Vaivakawnah voter 138 lawmlut

Vawiin hian Vaivakawn MNF Unit buatsaihin Vaivakawn Conference Centre-ah mithar lawwluhna hun hman a ni a. Pu Lalruatkima, Aizawl West II bialtu chusn hmanpuii Vaivakawn veng chhung MNF zawm thar voter 138 a lawmlut a. Lawmluhte hi Congress voter 35 leh neutral voter 103-te an ni.

Pu Lalruatkima chuan thusawiin, “Hun harsa tak mai he sorkarah hian kan paltlang a, hripui lak aṭangin dam khawchhuah kan tum a. Pathian zarah kan damkhawchhuak a. Ram kang Helicopter-a ṭhelh ngai hial kan hmachhawn a. Vawk pul hri leh lirnghing, ramri buai nen. Chuti chung chung chuan hmasawnna hna MNF hian kan thawk nasa hle a ni,” a ti.

Bialtu MLA chuan, “Inthlan lo awm turah hian keini lo sorkar tur an awm lo. ZPM hi Ballon ham puar, thep ta ang hi an ni a, an thep suai suai mai a. Tih ngaihna an hre tawh lo a, an thep ta vek a ni. Kan tihbuai an ngai lo, an buai mup mup mai a, an mahni an buai zo ta a, an intichhe ta a ni. Mipui rin an hlawh tawh lo a, tih theih loh tur duhthusam an zuar nasa hle. Mipui an fing tawh, bum theih an ni lo,” a ti a. Congress chungchang sawiin, “Congress lah nise an tui-hna a kangchat tawh a, an inawi nung zo tawh lo,” a ti a. “Keini erawh chuan hmalam kan pan zel. MNF kan hmabak a eng a, lungrual takin Pathian leh kan ram tan kan thawk zel a. Hun harsa atan he ram hruai tura min ring tawk Pathian hian hun thawl leh ṭha zawka kan sorkar leh ngei hi a phal ang tih ka ring tlat a ni,” a ti bawk.

RD Minister chuan, “Ramin ri a nei a, hnamin ri a nei lo. Myanmar kan unaute sing 6 chhuang awm mekte Zoramin kan chhawmdawl mek a. Manipur Zofate tawrhna pawh kan tawrhnaah kan ngai,” a ti a. “State dang hotute leh central lamin an zah Chief Minister kan nei hi kan vannei hle a ni. Kan CM hi han sawisel ṭhin mahse thil tak takah a ropui zia a lang ṭhin,” a ti bawk.

Pu Ruatkima chuan, “He sorkarah hian ei leh barah harsatna kan nei lo a. Retailer-ah a ṭha thlanna awm ṭhin pawh buhfai a ṭhat tak avangin a awm tawh lo a. Gas kawtkaiah an sem ta, eng kan nei ṭha, kawng pawh a zia awm nasa ta hle a ni,” a ti a. “SEDP pawh nuai 3 thleng sem turin kan inbuatsaih mek zel a, kan sem zui zel ang. Chutiang tur chuan kan inbuatsaih mek zel,” a ti.

He inkhawm hi Pu Lalnunzauva, President Vaivakawn MNF Unit President-in a kaihruai a, Pu Lalfakzuala Chenkual AMC Ward XIII Corporator-in a hmanpui bawk a ni.

Sd/-

(LALLENMAWIA JONGTE)

Secretary

Media & Publicity Department

Mizo National Front

Memo No.MNF/Media/04/2023/863

Dt 28.09.2023