Mizo National Front
General Headquarters
Mizoram : Aizawl

Press Release

AIZAWL SOUTH III BIAL CHHUNG MI MZU HNUAIA UG EXAM LEH PG EXAM A TOP TEN TLINGTE CHAWIMAWINA HUN BIALTU MLA IN BUATSAIH

Vawiin July ni 14, 2023 (Zirtawpni) chawhnu dar 1 hian Aizawl South lll bial chhunga MZU hnuaia UG exam leh PG exam-a Top ten tlingte chawimawina leh lawmpuina hun chu Aizawl South III bialtu MLA & Vice Chairman Horticulture Dev.Board Prof.F.Lalnunmawia office chamber-ah neih a ni.

He hunah hian Aizawl South III Bialtu MLA Prof.F.Lalnunmawia chuan thu sawiin, “Hna ṭha hmu turin competition a sang hle a. Kawng hrang hrangah exam-te in la hmachhawn ang. Graduate chu mite pawn puitling china an ngaih a ni a. Hlawhtlinna chang turin taimak leh zual zel a ngai thung a ni,” a ti.

Prof.Mawitea chuan, “A rah lo tur chuan a zar sang zawk lawn leh zel a ngai ṭhin ang hian, tha thlahlo leh beidawng lova beih chhunzawm zel a ngai a. Mahni thahnem ngaihnaah kan hlawhtlin leh tlinloh a innghat nasa em em a ni. Vawiina zirlaite hi Nu leh pate tana innghahna tlak ni zel turin ka beisei cheu a. Kan bialin zirlai chhuanawm heti zat kan nei hi ka chhuang takzet cheu a ni,” a ti bawk.

He hunah hian zirlai chawimawite aiawhin Lalmuanawma Chawngthu MCA Gold Medalist (MZU) chuan thu a sawi bakah nu leh pa te aṭangin thusawi ngaihthlak a ni bawk.

Sd/-

(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/799
Dt.14.07.2023