Mizo National Front
General Headquarters
Mizoram : Aizawl
Press Release
A TUI A PIANG EI LOVIN, A HRISEL LEH HRISEL LOH NGAIHTUAH HMASA THIN ANG U
– Dr.R.Lalthangliana, Health Minister.
December ni 5, 2022 (Thawtan) zan 7:30pm khan United Pentecostal Church of North East India Aizawl East District chuan Vanapa Hall Aizawlah ‘No Tobacco Week’ hawnna hun an hmang a. He hun hi Rev.C.Lalthlamuana, District Treasurer chuan kaihruaiin, Week hawnna leh thu chah Dr.H.Lianthangpuia, District Superintendent chuan a sawi.
He hunah hian Health Minister Dr.R.Lalthangliana chuan ruihhlo ti miten pulpit tlang an chan lohna kohhranah thu a sawi thei chu lawmawm a tih thu sawiin, Covid-in kum hnih tha zet min nuai a, khawvel ram ropui ber leh Doctor thiam rual tamna ram, medical science lamah pawh mi chungchuang tamna ram pawh an tlawm ruih ruih a, nitin a sing biin nunna hlu tak an chan ruih ruih a. Khawvel ram ropui berte zinga mi German pawh an State Finance Minister meuh pawh Covid dinhmun a thlir khan manganthlak a ti takzet a, amah leh amah a intihhlum phah hial anih kha. India ram pawh Covid-ah khan nasa takin a tlawm a. Covid vang khan khawvelah mihring nuai hlir nuai 66 velin nunna an chan a ni. Mizoramah chuan VLTF, LLTF, kohhran, sorkar leh mimal tinte kan thawhhona leh tanrualna Pathianin mal min sawm a, nunna hlu tak tak chan zinga a tam zawk pawh kha Covid vei lo mahse, natna khirh tak thihpui ngei ngei tho turte an ni a, ram dang ang em em chuan nunna kan chan nasa ve lova, Pathianin min humhim a ni. Kei a hminga Health Minister pawh hi Pathian zarah Covid vanglai khan vawi khat pawh luna ka nei lo. Covid donaah tangrualin thawk tha mah ila, Cancer leh HIV-ah erawh a mi cheng tam dana chhutin India ramah a hluar berna ram kan ni hi a pawiin a zahthlak takzet a, heng ho do tur hian kohhran hi platform nei tha ber kan ni a, i hmang tangkai thiam ang u, a ti.
Health Minister chuan No Tobacco week a pawimawhzia sawiin, UPC North East kohhran hian Lalpa duhzawng inti a, tunah hian thalai leh kum upa lam tan pawha pawimawh ber chu Vanram kawng kan pan mek lai hian midangte tanpui leh an tana pen chhuah hi a ni. Mihringte hi kan dam hun chhung hun bi tuk kum 70 a ni a, chakna avangin kum 80 pawh a ni thei tih a ni a, a bak hun hi chu a tlem tawh hle a, vaihlo leh a kaihhnawih thil hian kan dam hun chhung nasa takin a pawttawi a, a ti thinte pawhin kan sim hram hram a pawimawh takzet a ni. Kan lo hrisel zawk nan Mizote hian a tui a piang ei lovin, a hrisel leh leh hriselloh ngaihtuah hmasa thin ang u. Hmelthat leh hmelchhiat hi ruihloah kan insum theih leh theih lohnaah a innghat a, zanin a he hun hawnna hun kan hman hian Mizote tan rah tha tak chhuah mawlh rawh se, a ti bawk.
Vawiin December ni 6th, 2022 (Thawhlehni) chawhma hian NSS PUC Unit Golden Jubilee lawm nan PUC Campus-ah NSS Blood Donation Camp neih a ni a, Aizawl Civil Hospital-a Blood Bank hotute leh HDFC tangkawpten an buaipui a. He hunah hian Health Minister, Dr.R.Lalthangliana chuan Blood donation-ah hian kum dangah ka tel zauh zauh thin a, ka zin tam avangin kuminah chuan ka vawi khat telna a ni a, he hun hi ka tan a hlu hle a ni. Thisen pe tam hi an hrisel duh a, an hmel pawh a tha tlangpui a, thisen hi kum naupang leh upa tan pawh pek theih vek a ni. Kum 1990 khan Japan ramah ka kal a, Japan ho damreina chhan ka zawt a, ke in an kal tam a, office leh college naupangte hi kein an kal nasa hle a, tui an in tam a, chi an ei tlem a ni. Kan hriselna hi kan ei leh inah thui tak a innghat tih hria ang u. Vawiina kan thil tih hi a pawimawh a, zan laiah thisen var tlachhamte an awmin mi mangang thenkhatin min phone a, Doctor-te ka phone tho thin a ni. Thisen tlakchham avang hian kan invui liam fo thin tih hriain thahnemngai taka midangte tan thisen pe zel turin Zoram mipui ka chah duh a ni. Vawiina sum senga rawn pen chhuak HDFC-te chungah pawh lawmthu ka sawi bawk a ni, a ti.
Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/570
Dt 06.12.2022