MNF Manifesto ah hian a thing kan ring lova, chhunzawm zel tur kan dahnawn nual a ni zawk – Prof. F. Lalnunmawia

Mizo National Front
General Headquarters
Mizoram : Aizawl

Press Release

MNF Manifesto ah hian a thing kan ring lova, chhunzawm zel tur kan dahnawn nual a ni zawk – Prof. F. Lalnunmawia

Vawiin October ni 20, 2023 (Zirtawpni) hian Mizo Hnamrun chhung inkhawm neih a ni a. Hun hnihnaah 2023 General Election MNF Manifesto tlangzarhna hun hman a ni a. Manifesto hi, MNF Vice President, Pu Vanlalzawma, Ex. MP in a tlangzarh a. ZPM Gen. Hqrs hruaitu ni thin, Pute Liandawla, Ex. Secretary i/c Minorities, C. Laltanpuia, Ex Secretary, Vanlalzuala, Ex Organiser chu MNF ah a lawmlut bawk. He hunah hian Prof. F. Lalnunmawia, Adviser, MNF Gen. Hqrs. Aizawl S-lll MNF official candidate hnen atangin manifesto sawifiahna leh thusawi ngaihthlak a ni bawk a. Prof. Mawitea chuan, “MNF Election Manifesto 2023 ah hian 2018 ami kan dahnawn te hi, a thing kan ring a ni lova, kan tih hlawhtlin tawh kan sorkar leh huna kan chhunzawm zel tur kan dahnawn leh a ni, “a ti.

Prof. Mawtea chuan, party hrang hrangten manifesto kan tlangzarh ta theuh a. Heng zingah hian MNF manifesto a tha ber. Mipui huap sorkar tha, kuthnathawktu, infiammi leh thalaite khai chhuak tu tur manifesto kan duang a ni. Kum 2018 manifesto hi kan tihlawhtling deuhvek a. Ramri, infrastructure, ei leh bara intodelh chungchangte, kan unau khawvel hmun hrang hranga awmte kuahkhawm chungchangah te pawh kan hlawhtling. Heng bakah pawh manifesto tihhlawhtlin tamtak kan nei a. Heng kan tihhlawhtlin te hi tawpsan mai theih a nilo a, chhunzawm zel tur, tiin kan dah nawn a ni.

Youth oriented SEDP hnuaia thalai angaihna hria leh thiam tak tak te tan, entrepreneurship ah leh business lama khai chhuah an nih theihnan ruahmanna siamthar a ni a. Oil leh gas dahkhawlna tur leh nitin mamawh kan hnianghnar lehzualna atan ruahmanna siamthar a ni. Mizoram chhimlam hmasawn zelna atan pawh ruahmanna fel tak dah a ni bawk. Zirna kawngah te, kuthnathawktute leh mi harsate khai chhuahna tur scheme pawh kan manifesto ah hian kan dah a. Infiammite hamthatna tur leh hriselna kawnga hmasawnna atana ruahmanna siam a ni. Heng bakah hian ram leh hnam hmasawnna tur tam taka ruahmanna siam a ni, a ti.

MNF Adviser chuan, ZPM manifesto chu nikum lama tlangzarh tawh ni mah se, sawizui a hlawh lemlo. An SDRP chu a lár lo hle a. An tlangaupui ber, mipui sorkar sorkar tha an tih chu, an sorkar khalhngil tur bera an sawi, VUC chungchang 2018-a an sawitam ber chu kum 2023 manifesto ah an telh leh lawi silo a. An ngaih pawimawh ber thailan a nilo hi a mak hle a ni. VUC hi a function theilo tih a chiang hle. Congress hoin tang puihna an tih chu tang ve theilo, hrisello leh bawrhsawm te tan a phurawmlo hle ang. An miten sorkar an inringlo va, MNF vote an tum thup mai a ni. MNF in a nitelin hmasawnna a hmu zel a. Nitinin zawmbelhtu kan nei zel a ni. Kumtina kan buai thinna, Bru pem tawhte vote Mizoram roll atanga thaibo annih ta te hi a chhinchhiahtlak hle a ni, a ti bawk.

Lawmluh te atanga thusawitu, Pu C. Laltanpuia, Ex Secretary ZPM Gen. Hqrs chuan, ZPM ah thil mak deuh deuh a thleng thin a. Committee minute anglo deuhin circular a chhuak fo thin. MNF erawh chu, party ngialnghet a ni a, President Pu Zoramthanga’n thu a sawi chuan an rual thap zel a. Lawm takin MNF ah kan lut a ni, a ti. Mizo hnamrun chhung inkhawm hi Pu C. Lalzamlova, Adviser,MNF Gen. Hqrs chuan a kaihruai a. Pu Dawngliana (MCS Rtd.) Adviser, MNF Gen. Hqrs chuan hunserh a hmang a ni.

Sd/- (PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/895 Dt.20.10.2023

KHAWVEL LEH MIZO HNAM A INSINGSAK MEK LAI A NI A, IN ENCHHIN HUN A NI LO: LALRUATKIMA

Mizo National Front
General Headquarters
Mizoram : Aizawl

Press Release

KHAWVEL LEH MIZO HNAM A INSINGSAK MEK LAI A NI A, IN ENCHHIN HUN A NI LO: LALRUATKIMA
Vawiin hian Aizawl West II Dinthar MNF Unit I Campaign office hawnna hun hman a ni a. He hunah hian MNF official candidate Pu Lalruatkima chuan thu a sawi a. “Khawvel a insingsa mek a, kan hnam Mizo ngei pawh a insingsa mek a ni. Buaina hrang hrangin Zofate min chim mek a, Myanmar rama Zofate an buai a, Manipur an buai a, Bangladesh an buai a. Hnam insing sak lai, hun harsa a tawh lai hi in enchhin hun a ni lo. Pathian leh kan ram tana nghet taka ding, ram hmangaihna avanga martar te thisen nemngheh party hi a sorkar leh ngei Zofate tan a ṭulin a ṭul a. Nationalism meichher chhitute kan sorkar leh hi a ngai a ni,” a ti.
Pu Ruatkima chuan, “MNF sorkar hnuaiah hun harsa tak Zoramin kan hmachhawn a. Hripui leng, vawk pul hri, lirnghing, ramri buai leh kan unau raltlan te kan tawng a ni. Chuti chung chuan Pathian leh mipui zarah kan damkhawchhuak thei a. Kan damkhawchhuak thei a ni mai lo a, hmasawnna hna nasa takin kan thawk thei a ni. Hun ṭha loa ram hruai tura min ring tawktu Pathian hian, hun ṭhaa kan sorkar hi a remti em em ang, tih ka ring tlat a ni,” a ti bawk.
Aizawl West II MNF Candidate chuan, “Zirna hi hmasawnna hnuk a nih hriain kan ngai pawimawh em em a. Dinhmun sang zawkah sikul tam tak kan hlangkai a. Ṭhalaite’n ruihhlo buaipui lova infiamna leh hriselna lam an buaipui theih nan Sport lamah pawh hma kan la nasa em em a. Zirna leh sport hmangin ruihhlo do kan tum a ni,” a ti a. “Ṭhalaite intodelh nan leh kawng hrang hrangah hma an sawn theih nan, an khawvel thar din turin theih tawp kan chhuah zel dawn a ni,” a ti bawk.
“Sorkar hmasa lama an la tih theih loh ni za inhlawhnaah ni za kan inhlawh thei a. India rama Rural Development Department tiṭha ber dawttu kan ni theite hi Pathian malsawmna a ni. Kuthnathawktu leh harsa zawkte tan SEDP pawh kan sorkar leh chuan kan sem chhunzawm zel dawn a ni,” a ti bawk.
He inkhawm hi Pu Lalbiakthanga, Dinthar MNF Unit I President-in a kaihruai a ni.
Pu Lalruatkima hian Dt. 16.10.2023 zan khan Dinthar Unit III-ah voter 127 a lawmlut bawk a ni.
Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/04/2023/889
Dt 17.10.2023

DAN KALHA MLA NI RENG INDEPENDENT MLA 5-TE BANNA DAN ANG THLAP A NIH THU ZPM GENERAL SECRETARY-IN A PUANGZAR HI A LAWMAWM

Mizo National Front
General Headquarters
Mizoram : Aizawl

Press Release

DAN KALHA MLA NI RENG INDEPENDENT MLA 5-TE BANNA DAN ANG THLAP A NIH THU ZPM GENERAL SECRETARY-IN A PUANGZAR HI A LAWMAWM
ZPM General Secretary Eddy Zosangliana Colney-in ni 17.10.2023-a thuthar lakhawmtute a kawmna Paragraph 3-na, tlar 1-naah, “Heng MLA pangate hian Danin a phut anga MLA atanga banna thehlut an ni a,” a ti a, hei hian Independent MLA-5 te hi Dan kalha khawsa, banna thehluh ngai an nihzia a tichiang hle a ni. An Party GS ngeiin thudik a rawn puangzar hi a lawmawm kan ti hle a ni.
Hetihrual hian, Dan phut anga ban ngai si, Dan hmanga Pu Lalduhoma ban anih hnu khan enga tinge an ban ve mai loh? Ban tura nawr zui ngai lova ban nachang hre pha chin tura beisei an nih lai a, Independent MLA ni chunga ZPM Party Office-a kal reng, an party thiltihna zawng zawnga phusa, MLA hamthatna zawng zawng an hmuh zawh vek hnu a, Model Code of Conduct-in a phuar tak hnua bang ta chauh an ni hian, Dan kalha hamthatna dawngtu nih an hreh lohzia a pholang chiang hle a ni.
Kum 2018-ah pawl in din chawpin, Party Politics kan chhiatpui tiin, Party ding tawh sate nasa taka sawichhiain, ‘keini chu Party kan ni ve lova, Mipui pawl Movement kan ni’ an inti thin a, an thusawi awihtuten an candidate 7 lai an thlangtling a ni. Party an nih ve loh avanga duh taka thlangtling tute hriat lohin, Election Commission Of India-ah inziaklut turin dilna an thehlut a lo ni a. Kum 2019-ah Political party an nihsan ta a. Mipui pawl an nih avanga duh taka thlangtlingtute uire sanin India Danpui 10th Schedule kalhin Political Party an nih san ta a ni.
ZPM GS thusawi Para 7-na, tlar tawp pahnihah, “… anmahni leh party tan pawha him zawk nan Official takin ZMP Party Candidate ni turin banna an thehlut….” a tih hi thil dik tak niin, Independent MLA ni chunga ZPM Party Candidate nih hi thil rem lo, Nomination-a tlang lo tur an nih vang zawka bang an nihnate hi tarlang tel se, Dan kalha ZPM party-a inhmang char char an nihna pawh a pholang leh zual ngei ang.
MNF Manifesto leh Policy tihhlawhtlin kawnga hmalakna puang zar lo a min ngai hi, kan Minister zawng zawng ten an hnathawh puangzara hun an hmante hi a lo hrefuh lo nge ni, lo hawizau deuh thei tawh se, a duhawm ngawt mai.
A ruka Political Party nih tum ran chungin Mipui rilru hneh nan Party Politics an sawichhia a, inlawmluh, Unit din etc. te sawiselin an au chiam chiam a. An sawisel ngei chu an insawi loh ang zelin ZPM hian an luhchilh a, a uar ber berah an tang zui ta a ni. An Manifesto anga awm tura Independent MLA-te an beisei laiin, an thuneitu sang ber Val Upa Council (VUC) thu engahmah ngai loin, an thlantlinte hian MLA hlawhsang lain leh Motor thar an lei a, inti lal takin Designation Plate pawh an kalna apiang deuhthawah an tar nasa a ni.
Heng zawng zawng hi an kalphung thar zawrh a nih avangin, mipuiin an lakah rinhlelhna neiin, an bumna thanga lo awk tawhte pawh an talchhuak mek zel a. Tuna la tangkhang mekte pawh bum fina awmin Mizo hnam Party MNF-ah lo lawilut zel turin MNF chuan kan sawm tak meuh meuh a ni.
Sd/-
(F.LALBIAKZAMA)
Secretary
Media & Publicity Deptt
Mizo National Front
Memo No.MNF/Media/04/891
Dt.18.10.2023
AIZAWL SOUTH III MNF CAMPAIGN KICK OFF NEIH A NI

AIZAWL SOUTH III MNF CAMPAIGN KICK OFF NEIH A NI

Mizo National Front
General Headquarters
Mizoram : Aizawl

Press Release

AIZAWL SOUTH III MNF CAMPAIGN KICK OFF NEIH A NI
In biala Candidate te hi an awmna turah an awm em? An thawh tur thawk lovin thil dang an ti daih em tih uluk takin lo zir rawh u – Chuauzikpuii AMC Corporator
Vawiin ni 18 October 2023 (Nilaini) Dar 1:00 pm hian kum 2023 MLA General Election lo awm tura Aizawl South III MNF chuan Campaign Kick off Sialsukah ropui taka neih a ni.
He huna thusawitu AMC Corporator Pi Chuauzikpuii chuan,” Chhungkaw inrelbawlna ṭha aṭangin mi ṭha an chhuak ṭhin angin Mizoramah MNF Party inrelbawlna a ṭha ber a. Hei hi kan sorkar lehna chhan tur ṭha tak a ni,” a ti.
AMC Corporator chuan, “Vawiina in biala Candidate-te hi an awmna turah an awm em? An thawh tur thawk lovin thil dang an ti daih em tih uluk takin lo zir rawh u. Tin, Bial mipuiten lo chik ula ka duh em em bawk chu tuna in MLA, kan Candidate ni leh ta Pu Mawitea hi a candidate puite aia mahni mawhphurhna hlen ṭha ber a ni,” a ti a. Hneh taka MNF Official Candidate thlang tling leh turin Aizawl South III mipuite a sawm a ni.
Aizawl South III bialtu MLA leh Kum 2023 inthlan atana MNF Official Candidate Prof.F.Lalnunmawia pawn thusawiin, “Vawiinah Campaign Kick off programme hlawhtling taka kan nei thei hi a lawmawm hle a. Nimin lamah Party dangten bial pawn lam thlenga inchah khawmin hun an hmang tawh a. Keini chuan lan tam duh vangin bial pawn mi kan chahlut ve lo a. Bial chhung mi ngei heti zat kan kal thei hi a lawmawm hle a ni,” a ti.
Prof.Mawitea chuan, “Kum 2 chuang Covid hrileng avangin harsatna kan tawk a, chuti chung chuan bial tan hmasawnna hna ṭhahnem tak kan thawk thei a, kan sawi vek seng lo vang. In khua ṭheuh kha lo en ula, duhthusam ni lo mahse kan hnathawhte hi a lawmawm thawkhat hlein ka hria,” a ti.
Aizawl South III MNF Official Candidate chuan, “Tuna hmachhawp kan neih mekte bakah ka MLA hma aṭang tawha Sports atana sponsorship kan inpek ṭhin hi mumal takin term thar aṭang chuan kan ruahman dawn a. Zone Football leh Volleyball tan leh Discipline dang atana hman turin MLA fund pawh kan ruahman dawn a ni,” a ti.
SEDP chungchang sawiin Prof.F.Lalnunmawia chuan, “SEDP hi kan sem mek a, kum 2023-24 budget-ah 300 crore dahin tunah hian 2nd phase atan 150 crore sem tawh a ni. 3rd phase a dawng tur pawh thlan fel leh vek tawh a ni a. Hemi atan hian 150 crore chhawl chhin mek a niin chu chu inthlan zawhah kan hai hawng leh dawn a ni,” a ti bawk.
He programme hi Pu Vanlalfinga President Aizawl South III North Block MNF-in a kaihruai a, bial chhung khaw hrang hrang aṭangin MNF party mi leh sa ṭhahnem tak an kalkhawm a ni.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/892
Dt.18.10.2023
HNAM POLITICS KUM 60 CHUANG BUAIPUITU CHU MNF HI A NI – PP Thawla. Ex Minister.

HNAM POLITICS KUM 60 CHUANG BUAIPUITU CHU MNF HI A NI – PP Thawla. Ex Minister.

Mizo National Front
General Headquarters
Mizoram : Aizawl

Press Release

HNAM POLITICS KUM 60 CHUANG BUAIPUITU CHU MNF HI A NI – PP Thawla. Ex Minister.
Vawiin October ni 13, 2023 (Zirtawpni) hian Mizo Hnam run chhung inkhawm neih a ni a. He hunah hian MNF Treasurer Pu K. Vanlalauva (Ex Minister) chuan, ‘Mizoramin sum harsatna a tawh dan’ tih lehkhabu a tlangzarh a. “He lehkhabu hmang hian titi thar a piang ngei ang. Lehkhabu hlu tak, kan ramin harsatna kan tawh dan dik tak mumal taka tarlanna a ni,” a ti. He hunah hian he lehkhabu ziaktu, Pu P.C. Laldinthara, Gen. Secy. MNF Gen.Hqrs chuan sawihawnna hun a hmang bawk.
Mizoramin sum harsatna a tawh dan, tih lehkhabuah hian, a ziaktu hian Mizoram hi intodelh State-a siam theih ngeina turin tan lakna tur a awm, a ti. Covid hrilen chhunga Mizoramin pawisa a hman nasatzia te, ramri buai leh state dang atanga lo hawte tana senso zawng zawng pawh kan theihnghilh ta niin a lang. Tun hnai kum nga chhunga Central atanga sum (untied fund) dawn dan (rupees in crore) tarlan niin,
2017 – 18 _ Rs. 5543.05
2018 – 19_ Rs. 6090.96
2019-20 _ Rs. 5733.76
2020 – 21 _ Rs. 4432.53
2021- 22 _ Rs. 6012.87
2022 – 23(BE) _ Rs. 5698.24
Political session-a thusawitu, Pu PP Thawla, Ex-Minister, Adviser MNF Gen. Hqrs chuan, “Hnam politics kum 60 chuang buaipuitu chu MNF hi a ni a. Political party dik tak leh rintlak ber a ni,” a ti. A politics zin kawng sawiin, hnam party MNF-ah hian Pathianin min hruailut a. Kan tana tha ber turin rem min ruatsak thin a ni, a ti.
Mizo Hnamrun chhung inkhawm hi Upa K. Lalthawmmawia, NCC, MNF Gen. Hqrs. chuan kaihruaiin, Pu Zaiawithanga, NEM, MNF Gen. Hqrs chuan hunserh a hmang.
Sd/-
(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/881
Dt.13. 10. 2023

DAMPA EAST BLOCK MNF IN CAMPAIGN KICK-OFF HMANG

Mizo National Front
General Headquarters
Mizoram : Aizawl

Press Release

DAMPA EAST BLOCK MNF IN CAMPAIGN KICK-OFF HMANG
Vawiin ni 13 October, 2023 Zirtawpni hian Reiek ah MNF Dampa East Block Campaign kick-off hman niin, Dampa East Block chhunga MNF Party mite an kal ṭha hle a, he hun hi Dampa Bialtu MLA leh Dampa Biala MNF Official Candidate, Pu Lalrintluanga Sailo chuan a hmanpui a ni.
Pu Lalrintluanga Sailo chuan, Hrileng leh harsatna dang dang karah Dampa bial enkawl thei tura Dampa bial mipuiin min thlang kha ka lawm tak zet a, chutih rualin duhthu kan sâm tawk lo ang tih pawh ka ring a ni. Amaherawh chu, heti chung chunga bial mipuite support na ṭha tak mai ka dawng erawh ka lawm tak zet a, he bial hi sorkar anga harsatna tam tak hmachhawn chung nilo, boruak ṭha zawk hnuaia enkawl zui hi ka duh tak zet a ni. He bial hmasawnna tura hmachhawp tam tak ka la neihte apuitlin ngei theih na turin thawhpuiah ka sawm che u a, he bial hmasawnna hian min ti lawm em em ṭhin a ni, tiin Pu Lalrintluanga Sailo chuan he hun hmanga tel ve kum 80 chunglam tân Upa lawmman ₹1000 ṭheuh a pe a ni. He hun hmanna a kal Upa ber hi Pu Chhawnkima kum 95 Khawrihnim khua a ni.
Dampa East Block te chuan he hunah hian Pu Lalrintluanga Sailo hi chawimawina hun an hmang nghal a, Dampa East Block Ṭhalai President Tv.Lalawmpuia chuan, “Dampa bialah hun harsa leh hrileng karah pawh Development tam tak min pe in, kan neih ngailoh zirna sikulah te min pe a, kawng ṭha, tui connection ṭha leh sorkar hmun pawimawh hmasawnna tam tak min pek vangin ‘Thangchhuah puan’ leh he bial tana atawlh ngailoh zia hriatreng nan ‘Tawlhloh puan’ hi kan hlan a ni” a ti.
He hunah hian Dampa bial MNF Official Candidate hian party hrang hrang aṭangin MNF party ah Voters 26 a lawmlut nghal bawk a ni.
Sd/-
(B.LALHMANGAIHZUALA)
Joint Secretary
Media & Publicity Deptt
Mizo National Front
Memo No.MNF/Media/04/2023/877
Dt.13.10.2023
SEDP dawngtuten cheng nuai thum an dawn hma chu an sum dawn tur an dawng zel ang

SEDP dawngtuten cheng nuai thum an dawn hma chu an sum dawn tur an dawng zel ang

Mizo National Front
General Headquarters
Mizoram : Aizawl

Press Release

SEDP dawngtuten cheng nuai thum an dawn hma chu an sum dawn tur an dawng zel ang – Tawnluia, Dy.Chief Minister & Sr.Vice President MNF
Vawiin October ni 13, 2023 (zirtawpni) hian Tuichang North block MNF party chuan Tuichang biala ding tur MNF Senior Vice President Pu Tawnluia hovin, Khawzawl Zaingen YMA Hall-ah Campaign Kick Off ropui takin an nei. He hun hi MPF Tuichang Constituency Chairman, Pastor David Saithuama Pachuau-in a kaihruai.
He hunah hian Tuichang biala MNF Official Candidate Pu Tawnluia chuan thu sawiin, ka kumte enin ram rawngbawl hna hi chawl ve tawh ila tih hi ka duh dan dik tak a ni. Ram rawngbawl hna hi thangtharte kutah awm tawh se tiin ka inruahman vek tawh a. Kan Elected OB-ah te, Nomination Committe ahte ka thlen a. Mahse, kan hotuten ‘i din leh a ngai’ min ti a. Kei teh lul ram rawngbawl tura kan hotuten min ring hi ka lawm a, pha theiah ka inngai lova, kan ram tan leh Tuichang biala ka hmachhawp ka la tih zawh lohte tipui tling turin, ram rawngbawl turin vawiin hian kan Nomination Committee te thu zawmin Candidate hi ka lo pawmin, ka lo ding a ni, a ti.
Pu Tawnluia chuan, Tuichang bial mipui duhsakna changin kum 2018 khan he bialah thlan tlin ka ni kha ka lawm hle a. Bialtu ka nih angin, he bial tan hian theih tawp ka chhuah a. Tuichang bial hi ka hmangaih a, ka lo tling leh anih chuan ka theih tawp chhuahin bial hmasawn nan ke ka pen zel dawn a ni, a ti. Khawzawl District hi a hringtu ngeiin Kan enkawl zui a, DC Ken tel sorkar office hrang hrang te a lo awm kim a, DC fuke a kim theih nana dintu te ngeiin kan enkawl zui leh tura siam nachang hi Tuichang bial mipui te hian in hria a, sorkar nawn tir leh min tum tih ka hmuh hian ka lawm tak zet a ni, a ti bawk.
MNF Senior Vice President pu Tawnluia chuan, kan policy lian ber chu SEDP hi a ni a. Bul kan tan tawh a, kawng lakah kan tawp san dawn lo, a ti. A sawi zelnaah pu Tawnluia chuan, COVID hripui vangin SEDP hi Family Oriented-in kan kalpui lawk thei lova, tunah hian thawhkhatna a thlanten cheng sing nga an dawng mek a. An ni ho hian cheng nuaithum an dawn hma chu an sum dawn tur hi an dawng zel ang. Chutiangin, a thawh hnihna cheng singhnih sangnga dawngte pawhin cheng nuai thum thlengin an dawng ang. A thawhthumna kan thlan fel tawh inthlan puan avanga la dawng hman lo te pawhin an dawng vek dawn a ni, a ti bawk.
Pu R Lalhnuna PAC pawhin thusawiin, MNF chuan kan ti ang kan tih hi kan ti mai thin. SEDP pawh cheng nuai 3 kan sem dawn kan ti a. Pathian leh mipui zarah kan sorkar leh ngei ang a. Tuna kan sem mek first phase leh second phase dawng tawh te. Third phase thlan fel tawhte hian cheng nuai 3 hi kan dawng tling vek dawn a ni a tim A sawi zelnaah pu Hnuna chuan, MNF thli na takin zoram pumah a tleh mek a. Party dang lehkhachaih chu a thli beng lo zawng zela an kal avangin an boruak a hniam zel a, tunah hian sorkar leh ngei turin mipuiin MNF te hi min ngai ta, a ti bawk.
He hunah hian Pu Phairothanga, MNF Adviser pawhin thusawiin, Pu Duhoman ZPM high command in kan sorkar chuan zu kan zuar lo ang tiin thu an dah a tih hi, ZPM-a ka awm lai khan kan sawi lang ngam lo hrim hrim, a ti. Pu Phaorthanga chuan, Tuichang biala ZPM campaign kick off na a ZPM candidate thusawi ka lo ngaithla ve a. He bial tana tih tur hmachhawp engmah sawi tur a nei lo a. Party-a ka awm chhan ve chu Lalduhoma hi a ni, tih ringawt ZPM candidate-in a sawi kha Tuichang bial tan a vanduaithlak tak zet a ni, a ti bawk
Sd/-
(LALTHAKIMA)
Joint Secretary
Media & Publicity Deptt
Mizo National Front
Memo No.MNF/Media/04/2023/882
Dt.13.10.2023
ṬAWI BIALAH CAMPAIGN KICKOFF NEIH A NI

ṬAWI BIALAH CAMPAIGN KICKOFF NEIH A NI

Mizo National front
General Headquarters
Mizoram : Aizawl

PRESS RELEASE

ṬAWI BIALAH CAMPAIGN KICKOFF NEIH A NI

Vawiin October ni 11, 2023 Nilaini hian Tawi Bial MNF East Block huaihawtin Keifang Dawrkawn leh Saitual Dawrkawn-ah Campaign Kickoff leh MNF Official Candidate Pu Lalrinenga Sailo hmuahna hun hman a ni.

Campaign Kickoff hi Pu VL.Krosshnehzova, GS., MNF General Headquarters chuan hmang in, thu a sawi nghal a. Pu Zotea chuan, Saitual leh a chhehvelin thi leh thau pawlhin District tihpuitlin ngiatin hma a la tawh thin a. Beidawn rum rum hnuah kum 2018 a ‘MNF sorkar chuan kan ngenna te a tihlawhtling ta a nih hi, kan beihna te kha theihnghilh lo ang u’ tiin mipui a sawm a. Kan district neih hi a la famkim pumhlum lo tih kan hria, a tahtawla hmasawna kal tur a ni. Chuvangin a ram mipuite mamawh chu MNF hian huai takin a tihlawhtling mai zel a ni. Mi tam takin sorkar tawhten engmah ti lo, hna pawh thawk lo anga an sawi fo hi inenfiah se ka duh a ni a ti.

MNF GS chuan MNF chu Ram leh Hnam tana ke pen ngam a ni a. Zoramin Mautam tam a tuar lai, kan mangan lai taka ngaihthah kan nih avangin Hnam hmangaihtuten MNF an din a. Zalenna sualin ram hnuaiah an lut a, Ram tana martar tam tak kan nei a ni a ti. Ram tana zalenna sual ngam leh martarte hi eng hnam pawhin an zahin an chhuang thin. Mizo hnam hmangaihna chi anga tuhtu, hnam thinlung min puttirtu chu MNF hi a ni a. Myanmar, Bangladesh leh Manipur-a kan unauten harsatna an tawk a, MNF sorkar chuan central mitmei veng hauh loin a tuamhlawm mai a ni. Hnam thuthlung kengtu kan nih avangin kan hnam leh sakhaw himna turin Pu Zorama kaihruai sorkar hi a hnungtawlh ngai dawn lo a ni a ti.
Pu Zotea chuan, Tawi bial mipuite hnenah ngenna siamin, kan hma election lo awm tur ah hian theih tawp chhhuah tur in ka sawm che u a, theihtawp inchhuah ngei ka ring a ni. Pathian leh Kan Ram tan Kan bei zel anga, Mipui hnen thleng phak SEDP pawh sem chhunzawm zel a ni dawn a ti.

He hunah hian Pu Rinenga Sailo, MNF Official Candidate chuan, ‘Tawi bial mipuite tan hnathawh kawr ha tura inpe a nih thu a sawi a. Pu Zoramthanga kaihhruai sorkar in mipui ngenna anga Saitual District a tipuitling zel hian hna thawk tak tak thin chu MNF ngei hi a ni tih a tichiang hle a. District fuke kim nei turin a hringtu MNF sorkar leh a ngai a, Saitual leh a chhehvel khua ten anmahni hmangaihtu hai lova, tun inthlanah pawh chakna an chan tir leh ngei a beisei thu a sawi. Thlan tlin a nih chuan Tawi bial mipuite tan theihtawp chhuahin ke a pen dawn tih sawiin, engtikah mah a tlanchhiatsan ngai lovang, tih a intiam thu a sawi.

Pu R.Lalhnuna, PAC, MNF General Headquarters pawhin thusawiin, Mizoram tana MNF Sawrkar hmalakna ropuizia leh ram tan malsawmna thlen hrang hrangte leh MNF Sawrkar lehna tur hrang hrangte a sawi bawk.

He Campaign kick off hunah hian MNF General Headquarters atangin, hruaitu pawimawh thahnem tak kalin, AMC atangin Dy. Mayor, Executive Corporator leh Corporator thahnem tak an kal bawk a ni.

Sd/-
LALTHAKIMA
Jt. Secretary
Media & Publicity Department
Mizo National Front
Memo No. MNF/Media/04/2023/878
Dt. 11.10.2023

MNF-IN INTHLAN RESULT CHHIAR NI SAWN TURIN ECI-AH THLEN

Mizo National Front
General Headquarters
Mizoram : Aizawl

Press Release

MNF-IN INTHLAN RESULT CHHIAR NI SAWN TURIN ECI-AH THLEN

Mizo National Front, General Headquarters Mizoram, Aizawl chuan Election Commission of India-in Mizoram Legislative Assembly Election result chhiar hun atana Kristiante ni bik, Pathian biak inkhawm ni tak Ni 03.12. 2023 (Sunday) a ruat hi tha a ti lo hle a. Mizo kristiante palzutnaah kan ngai a ni.

Chuvangin, ni 4, 12. 2023 (Monday) ah sawn turin Chief Minister Pu Zoramthanga rawtna angin vawiin khan Chief Election Commissioner, Election Commission of India hnenah Pu TC.Kaphmingthanga General Secretary, MNF General Headquarters hmingin sawn tura lehkha thehluh a ni.

Sd/-

(B.LALHMANGAIHZUALA)
Joint secretary
Media & Publicity Deptt
Mizo National Front
Memo No MNF/Media/04/2023/874
Dt.09.10.2023

MIN BEIHNA DANG HRE LOVIN, KALPHUNG THAR ENCHHIN TIH BAK SAWI TUR AN HRE LO. – Zoramthanga, Chief Minister

MIN BEIHNA DANG HRE LOVIN, KALPHUNG THAR ENCHHIN TIH BAK SAWI TUR AN HRE LO. – Zoramthanga, Chief Minister

Mizo National Front
General Headquarters
Mizoram : Aizawl

Press Release

 MIN BEIHNA DANG HRE LOVIN, KALPHUNG THAR ENCHHIN TIH BAK SAWI TUR AN HRE LO – Zoramthanga, Chief Minister
Roreltute hi enchhin chi an ni lo, keini chuan kan tih mek leh tih tawhte atangin min teh se kan duh- Dr.R.Lalthangliana, Minister

Vawiin October ni 9, 2023 (Thawhtanni) hian Mizo Hnam Runah chhung inkhawm neih a ni a. Hun hnihnaah MNF President Pu Zoramthanga, Chief Minister chuan Pu Zarzoliana Ex-chairman AMC, (Ex-Elected member PAC, ZNP) Pu Vanlalngaia, Treasurer, Local Council, Zemabawk leh Pu Laltlanmawia MBA, Manager Hyundai Marketing, EM NESO, Sihphir Venghlun, Pu Sanglura, President, ZPM Unit President Zemabawk & Organiser ZPM Gen.Hqrs. leh an hnungzuite engemaw zat a lawmlut.
Pu Zoramthanga chuan lawmluh paha thu sawiin, “Independent sual lo tia min puhtute hi kan sual laia tel ve lo leh tel tluan peih lote an ni. Kum 1966-ah Independent kan sual a, kum 20 chhung kan inkap. Ram tan zalenna an sual lo min ti thin mahse; Hnam Martar thlanmual heti zat kan neih hian ram tan zalenna kan sual chu a tichiang. India ram leiba nei tlem ber dawttu kan ni a. Heti chung hian ba tam berah min chhuah lui tlat a. Min beitute hian min beihna dang hre lovin, kalphung thar min enchhin teh u tih bak sawi tur dang an hre lo. A rei tulh tulh a, enchhin tum lo an tam tulh tulh a nih hi,” a ti.
Thu sawitu dang Minister Dr.R.Lalthangliana chuan MNF chu party danglam bik, October ni 22, kum 1961-ah mi tlemte ten an din, a dintute pawh mi ropui bik ni chuang lo. Sam 20: 7 a innghat tlat ‘Thenkhatin tawlailirte an ring a, thenkhatin sakawrte an ring. Keini erawh chuan Lalpa kan Pathian hming chu kan lam zawk ang’ ti thintu an nih thu a sawi. Roreltute hi enchhin chi an ni lo tih sawiin, tih fuh loh chuan kum hnih pawh a rei lutuk. Keini chuan kan tih mek leh tihtawhte atangin min teh se kan duh zawk, a ti.
Health Minister chuan, “Assembly House-ah kum 30 chuang ka lo thu ve ta a, tun term (2018-2023) anga hun khirh bik kan la tawng ngai lo. Inbuatsaihna hun awm hauh lovin Covid-in khawvel min nuai a. Pathian kan hnenah a awm a. Kan Chief Minister-in sum chungchangah Health department enkawltu ka nih angin, a ngaihtuahna zawng zawng min sen pui a, ba thla tein kan kal rum rum chang a awm bawk. Khawvelah covid vanga mi nuai hlir nuai 69 an thih laiin, kan ramah chuan mi 700 chuangin nunna kan chan a, mi thiamte zir dan chuan mi 500-te kha chu Covid vei lo mahse; natna dang thihpui tham nei sa an ni. A hun takah hunkhirh laia kaihruai turin leader tha Pu Zoramthanga hi Pathianin min pe a ni,” a ti. Covid baka kan hriat lawk loh lirnghing, vawk pul, ramria inkahna leh kan zo hnahthlak raltlante kan lo dawnsawn nasatzia a sawi bawk.
“Chief Minister nih tum lo hrawn tawhten an hrawn an hre chiang tulh tulh a. Zui zel tlakah an ngai lo a, keini chuan kan zui rei telh telh a, kan CM zui tlakzia kan hrechiang tulh tulh a ni,” Dr.Thangtea chuan a ti a. A department hmalakna hrang hrang a tarlan bakah Mizorama District 11 zinga District 8 chu MNF kut chhuak a nih thu a sawi.
Pu Zarzoliana Ex-chairman AMC, (Ex-Elected PAC member ZNP) pawhin kan phu loh lutuka min lo dawngsawng hi lawmawm kan ti a. Politics-ah kum 47 zet ka lo awm ve tawh a, MNF a ka luh chhan chu, mi tam tak bialtu MLA kan nei tawh thin a. Tuna kan Chief Minister Pu Zoramthanga ang reng renga bial tana development thawk nasa, bial mipui hmangaihtu kan la nei ngai lo hi lawmawm ka ti a, a hmalak mek leh hmachhawpte hi chhunzawm zel tlak ka ti a. Harh tharna ka changa rilru fim tak puin ka rawn lut a, a hma chhawpte a chhunzawm zel theih nan theihtawpin kan Chief Minister hi a tlin leh theih ngeina turin ka bei dawn a ni, a ti.
Pu Laltlanmawia MBA, Manager Hyundai Marketing, EM NESO leh Pu Sanglura President ZPM Unit Zemabawk pawhin thu an sawi bawk.
Vawiin hian Pu Lalthlamuana Congress VCP Kawrtethawveng chuan MNF a zawm tak avangin Kawrtethawvengah MNF V/C a piang nghal tih report ngaihthlak a ni bawk.
He hun hi Pu PC.Laldinthara, General Secretary chuan kaihruaiin, T/Upa Vanlalvuana, Synod Revival Speaker chuan hunserh a hmang.

Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/873
Dt.09.10.2023