Thuthlung neia kal kan ni a – Zoramthanga

Mizo National Front
General Headquarters
Mizoram : Aizawl

PRESS RELEASE

Thuthlung neia kal kan ni a; kan hnam, kan sakhua, culture leh tihphung vawnghima venghim tura ding kan ni – Pu Zoramthanga, President, MNF.
Vawiin September ni 29, 2023 Zirtawpni hian Lengpui Community Hall ah Mamit East Block MNF Conference neih a ni a, MNF President Pu Zoramthanga chuan Khuallian niin a hmanpui a, Bialtu MLA Er. H. Lalzirliana chu Khualzahawm a ni. He hunah hian Khuallian Pu Zoramthanga chuan MNF zawm thar mi 262 a lawmlut a ni.
Pu Zoramthanga chuan Pathian leh mipui zarah MNF in sorkarna a chang leh ngei dawn a ti. A sawi zelnaah Congress chu tun dinhmunah artelukawn thei an ni a.
ZPM in tlin lohna tur chiangsa bial 10 an nei tih sawiin, bial 30 atanga sorkarna siam hi an tan tihngaihna a awm lo a ni a ti bawk.
ZPM chanchin sawi belhin, an thatna ber nia lang Aizawlah pawh an boruak a hniam sawt hle a, an hawipir ngam tawh lo reng reng a ni a ti.
Pu Zorama chuan kalphung thar aupuitu ten ‘Sorkarna siam tawhte khan engmah min thlen lo’ tiin a chhe hlawm vekah min puh a. An insawi duhawm chawp a, party hi eirukna bul a ni a, party kan duh lo ‘movement’ kan ni an ti a. ‘Kan innghahna chu kohhran a ni. Kohhran in min support, unit din a ngai lo’ an ti a. Tunah erawh chuan party ah an inziaklut a, unit an din leh ta a. An nih duh leh an din duh loh zawng zawng an duh vek tawh a, an luak hnu an ei leh vek a ni ber e a ti
ZPM chu an indin dan ruangam a thar lutuk a, MNF leh Congress chu ruangam nei tha sa kan ni. Pathian leh mipui zarah kan chak leh ngei dawn a ni a ti.
MNF President leh Chief Minister ni bawk Pu Zoramthanga chuan MNF chu harsatna su tura Pathianin a hruai chhuah an nih thu sawiin, Pu Laldenga hoa din a nih atanga tun thlengin harsatna danglam bikte pawh tawn tlang zel kan ni a ti.
Pu Zorama chuan MNF hi sipai ral a ni emaw underground ral a ni emaw overground ral a ni emaw do chhuak vek tura a din kan ni a. Tunah hian MNF hi kum 62 a ni tawh a, vawi khatmah pawl dangah kan la inlet lo. Thuthlung neia kal kan ni a; kan hnam, kan sakhua, culture leh tihphung vawnghima venghim tura ding kan ni. Kan unau rawn raltlante biometric hmanga zirchian ni rawhse tia sorkar laipuiin an rawt pawh kan duh loh thu leh kan tih dawn loh thu huai takin kan hrilh ngam a ni a ti.
CM chuan Mizoramin hun harsa kan tawh hrang hrangte – Covid, lirnghing, ramkang, ramri buai, vawkpul hri leng, Myanmar raltlan, Bangladesh raltlan leh Manipur raltlan lo awm turte hretu chunglam khian tunge sorkarna chelh turin tha ber ang tiin MNF hu sorkarna pek kan ni. Heng harsatna hrang hrang kan tawh lai hian budget dawn kim loh vaibelchhe tel, kan unau raltlan singnga chuang enkawl chunga chaw nghei lo leh development heti zat kan la nei thei hi chunglam kaihhruaina kan chan a ni. Hun harsa kan tawn laia sorkarna chelha, paltlang turin Pathianin min dah a ni a ti.
Mamit East Block Conference ah hian Bialtu MLA Er. H. Lalzirliana pawhin thu sawiin, Mizo te khawvela min phochhuaktu chu MNF hi a ni a. Hnam Movement kalpuitu, Mizo te Nationalism rilru min put tirtu hnam party hi kan ngaihlu hle tur a ni a ti.
Er. Zira chuan kan CM zahawm takin a sawi ang khan, sorkarin harsatna a tawh zozai te hi a tam lutuk, chhiat rawih theihna khawp harsatna an ni. Mahse, kan Sawrkar enkawltu Chief Minister hi Pathianin a hruaia, Mizo rilrupu, mi tumruh, mi huaisen a nih vangin tun thlengin mipuiten mamawh kan la nghei lo a nih hi.
Kan District leh bialin hmasawnna kan dawng nasa hle a. Education lamah nasa takin hma kan sawn a, Mamit District Hospital khum za awmna tur hmani lawk khan Kan Health Minister in min Hawn sak tawh.Thalaite tan infiamna hmun tam takah siam zawh tawh leh siam mek kan ngah hle. Kuthnathawk tute tan SEDP Kan sem thei ta bawk a ni a ti.
MNF sorkar hnuaiah chuan harsatna tinreng bawhbuai karah pawh mipui nitin mamawh te pek a ni zel a, hmasawnna lian tham chi hrang hrang Mamit bialah ngawt pawh thawh a ni. Pathian leh mipui zarah sorkarna kan chang leh ngei anga, muang leiah mipui tan theihtawp chhuahin kan ṭangmar lehzual dawn a ni a ti.
Mamit East Block MNF Conference hi Pu Lalropuia, President ,Mamit East Block MNF chuan a kaihruai a, Upa Lalthlengliana Kawlni chuan hunserh a hmang. MNF President Pu Zoramthanga hi Pu HB. Lianmunga, Adviser, MNF Gen.Hqrs, Pu Sangkunga Pautu, GS, MNF Gen. Hqrs. Leh hruaitu dangten an tawiawm.
Sd/-
LALLIANZUALA FANAI
Jt. Secretary
Media & Publicity Department
Mizo National Front
Memo No. MNF/Media/04/2023/861
Dt. 29.09.2023

Leave a Reply

Your email address will not be published. Required fields are marked *