Press Release
HEALTH MINISTER-IN MAMIT DISTRICT HOSPITAL LEH MULTIPURPOSE BUILDING ZAWLNUAM COLLEGE A HAWNG
Vawiin September ni 26, 2023 (Thawhlehni) hian Mamit District Hospital (IPD Block) Mamit, khum 100 awmna chu Health Minister Dr.R.Lalthangliana’n a hawng. He Hospital hi CSR fund atangin cheng nuai 1700/- senga kum 2020 December atanga sak, chhawng 4 a sang, RCC Framed structure, G+4 a ni.
Health Minister chuan hawnna thu sawiin, vawiinah hetianga hun tha tak an hmang thei chu lawmawm a tih thu a sawi a. “Mizoram hi India ramah cancer tamna state kan nih avangin nimin lamah Chief Minister hovin cheng vaibelchhe 700/- man Mizoram State Cancer Institute Zemabawk-ah kan hawng thei ta a, kan lawm hle a ni,” tiin thawktu tam tak an mamawh belh tur thu a sawi.
“Mamit hi India rama aspirational District 115 awmah a tel ve a, a bikin health sector leh education lama kan hnufual vang a ni. Central sorkar lakah pawh hian Mamit hi chu kan langsar larh a ni. Vawiina kan hawn tak pawh hi a sum 30% hi State-in kan tum a ni a, kan vannei hle a ni. MNF sorkar hian hmachhawp leh hmalak mekna kan ngah si a, kan la thawh zawh hman lohte chhunzawm turin kan kutah sorkarna a awm leh a ngai a ni,” a ti.Tuipuibari-a PHC pawh Doctor an neih ruala a function tur thu a sawi bawk. Mamit District hi Ambulance tha tak tak leh Two-wheeler ambulance thlenga an pek tawh thu a tarlang. Doctor leh Nurse awmlohna hmun kilkhawrah SEDP Health Clinic pawh he District-ah hian kan din fai vek tawh a ni, a ti bawk.
Minister chuan Sub-Centre 400 dawn, PHC -61, CHC- 9 pawh Health and Welness-ah an hlankai vek tawh thu a sawi. Health department-ah thawktu an indaihlohna chhan sawiin, sorkar hmasa kum 10 kal ta khan hnaruak an lo la mumal lo a. Health department-ah ringawt pawh sangthum dawn hna ruak a awm a, a zualpui post 734 siamin budget-ah pawisa kan dah tawh a. Kan lak dawn chiah khan covid a lo lang ta a, kha pawisa kha covid do nan kan hmang ta a, covid hian tun thlengin min la nghawng a ni, a ti bawk.
Hemi hnu hian Higher & Technical Education Minister Dr.R.Lalthangliana hian Multipurpose building Government Zawlnuam College a hawng leh a. He hun hi Pi Esther Lalruatkimi Principal Secretary, H & TE chuan a kaihruai a, Rev.Lalhmingthanga Chhangte chuan hunserh a hmang. He building hi RUSA sum atangin cheng nuai 100 senga sak a ni a. Kum 2019 atanga Sky Ridge Construction & Consultancy Services, Aizawlten an sak a ni a, chhawng thuma sanga sak a ni.
H & TE Minister chuan building thar an hawng thei chu lawmawm a tih thu a sawi a, building pawimawh dang pawh a tahtawla an la hawn zel tur thu a sawi a, zirlaite leh zirtirtute chu zirna kawngah thahnemngai taka tan la sauh sauh turin a fuih a ni. Zawlnuam College-ah hian hnam dang zirtirtu an awm ve nual a, hei hi saptawng lamah zirlaiten chhawr tangkai se a duh thu a sawi bawk.
Health Minister hian Kawrthah PHC pawh tlawh nghalin, Medical Officer leh thawktu dangten an lo dawngsawng a, hospital poor fund atan tangka fai engemaw zat a hlan nghal a ni.
He hunah hian Pu Lalrintluanga Sailo, MLA, Dy Govt.Chief Whip, Er.H.Lalrinliana, MLA-te pawh an tel a, thu an sawi bawk. Mamit DC, SP leh Mamit-a official tam takten an lo dawngsawng bawk.
Minister hi MNF General Headquarters hruaitute bakah Pi Esther Lalruatkimi, Principal Secretary, H & FW; Dr.Vanlalsawma Principal Director, H & FW; Dr.Lalmalsawmi Sailo Director, DHME; Dr.Lalnunmawii Ralte Jt.Secretary, H & FW; Dr.Eric Zomawia Mission Director, NHM-ten an tawiawm a ni.
Sd/-
(R.LALHMANGAIHA)
Secretary
Media & Publicity Deptt
Mizo National Front
Memo No.MNF/Media/04/2023/856Dt.26.09.2023