Mizo National Front
General Headquarters
Mizoram : Aizawl
Press Release
PU K.VENA HI ASSAM RAMRI BUAIAH KAN THLAMUANPUI A, CAB LEH UCC A DO HLAWHTLING A, MANIPUR LEH MYANMAR RALTLANTE TAN PARLIAMENT-AH A AU CHHUAK – Zoramthanga, MNF President

Dated, Aizawl, 28th, 2024 :- Nimin atanga vawiin thleng khan Champhai Bethel kawn, Khawzawl leh Kawlkulhah MNF President Pu Zoramthanga chuan Parliament (18th Lok Sabha) inthlanpui lo awm tur atan Street Campaign leh public meeting a nei chhunzawm zel a.
MNF President Pu.Zoramthanga chuan kum 2023 MLA General Election-ah Zoram mipui thutlukna (mandate) kan pawm thlap a. MNF chu Pathianin hun a tihah a thukru a, a hun a tih hunah a chawisang leh thin. Chumi a lo thlen dik theih nan chuan sorkar thar a pian phawt a ṭul zawk a ni, a ti.
Kan hma lawk April 19, 2024 khian Mizoram aiawh tur MP kan thlang dawn a, MP hi enchhin a thlan chi a ni ve lo. Pi leh pu nei nei ṭha phei chu thlan chi a ni lo, he laia pi leh pu neih ṭhatin Parliament-ah awmzia a nei lo tih Zoram mipui ten i hre nawn ang u.Tun hmain Mizoramin ‘MP ngawi reng’ kan nei thin a, an lar lovin mipui pawn kan ngaihven em em hran lo. Amaherawhchu, kum 2022 a lo her chhuah meuh chuan, MNF chuan MP(RS) Member atan Pu.K.Vanlalvena kan han thlang chhuak a. Mizoramin hun rei tak ata ‘MP ngawi reng’ kan lo neih tawh thin chu rawn sawidanglam dawrhin Mizoram mipui aiawh a nihzia a rawn pholang ta hmiah hmiah a. Tin, Mizoram tan a huaisenzia leh he hnam a hmangaihzia hi Delhi tlangah an tlangaupui ta piap piap mai a. Vawiinah chuan ṭhangtharten a huaisenna leh ram a hmangaihzia kan sawi ta sup sup mai a. ‘Mizoram Mipui MP’ tia koh a lo ni ta hial a ni.
Mizoram MP awm tawh ah Pu K.Vanlalvena tluka Mizoram mipuiin an thlamuanpui hi an awm lo. Kan MP candidate Pu K.Vanlalvena chu fak hranpa ngailo leh Zoram mipuiin an hmelhriat sa ani tlat. Assam ramri buaiah kan thlamuanpui a, CAB leh UCC a do hlawhtling bawk. Chutah Manipur raltlan leh Myanmar raltlante tan Parliament-ah huaisen takin a au chhuak a, Mizoram tan chuan a theihtawp tak meuh meuh a chhuah tih chu Zoram mipui pawn kan thlamuanpui danah a lang chiang hle, a ti.
Chuvangin MNF ni lo Congress nilo sorkar mipuiin kan piantir tawh a.Tunah chuan Delhi tlanga Mizoram aiawh tur kan thlang dawn. Hei hi chu a dang daih tih Zoram mipuiin kan hriat a ngai. Central-ah BJP sorkar a din a rinawm leh hle a. BJP sorkar a rawn ding leh anih phei chuan MP huaisen, ram leh hnam hmangaih Pu.K.Vanlalvena te ang kan mamawhna a sang hle dawn a ni, a ti a.
Pathian ring ngamin thalaite khawvel thar siam tur leh Delhi tlanga Mizoram tan a hnathawk thei tur kan hriat chian sa Pu K.Vanlalvena “Zoram MP Candidate, i Vote ṭheuh ang u,” tiin Zoram mipui zawng zawng ka sawm a ni e, a ti bawk.
MNF President hi Ex-Minister leh Ex-MLA engemaw zatin tawiawmin thu an sawi bawk.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.46/2024
Dt.28.03.2024.

Leave a Reply

Your email address will not be published. Required fields are marked *