hnuaia 2019 atanga 2023 chhunga sorkar hnathawhte a ni a, a tam tham deuh avangin tarlan hmaih palh pawh a awm thei a ni.
PWD Minister ni a nasa taka hma a lak avangin, kan Chief Minister Pu Zoramthanga zarah Zoram dung leh vangah kawng tha kan nei ta mek hi a lawmawm tak zet a. Inkalpawhna kawng lo tha ta avang hian mipuiin awlsamna nasa tak kan neih bakah sum leh tha kan hum (save) nasa hle a ni.
Chief Minister thawk rim, taima, nationalist leh vision nei tha, a taka hnathawk mi, sawichhiat leh elrel nasa tak a tawk chung pawha chhang ve ngai lo, Pu Zoramthanga Zoramin kan nei hi kan chhuang tak zet a. A kaihhruaina hnuaia Mizoram hmasawnna lo lang zel hi a lawmawm kan ti tak zet a ni.
Pathian leh mipuite duhsakna changin kum 2023 General Election lo awm turah pawh hian hnehna sang tak, kan Chief Minister Pu Zoramthanga ho hian kan chan ngei kan ring tlat a ni.
Issued by
Media & Publicity Department
MNF, General Headquarters, Mizoram; Aizawl