Mizo National Front
General Headquarters
Aizawl : Mizoram
Press Release
ASSAM RIFLE AN INSAWN TAN TA, PU ZORAMTHANGA HMALAKNA KAN CHHUANG TAKZET – MNF
Hun rei tak ata lo ri tawh, Mizo mipuiten beiseina nena kan thlir, Aizawl Khawpui atanga Assam Rifle insawnchhuah chu a takin alo thleng chho ta a, hemi kawnga Mizoram Sawrkar, Pu Zoramthanga kaihhruai hnathawh hi a ropuiin MNF chuan kan chhuang takzet a ni. Mutmawh hnarmawha neitu kan Chief Minister tumruhna leh thahnemngaihna hi Mizo mipui tan a chhuanawm takzet a ni.
Ṭhenkhatten ringlo a, deuhsawhna chitin reng nena beih a nih lai pawhin, Chief Minister Pu Zoramthanga hian a tum athulh chuang lova, chawl lovin a hmalakna kalpui zelin central lama thuneitute a dawr reng a, vawiinah ahlawhtlinna ruangam alo lang ta hi, Aizawl khawpui leh Mizoram tan mellung pawimawh tak a ni reng dawn a ni.
AR in an hmun an chhuahsan tur chungchangah mimal thil tithei leh sawrkara hamṭhatna dawng thei chinte insem ral leh neih mai mai tura ngai tuten, buan a hma in nasa takin an lo kherh tawh a. An chhuahsan ram hi mipui tan leh ram tana hman ṭangkai turin Mizoram Sawrkar Pu Zoramthanga kaihhruai chuan ngaihtuahna lo seng lawkin, mimal tana neih theih loh turin thu Assembly House ah kum 2002 khan, The Mizoram (Restriction on use of Transfered Land) Act, 2002 chu alo pass tawh a, Notification pawh 20th November, 2005 khan alo chhuah tawh a. Siamṭhat ngai, thuawihlote hremna dan turah hmanni maia Budget Session neih zawh takah khan, The Mizoram (Restriction on use of Transfered Land) Amendment Act, 2023 alo pass fel dim diam tawh zawk a ni. Mipui punkhawmna lian tham awm theihna turin ‘Mizo Hnam Pa, Pu Laldenga’ hriatreng nan Laldenga Convention Center ropui tak din a ni dawn a ni. April ni 1 hian Union Home Minister, Amit Shah pawhin a lung phum a rawn phum dawn a ni.
Hun kal tawhah, thil tihtheihna hmangin mi engemawzat in AR luahchin ram hi mimal tan an lo nei ru tawh a. Chungte pawh mipui tana hlan let leh tura ngenin, mi engemawzatin an lo hlan let tawh a. Hlan let duhlote pawh an ram chhuhsakna tura hmalak zel a ni a, thehlut duhlo ten an thehluh thuaina tura hma lak chhunzawmin CYMA chuan kum 2020 khan High Court-ah PIL an thehlut a, hmalakna a khaihlak ta deuh a. Tunah hian Mizoram Sawrkar chuan heng ram neitute hi an ram te sawrkara hlan let turin vawiin khan ‘Show Cause Notice’ No.C.15016/2/21/2020-legal/DTE(Rev) chu mi 54 hnenah a pe chhuak nghal bawk a ni.
Mipuite hamthatna tura kan sawrkarin huai taka ke an pen hi MNF chuan thlamuan thlak kan ti takzet a. Political Party dangte hmalakna ni lovin, Pu Laldenga hunlai atang tawhin AR te hi eviction order pek an lo ni tawh a, chumi hnua Pu Zoramthanga kaihhruai MNF sawrkar kum 1998 a rawn sawrkar tan leh khan AR ram luah mek zau tak chu chhuhsakin, Mizoram New Capital Complex(MINECO) hi din alo ni ta ni. Khawpui tawt lutuk tur tihzia awm nan Sawrkar Office hlawm lian zawng zawng deuhthaw dah nan leh, Sawrkar hnathawk za tel ten an luah turin Quarter sak ani tawh bawk a. Khaw thar lian tak anga ngaih theih, Mizoram New Capital Complex(MINECO) chu din niin, Mizoram mipuiin kan tangkaipui em em a ni. Hmathlir thui tak nei, kan Chief Minister leh MNF President ni bawk hi Mizoram tan rohlu berte zing ami a ni.
Khawpui atanga sipai sawnchhuak an awm la hre ngailoten, nasa taka an beihna kara Mipui leh ram tana ngaihtuahna seng tlattu, beidawng ve ngailo Chief Minister kan nei hi MNF chuan lawmawm kan ti a, a hmalakna hi kan thlawp tlat zel dawn a. Ṭhenkhatten Tawlailir ring chunga an selna karah beiseina nung nei a, Pathian rinchhan tlat chunga hnathawktu Pu Zoramthanga hi kan fakin kan chhuang takzet a ni.
Sd/-
(VL. KROSSHNEHZOVA)
General Secretary
Media & Publicity Dept.
Mizo National Front
Memo No.MNF/Media/04/2023/630
Dt.24.03.2023.