Mizo National Front
General Headquarters
Mizoram : Aizawl
Press Release
MNF DINCHAM TUM 62-NA LAWM A NI
Thangtharte chhawmdawlna tur kan manifesto-ah dah a ni: MNF President
Vawiin hian MNF dincham tum 62-na lawmna hun Mizo Hnam Runah neih a ni a, he hunah hian Pu Zoramthanga chuan thusawiin, “Thangthar zelte hnam thutlungah an harh thar mek hi lawmawm ka ti tak zet a. Ram hrang hranga kan unaute’n beih an tawh mek lai hian
Thangtharte’n Nationalism an champion pui zel ang,” a ti a. “Thalaite pawimawhna hriain kan manifesto-ah pawh an mahni chhawmdawl a, hmalam an pan theihna tur kan dah a ni,” a ti bawk.
MNF President chuan MNF chu mi tlawm te tein October ni 22, 2961-a Pu Laldenga In, Tuikhuahtlanga an din a nih thu a sawi a. “MNF hi Pathianin ropui taka ram hruai tura a duan a ni mai lo a, hreawm tam tak tuar tura a duan a ni. MNF Party hian hreawm tam tak a tuar reng a, ram buai, inkah, President rule puan hnan leh thil tam tak a tuar a. Chuti chung chuan India rama party hlun leh nghet ber pawl ni turin kum 62 zet Pathianin a hruai ta a ni,” a ti a. “Pathian leh kan ram tan he party hian hmalam a pan zel dawn a ni,” a ti.
Pu Zorama chuan kan unau Myanmar leh Bangladesh lama rawn raltlante chu thawn kir tura Central sorkar-in an ti chungin an hum tlat tih a sawi a. “Ngheta taka nationalism vuantute sorkar lovin, tute emaw sorkar se chuan vauna nen sum nen an bei ang a, ‘in tih tlat chuan’ tiin kan unaute hi meitei ho tih angin an ramah an thawn let tawh ngei ang. Keini erawh chuan central sorkar thu zawm lovin kan hum tlat zel dawn a ni,” a ti a. “Assam ramri atanga Mizo Police inhnuklet tura tih kan nih pawhin, ‘CM atanga kan ban a ngai ang,’ tiin ka chhang a, min nawr zui ngam ta lo,” a ti bawk.
MNF President chuan, MNF boruak a tha chho zel tih sawiin, ” Hmun hrang hrangah nationalism thlipui a thleh thar leh mek a, MNF-in lawmluh kan nei nasa hle a. Kan bialah phei chuan lawmluh tur a inkahpupchaw nasa hle. MNF hi Pathianin kawng laklawhah min kalsan lovang, sorkar tura kan mamawh tawk MLA min pe ngei ang,” a ti.
He hunah hian Pu Zoramthanga, MNF President chuan Thalai Khawvar Society member te, Mesak VL Thlana Bungkawn leh a thiante leh Sihphir Venghlun Congress Mahila atangin voter 491 MNF-ah a lawmlut a ni.
Vawiin MNF dincham lawmna hun hi Pu Lalthlengliana, vice president-in a kaihruai a, martar-te sunna hun hman a ni.
Sd/-
(LALLENMAWIA JONGTE)
Secretary
Media & Publicity Department
Mizo National Front
Memo No.MNF/Media/04/2023/899
Dt 23.10.2023