CONGRESS, BJP LEH ZPM HRUAITU THENKHATTE HI MNF TANA THEIHTAWP CHHUAHTUTE AN NI

CONGRESS, BJP LEH ZPM HRUAITU THENKHATTE HI MNF TANA THEIHTAWP CHHUAHTUTE AN NI

MIZO NATIONAL FRONT GENERAL HEADQUARTERS

PRESS RELEASE

CONGRESS, BJP LEH ZPM HRUAITU THENKHATTE HI MNF TANA THEIHTAWP CHHUAHTUTE AN NI
-Pu K. Vanlalauva, MNF Treasurer

Nimin ni 06.06.2022 (Thawhtanni) khan MNF Tuirial West Block huaihawtin Awithangpa Hall, Kawnpuiah Political Training neih a ni a. Resource person Pu K. Vanlalauva, MNF Treasurer chuan thusawiin, eptu party hruaitu thenkatte chu MNF tana theihtawp chhuahtute an ni, a ti.

Pu K. Auva chuan, “MNF hi October 22, 1961 zan khan Pu Laldenga in, Tuikhuahtlang Aizawlah ram leh hnam hmangaihtu mi pariat kalkhawmten Mizo National Front (MNF) tiin an din a. He Party dinna atana a hnarkaitu ber leh bultumtu ber a nih angin Pu Laldenga chu MNF Founder President a lo ni ta a ni,” a ti.

Resource Person chuan, “Kan term chhung hian inthlan kan hmachhawn mawlh mawlh a – Lok Sabha MP, Rajya Sabha MP, AMC, VC/LC, Sinlung Hills Development Council, LADC, MADC leh Tuirial bial Bye-election te neih a ni a, chutah chuan mipuiten MNF-ah rinna an nghat a, hneh taka thlantlin kan ni zel hi Pathian malsawmna leh mipui tanrualna a tih loh theih loh a. Pathianin MNF hi min hmangaih a, a ram tan hnathawk zel turin min duhzia a tilang chiang hle,” a ti.

“Kum hnih chuang Covid vangin kan buai a, chutiang karah ei leh barah harsa lovin vawiin thlengin kan awm a. Eirawngbawlna gas kan hnianghnar a. Harsatna hnuaiah hruaitu rintlak Chief Minister Pu Zoramthanga kan nei hi lawmawm kan ti a, kan chhuang takzet a ni. Tin, SEDP pawh Covid damdawi lei nante kan hman tawh hnuin, kumin budget tur hi kan hmang tan leh dawn chauh a, Kan flagship programme SEDP pawh ruahmanna felfei takin kan kal tanpui mek zel a, kan chhunzawm zel dawn a. Mipuite chiai lova nghak hram hram turin ka duh hle a, kan hotuten a tahtawl te tein an siam rem zel dawn a ni,” a ti.

MNF Treasurer chuan mi thenkhatin, media kaltlangin MNF chu buai thin angin an sawi a. Thudik hrechiang lova tawng mai mai lo tur leh belchiang phawt zeta thudik thehdarh thin turin a duh thu a sawi bawk.

Tuirial bialtu MLA Pu K Laldawngliana, Vice Chairman Commerce & Industry Development Board pawhin kalkhawmte fuihna thu a sawi a, “Hruaitute hian hruaitu kan nihnaa kan chian a ngai. Hruaitu kalkhawm kan ni a, kan thlen chinah hmasawn a pawimawh hle a, midangte ngaichang a, an thurawn lak thiam a pawimawh,” tiin, Pathiana innghat tur leh taima taka party inkaihhruaina zawma ram leh hnam tana thawk zel turin a chah a. “Pathian tih chunga Pathian leh kan ram tan kan beih zel chuan hlawhtlinna kan chang leh ngei dawn a ni,” a ti bawk.

MNF Gen.Hqr. General Secretary Pu BC.Lalbiakngura pawhin thusawiin, Training hi Tuirial West Block President Pu B.Sakhawliana’n kaihruaiin, Pu Zothansanga NCM MNF Gen. Hqrs-in hunserh a hmang a, Pu HD Lalduhawma, Vice President Tuirial West Block chuan lawmthu sawina a nei bawk a. He hunah hian MNF General Headquarters hruaitu mi engemawzat an tel a ni.

Sd/-
LALTHAKIMA
Joint Secretary
Media & Publicity Department
Mizo National Front
Memo No.MNF/Media/03/2022/435
Dt. 07.06.2022

ZPM LIAN ANGA LANG HI CONGRESS HO INPHATSAN VANG

ZPM LIAN ANGA LANG HI CONGRESS HO INPHATSAN VANG

MIZO NATIONAL FRONT GENERAL HEADQUARTERS

PRESS RELEASE

ZPM LIAN ANGA LANG HI CONGRESS HO INPHATSAN VANG: Pu K.Lalrinliana, MNF Advise

-Congress chu an term a tawp tawh, Corner tinah tihngaihna a awm tawh lo-

Vawiin ni 06.06.2022 Thawhtanni hian Mizo Hnam Runah chhung inkhawm neih a ni a. Political session-a thusawitu Pu K. Lalrinliana, MNF Adviser leh Minister of State chuan Zoram mipui tawngtaina leh hun harsa hmachhawn turin MNF Sorkar ruat a nih thu a sawi a. Congress party hun a tawp tawh thu leh ZPM-te chu lian anga an lanna chhan chu Congress mipui inphatsan vang tih a sawi.

“Kum thum leh a chanve a lo ni ta,” tiin, Pu K. Lalrinliana chuan, “Kum 2018 inthlan hmaa ram hruaitu tur dila kan tawngtai anga nasa kha ka la hre ngai lo. Hripui, raltlan leh harsatna lo thleng turte kan hre lawk lo. Amaherawhchu engkim hretu Pathian chuan he hun atan hian kan sorkar hi a ruat a ni,” tiin thutiam lak hma zan lai pelhah Minister a ni ve dawn tih a hriat chauh thu leh a deptt. enkawl turte pawh Pathian leh hotute ruahman vek a nih thu a sawi.

Politics-in inbeihna leh insawiselna chungchangah: “Democracy ram kan nih angin hengte hi chu a awm dawn tih ka hria. Miten min bei mah se, na ka ti lo. Min sawisel pawl hi chu an awm reng dawn. Khawvel dan a ni, tih hi ka pawm dan a ni. Hetih rual hian miten engtin nge min hmuh tih erawh ngaihtuah fo a ngai”.

Party dangte chuan kan hotupa ber tihchhiat hi an tum ber a nih thu sawiin, “Kan Chief Minister hian vision a nei. Vision nei lo chu politician ni tlakah ka ngai lo. Kan CM hian vision neiin hna a thawk a, chawpchilha tihhlawhtlin theih lohte a nih avangin eptute hian remchangah lain kan pu beih nan an hmang a ni,” Pu Rintea chuan a ti.

MNF Sorkar chu Pathian ruat a nih dan sawiin: “Covid hri leh ramri buaina zawng zawng hmachhawn turin Pathianin MNF a ruat a. Kan ei leh bar dan chah tuma min beih lai khan kan CM chuan Burma leh Bangladesh atanga mamawh lak dan tur lo ngaihtuah rawh (dan anga tih theih ni lo mah se), min ti a. Burma atanga oil lain Champhai leh Aizawlah trip khat ve ve kan hralh a, Central beng a thleng rang hle,” a ti a. Pathianin MNF min hruai danah kan hneh miah loh tur India do hun a awm a. Harsatna tam tak paltlangin kum 60 a lo thleng ta a. Hetih rual hian hmabak kan la ngah khawp mai,” a ti.

Minister Pu Rintea chuan a deptt chan thenkhat sawiin: Mizoramah sangha chi kan intodelh lo a, chu vangin a pui vulhna ruahman a ni (tihkeu sa chu a puitling tha duh lo). Mizorama awm sa Sangha chi li (4) enchhin mek a ni a, Sanghaah tal intodelh a tul. A humhalh kawngah YMA nen tangruala lui dung ven hna thawh a nih thu a sawi bawk.

Nitin mamawh lama intodelh a tul tiin, “Harsatna lian tak hmachhawn tul palh ta se, Mizoramah chuan oil dahkhawmna kan neih chhun chu petrol pump a ni mai a. Oil dahkhawlna tikhat vek pawh ni ila, ni 5 bak a daih lo. India rama oil depot nei lo awmchhun kan ni. Kan sorkar tirh khan oil dahkhawlna neih tumin hma kan la a, Central kan dawr tawh a. A hmun tur kan inbiak fel hnuah company lamin duh dan dang an rawn nei leh a. Tun atanga thla thumah hna tan theih kan beisei,” a ti.

“Gas pawh, kan sorkar hma khan ni tin trip 15 min pe thin. Kan sorkar tirh khan Central-ah ni tin trip 20 tal tiin kan dil belh a. ‘Minister ber lokal ta chu,’ tiin ni tin trip 23 min pe ta a. Tunah hian thla thum daih dah khawlna neih kan tum mek bawk a ni.”

Buhfai chungchangah, kudam hrang hrangah thla 4, 5, 6, 7 daih tur kan stock mek a. Amaherawhchu furpui leh kawng chhia erawhin harsatna a thlen a, kawngpui tha zawk sial tura hmalak a ni, a ti. “Kudam kan nei chhe hle a, kan sorkar tirh khan sak ngei ngei ngai 65 kan nei a, kan sak tawh chinah miten tha min tihpui viau,” a ti a. One Nation One Ration Card (India ram puma hman tur) nei tura sorkar laipui hmalak mek thu a sawi bawk.

MNF Adviser Pu Rintea chuan Mizorama eptu party-te chungchang sawiin, “Chhim lamah chuan ZPM chu motor number emaw an ti,” tiin, “ZPM chu bel keh phuarkhawm, tui pai thei lo awmkhawm an ni a. An headquarters thu a solid thei lo. Pu Sapa pawl te, Congress leh MNF atanga titaute leh ZNP kalkhawm an ni a, an invawrh len poh leh Chief Minister nih inchuhin an buai ang,” a ti bawk.

“Congress hoten that loh theih lohna bawm an tihte hi enge a awmzia ni ang. Mihring ngai hlir an ni. Vawiinah chuan Congress chu an term a tawp tawh a. Corner tin thlir ila tihngaihna an awm tawh lo,” tiin Pu Rintea chuan ZPM-ten MLA pasarih an neihte pawh hi Congress ho beidawngin an candidate an phatsan vanga tling nia a hriat thu a sawi bawk a ni.

Mizo Hnam Run inkhawmah hian Pu MH Kapa, Jt. Secretary leh Tv. Lalrindika, Champhai N Block-II Secretary-ten zin report an pe a. He hun hi Pu Lalnghakliana, Adviser-in a kaihruai a, Pu C. Manliana, GS-in hunserh a hmang a, MNF party hruaitu thahnem tak an tel a ni.

Sd/-MALSAWMPUIA RALTE
Joint Secretary
Media & Publicity Department
Mizo National Front
Memo No.MNF/Media/03/434
Dt.06.06.2022

REMNA LEH MUANNA VAWNHIM KAN ZAVAIA MAWHPHURHNA A NI: LALRUATKIMA

Mizo National Front
General Headquarters
Mizoram : Aizawl

Press Release

REMNA LEH MUANNA VAWNHIM KAN ZAVAIA MAWHPHURHNA A NI: LALRUATKIMA

Serchhip :Dt.30.6.2022 : Vawiin hian Serchhip West Block MNF huaihawtin Thenzawl Joint YMA Hall-ah Remna Ni hman a ni a. He hun hi Pu Lalruatkima Minister, MNF Adviser ni bawk chuan a hmanpui.

He hunah hian Pu Lalruatkima chuan thusawiin, “Tu Party pawh sorkar se remna leh muanna vawn nun tlat hi kan zavaia mawhphurna a ni a. Hnam pasalṭhate leh Martar-te hrereng chungin he ram hi a kal tur a ni,” a ti.

Rural Development Minister chuan, “Mipuite hi sorkar ta kan ni a, sorkar hi mipui ta a ni bawk. Department hrang hrangte hmalakna tihlawhtlin a nih theih nan sorkar hmalakna lo tawiawm zel turin mipuite ka sawm che u a ni,” a ti a. “A fel ber berte kan ni hauh lovang, mahse tun dinhmunah chuan Pathianin MNF kutah he ram hruai hna hi a dah a. Kan thiam ang leh kan theih tawkin hmalam kan pan zel dawn a ni,” a ti.

Pu Lalruatkima chuan, “Kan hriat angin hripuiin khawvel a nuai a. Zoramin hun harsa tak kan tawk a, he hun harsa tak atana Zoram hruai turin Pu Zoramthanga sorkar Pathianin a ruat a, hriak a thih a ni. Hun harsa tak kan tawn pawh kan tuar chhuak ta mek a. Hmasawnna kawngah bung thar kan kai zel dawn a ni,” a ti a. MNF sorkar hmalakna sawiin, “Kohhran leh khawtlang duh danin kan sorkar aṭanga ni 3-naah zu zawrh kan titawp a. Theih tawp chhuahin kawngpui kan siamṭha a, Zoram hmun hrang hrangah kawng a lo ṭha ta viau a ni. Ration buhfai kan hnianghnar a, gas leh nitin mamawh dang pawh he sorkar hnuaiah hian a hnianghnar ta hle a. Ramri humhalh ngam sorkar kan nei ta bawk a ni,” a ti bawk.

MNF Adviser chuan, “Party te han inbeih chang nei ṭhin mah ila Pathianin MNF-te hun ṭha min pe leh ang tih ka ring a. MNF sorkarin tihhlawhtlin tawh leh tih hlawhtlin mek te leh hmachhawp tam tak a nei a. Hmasawnna hna kan thawhte hi a tam hle a, hengte chhunzawm tur hian Pathianin inthlan lehah hian hun ṭha min pek leh ka ring tlat a ni,” a ti.

Pu Ruatkima chuan, “Sorkar flagship programme SEDP ruahman mek a ni a, he SEDP hi ho mai maia hman a thiang lo a, dinchhuah nan kan hmang tur a ni. Tumruhna, teirei peihna leh taimakna nen hma kan lak chuan kan dinchhuahpui ngei ang. Tuna thlante hi a hmahruai chauh a ni a, a lo la kal zel dawn a ni tih hriain kan rilru lam pawh i inbuatsaih ang u,” a ti bawk.

He hun hi Pu Vanlalzawna Serchhip West Block MNF President-in a kaihruai a ni.

Sd/-LALLENMAWIA JONGTE
Secretary
Media & Publicity Dept.
Mizo National Front
Memo No.MNF/Media/02/2021/454
Dt.09.06.2022.

Maicham atang hian Pathian ruat roreltute hi sel fo tawh lo turin ka ngen – K.Vanlalvena, MP (RS)

MIZO NATIONAL FRONT GENERAL HEADQUARTERS

PRESS RELEASE

HRIPUI LENG KARAH PU ZORAMTHANGA KAIHHRUAI SORKAR HIAN HNA A THAWK NASA

Maicham atang hian Pathian ruat roreltute hi sel fo tawh lo turin ka ngen – K.Vanlalvena, MP (RS)

Dated, Aizawl, 3rd, June, 2022(Zirtawpni) :- Vawiin hian Mizo Hnam Run chhung inkhawm neih a ni a, hun hnihnaah Pu K.Vanlalvena, Hon’ble MP, Rajya Sabha chuan MP-ah hotuten an ruat chu a phu loh thu a sawi nawn leh a. A pian hmaa ram leh hnam tan MNF hotuten an lo beih nasat ziate zahawm a ti a, hotuten an ruat angin a theihna zawnah Mizoram tan theihtawp chhuaha hna thawh a tum thu a sawi.

Pu K.Vanlalvena chuan, “Inthlan hmain manifesto tam tak kan nei a, SEDP pawh kan sawi nasa a. Mahse, kan hriat lawk miah loh covid-in kum hnih chuang zet khawvel min nuai a. India ram leh Mizoram thlengin nasa takin kan tuar a. Sorkar, Kohhran, NGO leh mipuiten theihtawp chhuahin kan do a kan tangrual tha a. Kan thawhhona Pathianin mal min sawm a, covid avanga boral tlem berna state kan ni. Kan manifesto leh SEDP kan intiamna tam tak bakah development tam tak kan thawh tur pawh covid avangin kan tihlawhtling zung zung thei lo a. Sorkar department zawng zawng a nghawng a, Pathian Biakin kan khar a, total lockdown kan hmachhawn a, covid chu awm lo se kan tih ngei tur, covid avanga kan tih loh teah mipui hriatthiamna kan dil a ni. Hripui chuan min nuai lo se hna tam tak kan thawk tawh ang, heti chung hian MNF ministry hian nasa takin hna a thawk tho a ni,” a ti.

“MP ka nih vena zawnah hripui len laiin chhim leh hmar, chhak leh thlang ka fang kual a. Chhim lam lawng chawlhna ‘Akyab’ thlengin kan fang a. He lai hi MNF sorkar hmasa 1998-2008 term tawp lam atanga intan a ni a. Myanmar ramri thlengin kawng laih tawh a ni a. Lei vung paih, leidawh ngaite siamna tur cheng vbc 85 sen belh ngai chu kum 2017 atang khan an rawn dah tawh loh avangin, kan Chief Minister zahawm tak Pu Zoramthanga’n DO letter ziakin cheng vbc 200 chuang a nawr chhuak a. Tunah chuan Lawngtlai atang a Myanmar ramri kawng thlengin a tlang ruih tawh a ni. Zorinpui atanga Myanmar kawng pawh kan CM chak takin hma a la zel a, hel ho leh Myanmar sipaite tihbuai thin karah Myanmar ram chhung thlengin hna an thawk mup mup a ni. Lailapur lamin an duh hun hunah kan kawng min block thin hi Chhim lam kawngpui a tlang that hunah chuan kan tuar tawh lo ang,” MP chuan a ti bawk.

Mizoram MP chuan kum 75 zet khar tawh Tlabung atanga Kolkota, South Indian lama Lawng hmanga inkalpawhna tur chu Parliament-ah a nawr thu a sawi a. Tunah chuan Bangladesh nena insumdawn tawnna lian kalpui turin Bangladesh Commerce Minister leh Dr.R.Lalthangliana Commerce & Industry Minister-ten agreement an sign tawh thu sawiin, Bangladesh hian Mizoram lung, sawhthing, hmarcha, mau thlengin an mamawhna a lian hle a ni, a ti.

Pu K.Vanlalvena chuan Chin Hills capital atangin Pangkhua chu darkar 3 kal chauh a nih thu a sawi a. Burma lam kawng chu a tlang that tawh thu sawiin, Pangkhua to Saisihchhuah laih nan kan Chief Minister-in cheng vbc 70 atanga 80 vel a sawi chhuak a, a thawktu BRO-ten an thawh theih mai loh avangin Mizoram PWD-ten thawk mai se kan ti a. Kei pawhin Parliament-ah sawiin ka nawr bawk a, reiloteah kawng hi a tlang tha mai dawn a. Saisihchhuah atang a Halkha pawh double lane-in a tlang tawh a, keini lam pawh reiloteah a tlang dawn a ni. Pukzing atang a Silsuri kawng pawh a tlang tha tep tawh a, Silchar atang a Tipaimukh pawh kan extend dawn a, Tinghmun atang a Tuiruang pawh Highway turin kan CM hmalakna in laih a ni dawn a, hripui leng karah Pu Zoramthanga kaihhruai sorkar hi a awm mai mai lo a ni, a ti.

Pu K.Vanlanvena chuan, “Pathian ruat loh roreltu an awm ngai lova, tuna Zoram kaihruai tur hian Pu Zoramthanga hi Pathian ruat a ni, tih hi kan sakhaw hruaitu thenkhatte hian lo hria se ka duh a ni. Hun a tih loah chuan kan CM hi Pathianin a chawlhtir lo ang. Pulpit/Maicham atang hian Pathian ruat roreltu hi sawisel fo tawh lo turin ka ngen a ni. Roreltute chu Pathian ruat an ni a, ruat ni ve loten sel fo mahse, hman atanga vawiin thlengin Pathian ruat ngei an ni,” a ti bawk.

Pu C.Zahmuaka (Ex Parliamentary Secretary), Adviser MNF Gen.Hqrs.chuan chhung inkhawm hi kaihruaiin, Pu H.Dokhuma, Secretary, MNF Gen.Hqrs.chuan hunserh a hmang.

Sd/-

R.LALHMANGAIHA
Secretary
Media & Publicity Dept.
Mizo National Front
Memo No.MNF/Media/03/2022/432
Dt.03.06.2022

ZORAMIN A MAMAWH CHU VISION NEI THANGTHAR, HNATHAWKTU LEH RAM HRUAITU – Pu Zoramthanga, Chief Minister

ZORAMIN A MAMAWH CHU VISION NEI THANGTHAR, HNATHAWKTU LEH RAM HRUAITU – Pu Zoramthanga, Chief Minister

MIZO NATIONAL FRONT GENERAL HEADQUARTERS

PRESS RELEASE

ZORAMIN A MAMAWH CHU VISION NEI THANGTHAR, HNATHAWKTU LEH RAM HRUAITU – Pu Zoramthanga, Chief Minister

Vawiin ni 01.06.2022 (Nilaini) zing khan Aizawl – Chaltlang DIET peng kawngpui dawh zau chu Chief Minister Pu Zoramthanga’n a hawng a. Thawktute leh khawtlang inpekna fakawm a tih thu leh engineering department hnuaia hmabak tam tak te, ruahmanna awm mek te, vision neih a pawimawh thu sawiin, zoramin a mamawh chu vision nei thangthar, engineer leh politician-te an ni a ti.

Chief Minister chuan hmabak leh hmachhawp awm thei chi hrang hrangte a sawi a. Technology khawvelah hmathlir – vision neih a tul a, kan hmabaka development lian neih a ngai tiin, “Burma ram kan nuihzat thin pawh, an khawpui thar Naypyidaw an han din chu, an parliament building kawtah thlawhna lian a tum thei,” a ti a. Ram dang atanga an beih thut pawha airport pan ngai lova parliament kawt atanga thlawh chhuah theih nan an ti, tih a hriat thu a sawi.

Hmathlir chungchanga politic inbeihna sawiin, “A sawi a sawi a, a tihlawhtling thei si lo, an ti thin. Kum khata tihpuitlin tur chi a awm a. Kum 10-a tihpuitlin tur chi a awm. Kan dam chhung pawha kan tihpuiltin hman loh tur chi a awm bawk. He vision hi thangthar lokal zel turten an chhunzawm tur a ruangam kan pek a tul,” a ti.

Switzerland of the East kan sawi a. A leh lamah kawng a lo diak a, nuihza siam nan an hmang thin tih sawiin Pu Zoramthanga chuan, “Tuna kan vision hi a thleng kim nghal lo. Aizawl khawpui pawh vision kan nei a. Bawngkawnah, Vaivakawnah fly-over i tan ang u, kan tia kan beia kan nawr ngat ngat a. A theih chin main line-ah chuan kawng chhawng lo chuan kan insu dar dawn lo, motor a pung zel si – LMV tal kawng chhawngah kan ti a, (politic-a) inbeih nan tak kan hmang zui a. Amaherawhchhu, hei hi a work order kan siam a la ni lova, kan vision kan sawi a ni,” a ti.

“Keini chu naktuk naktipah kan boral a ni thei. Nakinah kan thawktuten Zoram hriata kan vision kan sawite an hriat a, an tihpuitlin theihna turin heng hi kan paupui a ni. Heng hi inbeih nan hmang mah ila, tui a tling tak tak lova. Miin vision tih an hre vek a ni,” tiin, Zoram mipui leh kan thangtharten vision a awma thawktuten tihpuitlin a ngai tih an hriat reng a tul, a ti a. “Tunah pawh vision dang kan nei a, kan tih theih chinin kan ti char char,” a ti bawk.

Chief Minister chuan leiverh chungchang sawiin, a thei tih hretute chuan an verh zung zung a. Sairang relkawng do kanna tur ban pawh a then chu metre 130-a sang a ni. Aizawl atangin chhim tawp Kaladan i hawlh thleng ang, an ti a, an ti mai zel. Miten an tih theih chu vision neiin kan ti ve tur a ni. Tlachawp vision ram rorelna chu a mawl mang e mai. Farfetch vision hi Zoram tan a pawimawh a ni, a ti.

Aizawl chhim lam Ngaizela city bus dahna chu Hlimen piah Central Workshop-ah sawn tura enfiah tawh a nih thu a sawi a. Zuangtui kudam pawh kawng chhe lutuk, truck ke 12 nei tana pan harsa pawh Sairang pelh FCI kudam bulah sawn tura buaipui mek a nih thu a sawi a. “Development-in min um zel a. Kan engineer, official-te leh politician-ten vision neih a ngai,” a ti.

Pu Zoramthanga chuan car parking scheme chungchang sawiin, “Nuihza siam nan hmang mah se, kan tichho zel a, a tha tulh tulh. Covid-in min tihbuai avangin kan thawk thei lo a, tunah chuan hma kan sawn zel,” a ti a. Garage peih tawhte zingah thla khatah cheng nuai 1.4 lalut an awm thu a sawi.

 

“Zoramin a mamawh chu vision nei thangthar, vision nei hnathkawktu leh engineer, vision nei politician leh ram hruaitu. Kan vision chu tunah tih theih lo mah se, kum khat hnu, kum 10 hnu, kum 20 hnu pawh a ni ang. Thangtharte tan a ruangampui a awm tur a ni. Tichuan raltiang kan kai vena tur a ni e,” Chief Minister chuan a ti.

 

Chaltlang DIET peng kawng hawnnaah hian PWD E-in-C leh staff-te, Chaltlang Local Council, NGO, DIET staff leh party hruaitute an tel a ni.

Sd/- MALSAWMPUIA RALTE

Joint Secretary
Media & Publicity Dept.
Mizo National Front
Memo No.MNF/03/2022/431
Dt.01.06.2022

Roreltu nih tuma thudik lova bul ṭan hi a tlo ngailo, mawng lang renga bihrûk ang ani. : MNF Treasurer.

Roreltu nih tuma thudik lova bul ṭan hi a tlo ngailo, mawng lang renga bihrûk ang ani. : MNF Treasurer.

MIZO NATIONAL FRONT GENERAL HEADQUARTERS

PRESS RELEASE

Roreltu nih tuma thudik lova bul ṭan hi a tlo ngailo a. Mawng lang renga bihruk ang a ni.-MNF Treasurer

May ni 31, 2022 (Thawhlehni) khan MNF Tuirial East Block huaihawtin YMA Hall, Lungdai-ah ‘Political training’ neih a ni a, Pu K. Vanlalauva MNF Treasurer chu resource person niin, Pu K. Laldawngliana MLA pawhin he hun hi a hmanpui.

Resource person Pu K. Vanlalauva chuan, “Hrilengin India ram leh khawvel a hrekna avangin sum dinhmun harsatna hian kian lam a la pan thei rih lo a, hemi avanga thil hre chianglo ten a thlawna central sum kan hmuh tamzia an sawi fo hi a diklo a, kan sorkar demna leh thudik lova min bei ṭhinte thusawi hi mi thil chikmi ten an awih lo. Chuvangin, he kan harsatna avang hian tumah indem a la hunlo a ni,” a ti a. Pu K.Auava chuan, Congress leh BJP hruaitu ni mekte hi MNF chhulchhuak an ni deuh vek thu a sawi a. Party constitution-ah pawha chuang lo, ZPM leader nihna chelhmek pawh hi MNF mi a lo ni tawh bawk a ni, ti. Pu K.Auva chuan, “Delhi tlanga AAP an kal vung deuh avang a, helaia lo din tum ve hi a fuh a rinawm lem lo. Central-a thâwk chhuah harsat em em tur, central lama an party chakna a innghat Congress party hruaitute fin mah mah avanga, hruaitute inkar zau site chu an chungah rinna nghah a harsa ang. Kohhran hminga campaign thin, an sawi loh anga awm zel, MPF pawhin a lo khak hial tawh, thudik chanve hmanga mipui hruaikawi ching, hruaitu nih tum, thusawi thei ve fu si, hmun dang danga kal ṭhinte hruaina hnuaia awm ZPM hi sorkarna siam turin mipuiin an ring hlawl lova. Leader-a an buai thu hi, ‘pan lovah tho a fu ngailo’ an tih angin phat rual a ni lova, Roreltu nih tuma thudik lova bul ṭan hi a tlo ngailo. Mawng lang renga bihruk ang a ni,” a ti bawk.

MNF Treasurer chuan, party mite chu mahni kohhran ṭheuh bel tlat a, kohhran leh khawtlanga mi hmantlak leh rinawm ni turin kalkhawmte a fuih a. Nihna leh chanvo ah ‘semsem dam dam, eibil thi thi’ tih changvawn chunga, ṭawngkam ṭha leh mawi hmang zel turin a fuih bawk.

Pu K. Laldawngliana MLA, pawhin thusawiin, MNF thupui ‘Pathian leh kan Ram tan’ tih-ah leh Pathianin a koh chhanah a chian thu a sawi a. Ṭhenkhat tihdan anga theihna, thiamna leh ropuina hmachhuan ve lova, Pathiana innghat tlat tur leh taima leh rinawm taka party inkaihhruaina zawm chunga ram leh hnam tana thawk zel turin party mipui kalkhawmte a fuih a. Social media hman thiam a ṭul thu leh hotute dawta an puhna a ṭul anga chhanglet thei tura inbuatsaih a ṭul thu a sawi bawk. Pu Dawngtea chuan, MNF chuan kan duh leh kan tum chu, kan ti zel mai a, hei hi party dang nena kan in an lohna a ni, a ti bawk. Tuna sorkar mek hi mipuiten tawngtainaa kan dilchhuah a ni a, chuvangin Pathian ruat an ni tih kan pawm a tul thu party kalkhawmte a hrilh.

A sawi zelnaah Pu Dawngtea chuan, “MNF party chu hripui leng karah pawh Pathianin a hruai tlat a, hotuah buaina kan nei ve ngailo a, hruaituah kan chiang a. Chuvangin, Chief Minister candidate kan ti ve ngai lo. Kan innghahna chu Krista a ni a, MNF party chu Pathianin mal a sawm a, tunhnai inthlan apiangah kan chak zel a, sakhaw vawnghimtu, Mizo zawng zawng inpui kan ni, a ti. Tuna kan dinhmun mekah lungawi mai lovin, hmalam panin, taima leh nun tlawm tak, huaisenna nen Pathiana innghat chungin hma i sawn zel ang u,” tiin kalkhawmte a fuih bawk a ni.

He hun hi Tuirial East Block President Pu K.Lalthanpuia’n kaihruaiin, Pu BC Biakngura, General Secretary, MNF Gen. Hqrs. pawhin thu a sawi a. Pu Lalthianghlima, Adviser-in hunserh a hmang. Pu A. Darzika Vice President Tuirial East Block chuan lawmthu a sawi a. He hunah hian MNF General Headquarters hruaitu mi engemawzat an tel bawk a ni. Pi Lalduhzuali, Lungdai Women Front President chuan ṭawngṭainain hun a khar.

Sd/- PETER CHHANGTE
Jt. Secretary
Media & Publicity Dept.
Mizo National Front
Memo No.MNF/Media/03/2022/430
Dt.01.06.2022.

Nationalism nena engpawh kan tih chuan diklohna leh hlemhletna ten hmun an chang ngailo ang – Transport Minister.

MIZO NATIONAL FRONT HEAD QUARTERS.

Nationalism nena engpawh kan tih chuan diklohna leh hlemhletna ten hmun an chang ngailo ang – Transport Minister.

PRESS RELEASE

Nationalism nena engpawh kan tih chuan diklohna leh hlemhletna ten hmun an chang ngailo ang – Transport Minister.

June ni 10, 2022 (Zirtawpni) hian Lalvunga Battalion, Mizo National Army Rising Day vawi- 55 na lawmna hun, Pu Lalbiakthanga in, Tanhril ah hman a ni a. Pu T.J. Lalnuntluanga, Minister, Transport deptt. etc chuan khuallian niin he hun hi a hmanpui a ni.

He huna khuallian, Minister Pu TJ Lalnuntluanga chuan, “Pathian leh kan ram tan, titu party ten sawrkarna kan siam mekah hian, hnama min dintu Pathian kan au zel a, nationalism kan thehdarh zel bawk a, hei hian rahtha a chhuah ngei ang. Hnam sipaite hi nationalism chi tuha thehdarhtu leh, ti thangliantu in ni a. Ram leh hnam hmangaihna thinlung thangtharte rilrua tuhtu in ni. Ram leh hnam tana thatlai hun zawng zawng hmangtute hi nationalism chi thehdarh a, thlawhfai hna thawktu atana mi rintlak ber in ni, ” a ti a. Ram leh hnam hmasawnna kawng kan pan meknaah Ex MNA te hi hmanraw pawimawh tak in ni a. Tun dinhmunah kan ram hi intodelh rihlo mah ila, hmingdang niloin, Pathian hming chauh kan lam tur a ni. Jet fighter hmanga min bei a, nasa taka min nghaisatute laka pur chaw lak hi a inthlahrunawm loh a ni, a ti.

MNF Adviser ni bawk, Pu T.J-a chuan, “Nationalism thinlung pua engpawh kan tih zel chuan, hlemhletna leh thil diklo hian hmun a chang theilo a, midangte tana malsawmna a kengtel zawk a ni,” a ti. Sawrkar hna thawhna ah leh kawng engkimah nationalism thinlung kan put tlat chuan hmabak eng tak kan nei zel ang. Kum sangbi tamtak liamta a hnam ropui leh changkang lo ni tawhte nen hmasawnna kawngah tehkhin chi kan nilo a, hnam hmangaihna thinlung puin theihtawp chhuahin kan um zel zawk tur a ni, a ti a.

Zofate inpumkhatna leh inunauna kan neih theih zelna atan pawh, nationalism bawk a pawimawh zel a ni, tiin, Transport Minister chuan, unaute kan inpumkhatna atan, Zampui tlangdungah bus service tir anih tawh thu a sawi a. “Manipur lamah pawh hnam inpumkhatna bus a service thuai dawn a, Tahan lama bus service tir anih theihna turin thui takin hmalakna a awm tawh a ni,” a ti bawk.

He hun hi MNF Gen. Hqrs atangin hruaitu thenkhat ten an hmanpui a. Lalvunga Battalion Re-union Leader, Pu Saihnuna Sailo chuan he hun hi a kaihruai a, Pi R. Lalhmingliani, Tlangnuam chuan hunserh hmangin, Pu Lalchhuanthanga, L Battalion Re-Union Asst. Leader chuan lawmthu sawina hun a hmang bawk a ni.

Sd/- PETER CHHANGTE
Jt. Secretary
Media & Publicity Dept.
Mizo National Front
Memo No.MNF/Media/03/2022/431
Dt.01.06.2022.

Pu K. VANLALVENA CHAWIMAWI A NI

Pu K. VANLALVENA CHAWIMAWI A NI

MIZO NATIONAL FRONT GENERAL HEADQUARTERS

PRESS RELEASE

Pu K. VANLALVENA CHAWIMAWI A NI.

Kan damchhungin kan tana in thiltha tih hi kan theihnghilh tawh dawn lo. -MP. Rajya Sabha.

Vawiin 27th, May 2022(Zirtawpni) hian Mualcheng khua chuan an khaw pa ropui leh chhuanawm, chawimawi tlak tiin, Pu K.Vanlalvena, Member of Parliament(RS) chu ropui takin an chawimawi.

He hun an buatsaih ah hian, MP Pu K.Vena chuan thu sawiin, vawiin a awmni kham meuha chawimawina hun min neih sak hi ka lawm a, Mualcheng khawtlang chungah lawmthu ka sawi tak meuh meuh a, kan phuloh chawimawina min hlan avang hian kan chhungkua hian Mualcheng khawtlang lakah bat tam tak kan nei a, chuvangin a theih ang angin Mualcheng khawtlang tan hian kan chhungkua hian theihtawp kan chhuah zel dawn a, kan damchhungin kan tana in thiltha tih hi kan theihnghilh tawh dawn lo a ni, a ti.

Pu K.Vena chuan, central sawrkar thuchhuak angin, Kum 2022 ah hian India ram pum hian In tinah tui connection hi an nei vek tur a ni a, chumi zulzui chuan Jal Jeevan Mission(JJM)-ah hian kan Dy.CM te pawhin theihtawp an chhuah a, ani rem min tihpuina in Serchhip EE ten hma la in ruahmanna te an han siam a, NABARD hnuai atangin kan hotuten Cheng vbc860 min tihsak a, tender pawh thla thar lamah a chhuah a beiseiawm tawh a ni. In tinin tui connection kan nei thuai dawn a ni, a ti bawk. Pu K.Vena chuan, Model village ah district hrang hrang atang a khaw pakhat theuh an thlan thu sawiin, Serchhip Dist.ah N.Mualcheng thlan a ni a, Model Village hi ngaih pawimawh khua an ni thin a, mite entawn tlak khua nihna tura kailawn pawimawh tak, thinlung lam thlenga insanmarna hmanrua a ni, a ti.

Kawlphetha chungchang sawiin, Mizoramah hian kawlphetha kan mamawh ang zat la thar chhuak lo mah ila, kan mamawh phuhru turin Solar Power plant hmangin, Vankal leh Saitual bulah te megawatt engemawzat pe chhuak thei tur siam chhoh mek a ni. Tin, Megawatt 60-70 pe chhuak thei thli hmanga siam chhuah theih tur ruahmanna neih mek a ni, a ti bawk. Kil tinah ramin hmasawnna kawng a zawh mek karah sawrkar hnathawkte chu Mualcheng khawtlang hmasawnna atana theihtawp chhuah turin ka sawm mawlh mawlh che u a ni, tibawk

MP ni tura a kalkawng te sawiin Pu K.Vena chuan kan hotute duhsakna in MNF party ah nihna hrang hrang, Thalai President te Secretary te, General Secretary leh PAC ni chho zelin an duhsakna kal zelah vawiinah MP dinhmunah min hlangkai a, MP ka nihna tur hian nomination file na tur Rs 4000/- pawh kan hotuten min pek sak vek a. Thenrual thaten min lawmpuina tur chawhlui kilhona tur thlengin pawisa min pe a, vawiin ni a MP ni thei tura min tanpuitu hi kan Pathian a ni a, kan party President Pu Zoramthanga leh Nomination Committee te Pathianin a hmang a, anmahni leh kan MLA kaltlangin MP ah min dah a ni, a ti.

He hunah hian Pu Vena te nupa hi chawimawina parthi leh thuziak tam tak, pawl hrang hrang in an hlan a. ZPM leh Congress party pawhin an hlan a, thangchhuah puan pawh bah tir an awm bawk.

MNF Gen.Hqrs.NCC Member Pu D.Thangliana Ex-MLA pawhin Mualcheng khua a lawmpui thu sawiin, Mizoram hian MP thlarau mi, pathian tih mi kan neih ve hi a ngai tawh a ni, tiin rawtna ka siam a, Lok Sabha ah Pu Rosanga Pathian tih mi kan thlang tling a, Rajya Sabha ah mi inngaitlawm em em, MP nih pawh in beisei lo kha lungrual takin kan han vawrh chhuak leh a, an Pathian tihna leh thuawihna kan ram leh hnam tan hian malsawmna tam tak a ni ngei ang, tih kan ring tlat a ni, a ti. Vawiin ni ah chuan Pu Vena zarah Mizoram khawvel hian Mualcheng hi an hriat phah a, kan MP ten hna tha taka an thawh zel theihna turin kohhran hrang hrang ten tawngtaipui zel turin ka han ngenin ka han sawm tak meuh che u a ni, a ti bawk.

Zing dar 9:30 khan Pu K. Vena puala chawimawina lung, Mualcheng kawn lun lai taka an phun chu Mualcheng VCP Pu F. Lalbiakdika chuan a hawng a, hemi hnu hian chawimawina hun hi Community Hallah hman chhunzawm niin, VCP hian a kaihruai a,
Pastor Vanlalruata UPC(Mz) in hunserh a hmangin, MP Pu Vena te chhungkaw lam atangin Pu K.Vanlalvena pa Pu K.Lalzika’n thu a sawi bawk a ni. Pu H. Lalchhanhim, Secy.Vc chuan Programme chhiarchhuahna neiin, Tv. R. Lalneihsanga, secy YMA in inhmelhriattirna leh inlawmna thu a sawi a. Khawtlang aiawhin Pu Lalhmahruaia VC member, pawhin thusawiin, MP lawmna hun hi VC term hmasa ami ten an rel tawh, vawiin nia tihhlawhtlin a nih thu leh an lawmthu a sawi a. Model Village-a min puangte, Vanva Lui Tui pump-na tura hma min laksak te hi lawmawm kan ti hle a ni, ati. Mualcheng khawtlang hian an khaw tlangval MP nih lawmna tur hian kawng hrang hrangin pawisa an thawk chhuak a ni.

Serchhip district chhunga dept hrang hrang hotute leh Mualcheng khuaa Sawrkar Office hotute, Mualcheng Welfare hruaitute pawhin thusawiin, Pu K.Vena an lawmpui thu leh an chhuan zia thu an sawi bawk a ni.

MP lawmna leh chawimawina hi khawtlang huapa neih a niin, tlaiah ruai ropui tak kilho a ni bawk.

Sd/-B.LALHMANGAIHZUALA
Jt.Secretary
Media & Publicity Dept.
Mizo National Front
Momo No.MNF/Media/03/425
Dt.27.05.2022

MNF VICE PRESIDENT-IN MNF TOBUL, THIL TUM LEH NIHPHUNG A SAWIFIAH

MNF VICE PRESIDENT-IN MNF TOBUL, THIL TUM LEH NIHPHUNG A SAWIFIAH

MIZO NATIONAL FRONT GENERAL HEADQUARTERS

PRESS RELEASE

MNF VICE PRESIDENT-IN MNF TOBUL, THIL TUM LEH NIHPHUNG A SAWIFIAH

Pu Zoramthanga kaihhruai sorkar hun reilote hian congress sorkar kum 10 chhunga a thawh ai khan hna a thawk tam zawk – MNF Vice President

Vawiin May ni 27,2022 (Zirtawpni) hian MNF Mamit Center Block huaihawtin ‘Political training’ chu I & PR Conference Hall, Mamit-ah neih a ni a. He hun hmanpuitu leh resource person Pu Lalthlengliana, MNF Vice President chuan
MNF party lo din chhan, a thil tumte leh MNF nihna a sawifiah. MNF chu Nationalism a chiang, chuta innghat tlat mi tlemte Pu Denga leh a hoten October ni 22, 1961 khan an din tih a sawi a. Nationalism chu mahni hnam leh nihna a chiang, hnam dang ziarang rawng kai lo, hnam rilru pu dik tak, hnam dang rahbehna hnuaia awm duh lo, mahni a ro inrel leh mahni kea dinchhuah duhna rilru pute an ni a ti.

Pu Lalthlengliana chuan MNF chuan India-in min awpbehna hnuai atanga zalenna famkim (full sovereignty) chu zofaten kan neih theih nan March ni 1, 1966 khan khawvel hriatah Independent a puang a. MNF chuan zalenna famkim kan neih theihna turin zum leh hriam karah kum 20 tal tap India sorkar ropui tak kha an do a. Hetiang ang political party hi Mizoramah pakhat mah an la awm ve lo a ni tiin, MNF atang vek lo chuan an awm thei leh tawh ngai loh tur thu a sawi. India sorkar leh MNF an indo avangin Mizoram chu thing leh raw innawhna, tuboh leh dolung inkarah an awm a. Kha tih hun lai khan harsatna tamtakin Zoram a tlak buak avangin political party leh NGO-te pawh an rawn au chhuak a, kohhran aiawh 7 pawh London-ah zu kalin Pu Laldenga chu India sorkar be turin an ngen a. January 1976-ah mipui leh Kohhran ngenna avangin London atangin India ramah Pu Denga a rawn thlawk lut a, Home Secretary S.L Khurana leh Pu Denga-ten inhriatthiamna thuthlung chu ni 18.02.1976-ah an ziak a, Ni 7.7.1976-ah Mizorama Biakin tinah lawmthusawi tawngtai rualna an nei tih a sawi a. Kum 10 chhung harsatna tam tak paltlangin June ni 30.1986-ah inremna thuthlung ziah fel alo ni ta a ni. India Constitution pawh Mizoram tan bika tihdanglam (amend) hial a lo ngai ta a, constitution amendment article 371/G hlu tak kan neih tak thu a sawi. Remna alo awm takah chuan MNF chu Party thiang alo nil eh ta a. India nen inremna neiin kan lo awm ta a, hetah hian kan economy dinhmun kan sawisang zel ang a, politics-ah fullstop a awm lova kan kal zel dan tur chu kan la ngaihtuah ang a ti.

“Kan hnamin zalenna a sual avangin Mizo hnam party ‘MNF policy’ (thil tum ber) tihlawhtling tur hian Mizo hnam martar tam tak an awm phah a ni. Israel ram pawh hi a area-ah chuan Mizoram ang leka te leh zim a ni. Mahse, Nationalism-ah an chian em avangin vawiin thlenga khawvel ram ropui berte zingah a tel a, Nationalism avangin May 14,1948-ah Independent an hmu a. Salah te hruaia awmin ram hrang hrang, hmun hran hranah rahbeha an awm hnuah hruai darhin an awm a, mahse; nationalism rilru chu an put tlat avangin hun reilote chhungin an ding chhuak leh thei ani,” MNF Vice President chuan a ti.

He ta resource person chuan, “MNF danglamna chu sorkar hmasa hmalakna reng reng, ram ram tana tha turah chuan a hlamchhiah ngai lo. Kum 1998-ah kan sorkar khan District thar 5 chu congress sorkar hmasain a thu chauha a hawn kha term khat chhung lek khan pangngai takin kan function tir a, District thar 5 chhunga hmasawnna khan ram pum tan hmasawnna tam tak a paw chhuak a. Kum 2008-a, District thar 3- Hnahthial, Saitual leh Khawzawl-te chu congress sorkar kum 10 chhung khan a tipuitling duh lo a, kum 2018-ah kan sorkar leh a, thla 8 chhung lekin kan tipuitling leh hman vek a ni,” a ti bawk.

Pu Lalthlengliana chuan, “Kum 2018 November-ah kan sorkar a, krismas-in min nang zui a, 2019-ah MP (LS) kan thlang leh a. Conduct rules-in min phuar a, hnathawhna hun tha kan nei hman lo. Kum khat vel hna kan thawk dawn chauh a, Covid-in kum 2 leh a chanve vel min nuai leh a, khawvel sorkar ropui ber economy thlengin a ti chhia a, thla hmasa vel atang khan covid a ziaawm tan a, hna kan thawk ve tan dawn chauh a. Party worker ten beisei ang hna in la hmu lo tih kan hria a, lo beidawng mai suh u,” a ti.

“Congress sorkar kum 10 chhung khan hripui a leng ve lo. Kan sorkar chhung hian mihring pulh hri mai bakah ran pulh hri thlengin a leng a. Khaw chhak lamah lir a nghing reng bawk a, Burma ral tlan tam tak kan mikhual a, ramri a buai a. Bugget-a awm lo sum tam tak department hrang hranga mite pawhkhawm a ngai a. Heti chung hian Pu Zoramthanga kaihruai sorkar hun reilote hian congress sorkar kum 10 chhunga a thawh ai khan hna a thawk tam zawk. Hripui len lai khan ei leh bar, buhfai leh gas-ah harsatna kan tawk lo a, sorkar hnathawk hlawh kan ba lo a, kawngpui tha tam tak kan sial zawk a ni.” a ti bawk.

“Kan CM anga thil ti thei leh taima hi hmun dangah an awm ve ka ring lo. Union budget-ah bamboo link road atan cheng vbc 100/-, Mizoram ta tur a ziak lut a. Aizawl by pass road atan cheng vbc 500/- pek kan ni bawk. Mizoram budget piah lam, union budget atanga direct-a kan sum hmuh hi a vawi khatna a ni. Special Assistance-ah cheng vbc 400 kan hmu bawk. State sorkar sum ni lo, kan CM leh Minister ten Central sum an hai chhuah hi cheng vbc sang tel a tling tawh a ni,” Resource person chuan a ti.

ZPM leh Cingress nihna sawiin, “ZPM hi an nihna tak Zoram mipuiin kan hre chiang tawh. Kohhran, thalai, zirlai leh YMA thlengin an nihna kan hre chiang tawh a. Kum 2018 MLA inthlan lai kha an len lai ber a ni. Kha tih lai kha chuan kohhran tam takin an la thlawp a, nasa takin inthlan lehah chuan an tlahniam tawh ang. Tunah chuan an hruaitu lawkte inkar khikzia hi mipuiin kan hre tawh a, Belkeh phuarkhawm tuipai theilo ang vel an ni. Social Media-ah mi pali nga velin taima takin an vil a, an bengchheng hle a, bur ruak khawn ang chauh an ni,” a ti bawk.

“Congress hi central-ah pawh President tur an inhnawn kual mai mai a, a kungpui ber a tliak tawh a. State inthlanah an artelukawn lo chauh zel a. Mizoramah pawh an hniam zel a, a lo berah kum 10 chhung chu an la opposition ang. That loh theih lohna bawm an tihte hi That theih hauh lohna bawm tih tur ni zawk awm tak a ni,” Pu Lalthlengliana chuan a ti.

MNF Vice President chuan MNF sorkar hnuah hian inthlanna kan hmachhawn nual tawh a. MP (LS), Sinlung Hiils Council, MP (RS), V/C, L/C, Lai, AMC, Tuirial bial bye election-ah sorkarna kan siam a. Tunah MADC-ah kan thawhpui nen kan siam leh. Pathian leh mipui zarah Pu Zoramthanga kaihruai hi nakum kum tawpah kan sorkar leh ngei ngei dawn, a ti bawk.

He hun Ist session chu Pu H.Lalthlengliana Block President chuan a kaihruai a, hun hnihna chu Pu Lalrindika Sailo, Block President chuan kaihruaiin Upa Rokamlova, President Suarhliap Unit chuan hunserh a hmang. Pu Lalluaia Sailo Block Secretary chuan lawmthusawiin hun a khar.

Sd/- R.LALHMANGAIHA
Secretary
Media & Publicity Dept.
Mizo National Front
Momo No.MNF/Media/03/426
Dt.27.05.2022.

MP mal mah ni ila kan zam bik hauh lova, kan tih theih ang chinah kan tlanchhe lo a ni – C.Lalrosanga

MP mal mah ni ila kan zam bik hauh lova, kan tih theih ang chinah kan tlanchhe lo a ni – C.Lalrosanga

MIZO NATIONAL FRONT GENERAL HEADQUARTERS

PRESS RELEASE

Dated, Aizawl, 27th May, 2022(Monday)

Vawiin Mizo Hnamrun chhung inkhawm hun hnihnaah Pu C. Lalrosanga, MP Lok Sabha chuan thu a sawi a. “MP te hian palai hna kan thawk ber a- Mizoram sorkar leh sorkar laipui inkarah te, mipui leh Minister inkarah te kan thawk a ni ber. Covid vangin kum 2 leh a chanve dâwn kan buai a, sorkar laipui pawh an buai tho a. Covid dona kawngah MP Fund min cut saka, hlawh min cut sak bawk a. MP mal mah ni ila kan zam bik hauh lova, kan tih theih ang chinah kan tlanchhe lo a ni.

Assam Rifle sawn chhuah chungchang hi Mizo mipuite rilruah a tla nâ hlawm hle a, Parliament-ah te ka auchhuahpui bawk a. Union Home Minister Pu Amit Shah pawh nikum kumtawp lam khan ka hmu a, Assam Rifle sawn chhuah chungchang chauh ka sawipui a ni. Home Secretary ah te kan nawr zel a. Tun hnaiah kan Deputy Chief Minister Pu Tawnluia chu Delhi-ah a lo kal a. Assam Rifle sawn chhuah chungchanga inrawnkhawmna Aizawla nei turin hotute a rawn be pawp thei ta a. AR sawn chhuah kawngah Hmasawnna hmel a lo lang ṭan zel dâwn a ni.

Myanmar lam aṭanga raltlan lo lut, kan unaute thlavang hauh kawngah kan CM leh Minister te an ṭang na em em a. Keini pawh Parliament ah kan ṭan nat ngam phah a ni. Kan unau Raltlan lo lutte tan theihtawp kan chhuah mek a. Ṭanpuina pe tur pawhin Sorkar laipui kan dawr kual zel a. CM hmalakna zarah Sorkar laipui pawh raltlan chhawmdawl kawngah an hmin chho mek a ni”.

Mizoram Sorkar hotu hrang hrangten, Delhi lama hna bawhzui ngai an neih kawngah amah chu pur hreh lo turin MP chuan a ngen bawk. Mizoram tan theihtawp chhuah a inhuam reng tih hriatsak turin a chah bawk.

Central Sector hnuaiah Mizoramah hmasawnna hna nasa tak thawh a ni mek a. Kawngpui ṭha zawk sial mek a ni te hi Mizoram tan hmasawnna hnukpui tur a la ni dâwn a. Sorkar laipui ruahmanna in Bairabi thleng Rel kawng lian kan nei thuai dawn a ni. Central Sector lam chi reng rengah company lian emaw sorkar laipui company ten an tihtur ang ang ṭha taka an tihhlawhtlin ngei theih nan theihtawp a chhuah zel thu a sawi bawk.

MP Pu Rosanga chuan Parliament a auchhuahpui tura duh nei an awm chuan engtik lai pawhin an rawtna te a hnena thlen turin a ngen bawk.

Chhung inkhawm hi Col. Ramnundanga, Adviser, MNF General Hqrs chuan kaihruaiin Upa Dr. H. Lallenmawia, Adviser chuan hunserh a hmang.

Sd/-
LALLIANZUALA FANAI
Joint Secretary
Media & Publicity Dept.
Mizo National Front
Memo No.MNF/Media/03/2022/424
Dt.27.05.2022