Mizo National Front
General Headquarters
Mizoram : Aizawl
Press Release
AIZAWL SOUTH-III BIALAH MI THAR 258-IN MNF ZAWM THAR
Kohhran leh mipuiten ram hruaitu dila an tawngtai chhanna chu MNF ministry Pu Zoramthanga kaihhruai sorkar a ni
– Prof.F.Lalnunmawia, MLA
Vawiin November ni 29, 2022 (Thawhlehni) hian Aizawl South III South Block huaihawtin Political Training chu Sumsuih-a Neuva Hall-ah neih a ni a. He huna khuallian bialtu MLA Prof F.Lalnunmawia chuan mithar 258 (Congress -186, ZPM- 17, BJP-11, Neutral-44) te chu MNF ah a lawm lut.
Khuallian Aizawl South III Bialtu MLA chuan, “Kum 2018 MLA election dawna kohhran leh mipuiten ram hruaitu dila an ṭawngṭai chhanna chu MNF ministry Pu Zoramthanga kaihhruai sorkar hi a ni. He sorkar hnuaiah hian hrileng avanga hun khirh tak kan tawk chung pawhin ei leh barah harsa lutuk loa kan awm leh Covid-19 vanga nunna chan tlem ber state zinga kan tel hi a lawmawm tak zet a ni. Kan sorkar-in hmachhawp lian tak tak kan nei a, mi ṭhenkhat ten MNF sorkar hi Central lamah zu hek ṭhin mahse Delhi tlanga kan CM thil tih theihzia kan hmu chho mek a ni. Hmanni lawkah Sports Minister hnung zuiin Central sorkar Finance Ministry ka zu dawr ve a, kan CM Pu Zoramthanga hi Central sorkar hotute hian an ngaih pawimawh zia a tak ngeiin kan zu hmu ve a ni” a ti.
Prof Mawitea MLA chuan “Kum 4 kan sorkar chhungin kan bial chhungah hmasawnna engemawzat kan hmu a, sawisen vek a ni lo. MLA Fund pawh theih anga ṭha leh ṭangkaiin kan hmang a, khua leh vengchhung cheina leh inkalpawhna bakah mi harsate insakna, inchung rangva atan te, damlo mangang zual ṭanpuina atante enfiah ngamin kan hmang a ni” a ti bawk.
He huna Resource Person Pu TC Pachhunga, Ex MLA & Vice Chairman, Sports, ICT & Tourism Development Board pawhin thu sawiin, “MNF sorkar hnuaiah inkalpawhna kawng pawh nasa taka sial leh sial belh tum mek zel a ni. Sports, IT leh tourism tih hmasawn nan ADB aṭangin EAP sum ṭhahnem tak Mizoramin kan hmuh belh leh dawn a ni” a ti. Congress chungchang sawiin, “Central-ah an pute belh tur an nei tawh lova, an phur thei tawh lo, chuvangin Congress belh chu ni tlak hnua nilum ai tum ang a ni” a ti a. “ZPM pawh kalphung thar an han sawi chuan lung ti leng ve awm takin an lang na a, mahse a takah han belchiang dawn ila, a tak awmlo ralkhata chhimbal leh romei ang mai an ni. An hotu lawkte pawh nihna phuahchawp ahte an ruat a, an in pumkhat hlei thei si lo. MNF Workers-te hi kan lungrual phawt chuan kan sorkar leh ngei ang” a ti bawk.
He hun hi Pu H.Vanlalrova, Block President, MNF Aizawl South III South Block-in kaihruaiin Pu Rosiamliana Ralte, Wake-up Ministry-in hunserh a hmang a. MNF Gen Hqrs leh Aizawl South III North Block hruaituten hman puiin bial chhung khaw hrang atangin mi MNF Workers ṭhahnem tak an tel a ni.
Sd/-
(R.LALHMANGAIHA)
Secretary
Media & Publicity Dept
Mizo National Front
Memo No.MNF/Media/03/2022/565
Dt.29.11.2022