Mizo National front
General Headquarters
Mizoram : Aizawl

PRESS RELEASE

BIAL HIMSA 10 KAN NEI, KAN SORKAR LEH DAWN: Pu Zoramthanga
Manipur thil thlengah MNF ropuizia a lang dawn chauh: Rajya Sabha MP

August 18, 2023: Vawiin khan MNF President & Chief Minister Pu Zoramthanga chuan Mizo Hnam Run inkhawmah mi thar lawm lutin thu a sawi a. MNF chuan bial himsa 10 a nei tiin, “Inthlanah kan sorkar leh ngei dawn,” a ti.

Aizawl East-I bial atanga voter 42 lawm luttu Pu Zoramthanga chuan tunhma lamah MNF chuan bial 5 hloh sa tlukin inthlan kan hmachhawn thin tih a sawi a. “Tunah erawh chuan Bial 10 _(Tlabung, E & W Tuipui, Thorang, Tuichawng, Lawngtlai E, Lawngtlai W, Mamit, Hachhek, Chawngte leh Dampa)_-ah ZPM leh Congress tih tham an awm lo,” a ti a. “Eptute chuan Bial 30 atangin sorkar siam turin an rawn bei dawn a, an tan beisei tur a tam lo hle ang,” a ti.

“Congress hunah an chhe vek, PC leh MNF hunah an chhe vek tia mipuite fuihtu ZPM thuvawn chu _‘MNF leh Congress ni lo’_ tih a ni. An thusawi awihtu mi tlem te chu an innghahna awm chhun a ni mai. East Tuipui, Khawzawl, Saitual, Lengteng, Kolasib leh Serlui bial han en ila an tlinna tur a vang hle.

“Aizawlah pawh en ila, an dinhmun a chhe sawt em em a ni. Candidate an set a, anmahni leh anmahni an buai a, an buai tulh tulh mai a ni. A tira sorkar tum kha tunah chuan an thaw lian ngam tawh lo. Policy mumal an nei loh vang a ni.

“Keini chu kum 60 chhung kan lungphumah nghet takin kan ding a. Anni chuan pawl an sawn apiangin policy an thlak. Kalphung mumal an neih loh avangin candidate an siam a, an buai ta vek a ni. Hei vang hian MNF a sorkar leh ngei dawn a ni,” a ti.

Pu Zoramthanga chuan Zofate politics boruak sawiin: “Burma buaina a reh dawn emaw kan tih laiin refugee tam tak an lo lut. Bangladesh atangin a za tel, Manipur atangin a sing tel an lo lut tawh a. Tripura-ah tlang mite inlak hran duhna movement a thleng mek bawk a. Hengte hi engatinge a rualin a lo thlen? Pathianin Zoram, kan Jerusalem-ah hian unau min suihkhawm a tum a ni. Enge lo thleng kan en zel ang,” a ti.

“Nationalism-a kan ngheh tlat avangin Manipur buaina (martar thlanmual) chungchangah Aizawl care-of lovin an ching fel thei lo. Union HM Amit Shah, Manipur leh Assam CM-te pawhin zan lai sawi lovin thurawn an rawn la a ni.

“Burma, Bangladesh leh Manipura kan unauten hetah vote nei lo mah se, keini aiin MNF sorkar a pian loh an hlau zawk. Kan Jerusalem-ah hian hnam thinlung pute sorkar an mamawh a, tui anga nghet lote sorkar a pian loh nan theihtawp chhuah an tum,” tiin party mipuite pawh theihtawp chhuah turin a chah a ni.

Thusawitu dang Pu K. Vanlalvena, Rajya Sabha MP chuan Lok Sabha-ah thusawina chan a hrsat dan leh Rajya Sabha-a hun chan a awlsam thu a sawi a. “RS-ah chuan member kan tlem a, thusawi tum ngar ngar chuan hun a chan mai theih. LS chu mipui thlan, leadership nei tha an ni a, hun chan a harsa,” a ti a. “RS-ah chuan, Chairman phalna leh phalna lovin vawi 14 leh 2 thu ka sawi tawh,” a ti.

Pu Vena chuan Manipur buainaah hian parliament member-te chuan nakuma LS inthlan lo awm turah BJP sorkar paih nan remchang an la tih a sawi a. “Kan unaute an tan vang a ni lo, Rahul Gandhi pawhin a tan chuang lo. BJP sorkar tihmualpho hrim hrim an tum. Keini erawh chuan kan unaute tawrh chen tawrh kan huam vang a ni. Anni chuan tribal thlavang an hauh lova BJP sorkar tihmualpho chiah an tum,” a ti.

Manipur thil thlengah MNF ropuizia a lang dawn chauh tih sawiin, “Tuna kan unaute luah ram saw MNF-in Mizorama rinluh thin a ni. Amaherawhchu, anmahni lamin kan lama beh an chak lo. Tunah erawh chuan kan hnena beh an chak tak tak tawh a. Kan thenawm unaute hian kan Chief Minister hi hotuah an rawn pawm tlat a ni,” a ti.

“Pathianin zofate daidanna ramri min thiahsak mek a, tunah hian thinlung ramri a chim ta mek a. Rorelna pakhat hnuaia awm thu aupui thin mah ila, a chhunga chengte thinlung a inrem loh chuan a thleng thei lo. Tunah hian kan thinlung a inzawm mek a ni,” Pu Vena chuan a ti bawk.

Inkhawm hi Upa K. Lalthawmmawia (NCC, MNF Gen Hqrs)-in a kaihruai a. Upa PC Lalhmingthanga (Ex-Mayor & Secretary, MNF Gen Hqrs)-in hunserh a hmang a. Mi thar lawm luh atangin thusawi ngaihthlak a ni bawk.

Sd/-
(MALSAWMPUIA RALTE)
Jt. Secretary
Media & Publicity Department
Mizo National Front
Memo No. MNF/Media/04/2023/822
Dt. 18.08.2023