ALL PARTY LEADERS MEETING-AH MP PU C.LALROSANGA’N MANIPUR BUAINA LEH UCC CHUNGCHANG SAWI CHHUAK

Nimin July ni 19, 2023 (Nilaini) a neih tan Parliament Monsoon Session-in buatsaihna All Party Leaders meeting Parliament Library building Committee Rooma nimina neihah Mizoram MP pahnih Pu C.Lalrosanga leh Pu K.Vanlalvena te an tel a. Session chhunga sawiho tur Bill chhawp chhuah tur 31 thlirlawkna neih a ni.

MNF party aiawha thusawitu Pu C.Lalrosanga chuan kan thenawm state-a awm Manipur buaina chungchang chu parliament session laiin sawihona hun siam ngei tul a tih thu te, mipui tamtakte nunna leh bungruate a luan ral tawh avangin a rang thei ang bera buaina tih tawp a tul thu te, thenawma awm kan nih avangin raltlan tamtak Mizoramah an rawn luh thu te, sorkar, kohhran, NGO angte leh mimalin kan theih tawpin kan pui thin thute leh sorkar laipuiin chhawmdawlna Mizoram sorkar kuta a pek ngei a tul thute a sawi chhuak a. Tun hnaiah Prime Minister zahawm takin Uniform Civil Code chungchang a sawichhuah thar avangin Parliament session-ah Bill anga a lut lo anih pawhin sawihona hun siam ngei ni se, kan duh loh chhante chiang taka sawi fiahna hun siam law law tha a tih thute a sawi chhuak bawk.

Tun tum Parliament session-ah hian Bill chi hrang hrang 31 sawiho tura chhawp chhuah a ni a. Chung zingah chuan Christiante leh Tribal hnamten kan ngaimawh em em Uniform Civil Code Bill erawh chhawp chhuah zingah a tel rih lo thung a ni.

MNF chuan Mizoram MP-te pahnih hian Parliament-ah Mizoram, kan sakhua leh hnam tan theihtawp an chhuah thinna chu lawmawm a tiin a chhuang thin takzet a ni.

He meeting hi Union Defence Minister Pu Rajnat Singh an a kaihruai a ni.

Sd/-

(R.LALHMANGAIGA)

Secretary

Media & Publicity Deptt

Mizo National Front

Memo No.MNF/Media/04/2023/804

Dt.20.07.2023