Prese Statement of Dr. R. LALTHANGLIANA, Sr. Vice President,

Prese Statement of
Dr. R. LALTHANGLIANA,
Sr. Vice President,
Mizo National Front
25.05.2024
Mizoram Police 1047 zet MP Election 2024-a vote thlak thei lova siamtu Mizoram Sorkar
Lok Sabha MP thlanna April ni 19-a neih takah Mizoram Armed Police 1047 zette vote thlak thei lova siam an ni hi MNF Party chuan pawi kan ti takzet a, Mizoram sorkar inthlahdah vang liau liau a ni tih a chian avangin heng kan police chhuanawm tak takte lakah hian ZPM sorkar hian ngaihdam a dil ngei turah kan ngai.
Mizoram Armed Police atanga Election Duty tura tirh chhuahte hi Company 15, sipai 1047 an ni a, state 3- Bihar, Uttar Pradesh leh Madhya Pradesh-ah te duty tura tirh an ni a, Mizoram sorkar hian heng police officer rualte Election Duty tura a tirh liam hma hian Postal Ballot hmanga vote an thlak  theih dan tur ruahmanna siam theih a ni ngei dawn tih chiang reng chung si a, vote thlak thei lo tura ruahmanna a siam kher kher hi kan police te dikna chanvo rahbehsakna langsar tak, Mizoram Election History ah thil la thleng ngai lo a ni a, thleng nawn tawh lo se kan duh em em a ni.
Hemi chungchang chiang zawka hriat tumin kan hotuten theih tawp an chhuah a, chumi atanga an hmuh chhuah dan chuan Ministry of Home Affairs, Govt. of India atanga ngenna Mizoram sorkarin a dawn bawhzuiin, Mizoram sorkar thuneitute chuan vote an thlak dan tur pawh engmah ngaihtuah fel sak hmasa lovin heng kan sipai chhuanawm tak takte hi state pathum-a Election Duty turin an pawngpaw tirh liam tawp mai a, chuvang chuan Mizoram in-a vote kan thlak ni 19.4.2024 ah vote an thlak ve thei ta lo a ni.
Ministry of Home Affairs hian heng kan police te hi a hnuaia tarlan ang hian an in report hun turah rawtna a rawn siam a:
(1) Bihar – 1.4.2024
(2) Uttar Pradesh – 1.4.2024
(3) Madhya Pradesh – 8.4.2024
A chunga tarlan ang khian an duty-na hmun tura in report hman turin a hnuaia mi ang hian Rel ticket laksak an ni ta a:
(1) Bihar-a duty turte tan– 29.3.2024
(2) Uttar Pradesh-a duty turte tan – 28.3.2024
(3) Madhya Pradesh-a duty turte tan – 3.4.2024
Mizoram bika MP thlannaah March ni 30, 2024 kha Candidate te tana inhnuhdawh theih ni hnuhnung ber a nih chauh avangin, Postal Ballot tak ngial pawh chhut fel anih hmain, kan sipaite hi state pawna Duty tura tirh chhuah nghal rum rum an ni tihna a ni.
General Parliamentary Election (GPE)-2024 ah hian rampumah thawh 7-a vote thlak tura ruahman a ni a, thawh khatna chu April ni 19 ah, thawh hnihna chu April ni 26, thawh thumna chu May ni 7, thawh lina chu May ni 13, thawh ngana chu May ni 20, thawh rukna chu May ni 25 leh thawh sarihna chu June ni 1 ah te vote thlak tura ruahman a ni a. Mizoram sorkarin ruahmanna felfai nei nise, Ministry of Home Affairs in Mizoram Police-te Election Duty tura ruahmanna a rawn siam ang anga vote thlak hmaa intir liam mai lovin, kan police te hi inthlanpui vote thlak thawh thumna leh a hnu lama duty tur pawhin ruahmanna a siam theih em em dawn tih a chiang a. Hetiang ruahmanna siam ngam lo/siam nachang hre lo sorkar kan hrawn avanga kan police officer 1074 zetin vote an thlak theih loh phah ta hi an dikna chanvo rahbeh/palzut sakna, engti zawng maha sawifel ngaihna awm lo, thil dik lo leh Mizoram sorkar tana zahthlak tawp khawk a ni tih hi mipuiten hriain I dem ngam ang u.
Mizoram Police hotuten an nauten vote an thlak theih loh mai hlauthawnga an theih ang anga hma an lak lain, Sorkar hotu lam atangin nawrpuina thawm hriattur pakhatmah a awm lo a. April ni 17, 2024 khan IGP Mizoram (State Police Nodal Officer) chuan an naute mi 1047 laite hian vote an thlak lo mai ang tih hlauthawngin Chief Electoral Officer Mizoram hnenah vote an thlak ve theihna tura ruahmanna siamsak turin lehkha a thawn leh a, chu lehkha chu Chief Electoral Officer chuan ECI hotute hnen lamah thawn chhawngin, ECI atanga lehkha F.No.464/MIZ-HP/Misc./2024/NES-I, Dt. 1.5.2024 ah chuan heng kan police 1047 laiin vote an thlak ve theihna tur kawng a in hawn tawh loh thu an rawn hrilh ta mai a, (Enclosed copy of letter Dt. 1.5.2024). ECI sawi dan chuan heng kan Police te hi RP Act 1950, Section 20(8)(c) in a sawi anga Service Voters an nih ve loh avangin anni ho tan hian ETPB (Electronically Transmitted Postal Ballot) hmanga vote thlaktir ve theih an ni lo. Tin, Conduct of Election Rules 1961 hnuaia Rule 18A tlawh chhanin election duty a kal turte chuan an postal ballot hmanga vote an thlakna tur hmun awm chhun chu Returning Officer in a hmun ruat bik (Dedicated Facilitation Centre) ah chauh a ni ang a, mahse, Mizoramah Dt. 19.4.2024 ah vote thlak a nih tawh si avangin heng Police te tan hian vote thlak ngaihna a awm tawh lo a ni tiin Election Commission chuan a lo chhang a ni.
Hetiang a nih tak avang hian Mizoram Armed Police 1047 zette chuan tun tum MP Election-ah hian Dan in a phalsak leh a phut ngawih ngawih anga an aiawhtu tur MP thlannaah vote an thlak ve thei dawn ta lo a. Mizoram sorkar hian heng police officer rualte Election Duty tura a tirh liam hma hian Postal Ballot hmanga vote an thlak theihna turin Home Ministry lam dawr theihna hun zau tak a nei chung sia vote thlak thei lo tura ruahmanna a siam kher kher hi Mizoram Election History ah thil la thleng ngai lo anih mai bakah thleng nawn tawh lo se kan ti em em a ni.
Kan Chief Minister zahawm tak IPS officer nihna bansana ram mipuite hmangaih avanga politics field-a rawn zuanglut ta nia insawi thin hian kan Zoram police officer te hi engahmah ngai lovin, state danga Law and Order keng kawh tura central sorkarin an nawm an maka an pawh kual vel mai mai chung pawha a ngawih reng si chuan, keini talin an thlavang hauhin an dikna chanvo palzuta awm mek hi auchhuahpui lo thei lo niin kan in hria a. Assembly Session ah pawh kan police chhuanawm tak takte hi hmusit takin, kut leh ke vung ber bur tia a lo sawi chhuah tawh bakah, Shillong-a a thusawinaah Police Dept chu amah leh a thawhpuite phiarru-ah a lo puh tawh bawk a, hengte avang hian kan police chhuanawm tak takte chungah hian hlei a len chho ta zel em ni tih hi zawhna lian tak niin kan hria.
Issued by 
Media & Publicity Dept.
Mizo National Front

Leave a Reply

Your email address will not be published. Required fields are marked *