MNF MP CANDIDATE ATAN MP NI LAI PU K. VANLALVENA

Tute nge NDA Sorkar do na ngam ber..? MNF kan ni: Pu Zoramthanga

Vawiin ni 22.03.2024 khan MNF President Pu Zoramthanga chuan Parliament (18th Lok Sabha) inthlanpui lo awm tur atan MNF Candidate a puang a. Candidate tur chu Rajya Sabha member ni lai Pu K. Vanlalvena, NCC Member, MNF GHQ a ni.

Mizo Hnam Runa MP Candidate puanna inkhawmah hian Pu Zoramthanga chuan thu a sawi a. “Kan Lok Sabha MP candidate hi Rajya Sabha MP ni lai, Mizoram mipui aiawhtu leh thil tha tam tak titu a ni,” a ti.

Opposition atanga MP inthlan hmachhawn a huphurhawm tiin, “Pathian remruat a lo thlen chuan MNF chhiat ber lai – kum 1998 MLA inthlanah kan chak a, MP pawh kan nei chho mai. Hei hi MNF-te kan kalphung a ni.

“Tunah hian MNF ni lo, Congress ni lo, enchhin hunah kan awm. MNF sorkar kha la ding zui ni se, min beitute min vawmna kg 1 kha tunah chuan kg 2 a ni hial tawh ang. Kum 2028-ah chuan kan chhe nasa hle ang. Hei vang hian Pathianin MNF-te min thukru rih a ni,” a ti.

MNF President chuan NDA chungchang a sawi a. “NDA chu political party hrang hrang thutkhawmna mai a ni. Keini chuan kan thuthlung kan kalsan ve ngai lo. India nen kan inremnaah pawh Mizote sakhua (Christianity) humhimna turin kan nawr tlu. Kan hnam himna nghawng thei thilah Central NDA Sorkar do zawngin kan kal zel. CAA, FMR, Assam-Mizoram ramri leh Manipur unaute buainaah kan dinna kan la sawhsawn ngai lo. NDA do na ngam ber chu tute nge…? MNF kan ni,” a ti.

Pu Zoramthanga chuan: “Parliament House-ah Mizote tan tunge huaisen ber ang? Pu Vena hi tun dinhmuna kan hriat leh kan hmuh mek, Paliament-a kan mi huaisen, kan Chawngbawla a ni,” a ti bawk.

Lok Sabha MP Candidate Pu K. Vanlalvena pawhin MP candidate atana ruat a ni chu lawmawm a tih thu a sawi a. “Inthlan campaign nan sum leh pai ka nei lo. Pi leh pu atangin belhfakawm chhuan tur ka nei lo. Mipuite khawngaih beiseiin Pathian leh kan ram tan ka rawn pen chhuak dawn a ni,” a ti.

“NDA leh INDIA (UPA tih thin) inepna karah regional party-te kan tel ve dawn a ni a. Mizoram MP chuan sorkar siamnaah kori kan tu phak lo. NDA hi a sorkar leh ngei a rinawm – Uniform Civil Code an rawn tipuitlin pawh a rinawm. Chuvangin NDA sorkar do a tul nasa dawn. Term kal mekah NDA sorkar dodal nasa ber pawl ka ni. MP fang tan thiltih a harsa, amaherawhchu au bengchhen a ngai, a ti.

“Hindi thiam a pawimawh an tih laiin kum thum leh a chanve chhunga thu sawi lo an la tam mai. Hindi leh English thiam aiin rilru put hmang a pawimawh zawk. Tin, English thiam lutuk aiin ka sap tawng thiam dan hi a tawk chiah, an hrethiam zawk,” a ti a. “Lok Sabha-ah hian min thlang tling a nih chuan Mizo tawngin thu ka la sawi ang,” tiin Mizoram mipuite vote a dil nghal a ni.

Pu Tawnluia, Chairman, Lok Sabha MP Campaign Directorate pawhin inthlan hmabak atan theihtawp chhuah turin party mipuite a sawm a. “Kan candidate siam hi Zoram mipui candidate a ni a. Kan ram, kan hnam leh sakhua humhim turin hna a thawk dawn a ni,” a ti.

“India nena kan inremna tihlawhtling tur leh Mizo nationalism-a chawm len candidate kan nei hi kan chhuang a. Kan hnam chhan tura mi huaisen kan nei hi kan vannei a. Hindu ramah kan sakhua tana ding ngam tur a ni,” tiin Pu K. Vanlalvena chu thlang tling turin Mizoram mipui zawng zawng an sawm bawk a ni.

Inkhawm hi MNF Sr. Vice President Dr. R. Lalthangliana’n a kaihruai a. Rev. Dr. Vanlalbela, Bawngkawn-in hunserh a hmang bawk a ni.

Sd/-

(MALSAWMPUIA RALTE)

Jt. Secretary

Media & Publicity Department

Mizo National Front

PR No. 42/2024

Dt. 22.03.2024