Mizo National Front
General Headquarters
Mizoram : Aizawl

Press Release

HNAM THUTHLUNG KENGTU CHU MNF KAN NI -Pu R.Tlanghmingthanga, Ex-MLA, NCC Member

Zirtirtu 28 te hi Chief Minister-in a bantir niloin Court-in thiamloh achantir avang a bang mai an ni. -Pu C.Lalmuansanga MDC, LADC

Vawiin ni 6.5.2024 Thawhtanni hian Mizo Hnam Runah Chhung Inkhawm neih a ni a, MNF Core Committee Member Pu R. Tlanghmingthanga chuan thusawiin, MNF nihna dik tak nia a hriat sawiin, hnamthuthlung kengtu MNF kan nihnaah kan infuih that deuh deuh a ṭul, a ti.

MNF NCC member Pu Tlanga chuan, Kan nihna dik tak kan inzirtir tawk lo thin niin ka hria, a ti a. Pathian min siam chhan hre chhuak a, tipuitling tura bei tur kan ni, a ti. Kan Founder President Pu Laldenga ho khan vai tlangvalin mizo nula an kalpui ral ral kan hmuh khan kan rilru a na a, vai tlangvalin mizo nula an kalpui a nih chuan an karah kan tlazep ngam tur a ni kan ti a, chumi ti ngam lo chu pawnfen feng tlak kan ni tihna a ni, a ti. Pu Laldenga leh a thuihhruai khan Mizo hnam humhalh thupui bera neiin, hnam damna tura thawhna hmanraw tha ber chu Independent a ni a, Independent puang tur chuan he Mizo National Front hi a lo piang ta a ni, a ti.

Pu Tlanga chuan, he hnam thuthlung kengtu chu MNF hi a ni a, kan pasalthaten kum 20 zet thi leh thau pawlha nunna thapin an bei a, hnam ral lohna tur leh min chimral lohna turin India mipui danna atana Independent kan sual a ni tih an hria a. Inremna atan pawh phal takin, In state boundary chhungah in sorkar thu lovin tumah an lo lut lovang a, in state inenkawlna senso indaih lohna pawh special category state enkawlna zul zuiin enkawl in ni ang, tih chu India Constitution Article 371G ah dahluh a lo ni ta a ni, a ti bawk.

Pu H. Lalmuansanga MDC, LADC pawhin thusawiin, MDC ah hian bung thar kai tumin ke kan pen ve dawn emaw kan tih laiin, kan thian thenkhatten kan party atanga kan pui chhuah ve ZPM te nen chang dang min kansan ta si a. Kan hotuten hma an la zel a, kan first priority chu MNF party sorkar din a ni a, kan chairman V. Zirsanga pawhin a nihnate kianin ni 17, April khan CEM nihna a bansan ta a, MNF chu nghet takin kan la ding zel a, General Headquarters-a kan President kaihhruaina in lam kalte inruatin, Pu Robert Romawia Royte MLA leh Pu H. Biakzuava Ex-MLA ten theihtawp chhuahin min buaipui a. BJP duh loin LADC ah mipuiin sorkar neih an duh vangin Cong nen kan thawkho a. Kohhran leh khawtlangin Lai ram sawrkar siam an duh angin, a tawpah Congress MDC neihchhun Pu C. Lalmuanthanga hruaina hnuaiah kan ram leh hnam tan tiin, thawhhona agreement kan siam thei ta a ni, a ti.

Kan MLA Pu Robert Romawia Royte leh Pu Dawngtea te chungah abik takin lawmthu kan sawi a, ZPM state sorkar pawhin tha taka min thlawp avangin lawmthu kan sawi bawk a ni, a ti.

Pu H. Lalmuansanga chuan, Zirtirtu 28 ban takte chungchang sawiin, 18th Provincialise chhunga mi an ni a, kum 2018 a lakte niin, court in thiam loh a chantir ta a. Khang zirtirtute khan court in a hremna an pawm a, an khinglet lem lo. Zirtirtu 28 te hi Chief Minister-in a bantir niloin Court-in thiamloh achantir avang a bang mai an ni, a ti bawk.

Chhung Inkhawm hi Pu T. Lalhmachhuana, General Secretary in a kaihruai a, Pu R. Lalthanmawia Adviser, MNF Gen.Hqr. in hunserh a hmang a ni.

Sd/-

(B. LALHMANGAIHZUALA)
Jt. Secretary
Media & Publicity Deptt
Mizo National Front
No. 83/2024
Dt. 06.05.2024