Mizo National Front
General Headquarters
Mizoram : Aizawl

Press Release

Vawiin August ni 29, 2023 Thawhlehni hian Vanapa Hall Lungleiah Sports & Youth Services Department leh Mizo Zirlai Pawl buatsaih “Youth 20 Mizoram, Meet on Nationalism, Patriotism & Development” hun hman a ni a. Rajya Sabha MP Pu K.Vanlalvena chu Khuallian a ni.

Khuallian Pu K.Vanlalvena chuan kalkhawm zirlaite hmaa thusawina hun tha a neih avangin lawmthu a sawi a. Zirlaite chu future tha takin a hmuak a, beidawng lo turin a chah.

Zirlaite chu rilru leh thinlung put dan dik nei tura ngenin, ‘Lehkha kan zirve lai atanga khuallianin min hrilh fo chu “Zirlaite hi ram nghahfak in ni a, ram leh hnam hruaitu in la ni dawn” an ti thin. A hun lai chuan ‘min tih-lawm an tum mai mai a ni’ tih a awl viau. Mahse, hei hi thudik a lo nihzia a chiang a, zirlaite hi nakina ram hruaitu tur, ram nghahfak in ni tih ka sawi duh a ni’ a ti.

Pu K. Vena chuan ‘lehkha zir a sawt tawh lo. Hna a vang tawh lutuk’ tia sawi an awm chuan dawt an sawi a ni tih pawm ang che u. In future hi a bright a ni, thangtharte tan future a bright lo nia sawitu thusawi chu awih reng reng suh u a ti bawk.

MP chuan tuna sorkar hnathawk te, ram hruaitu zawng zawng hi an chawlh a la hun dawn, an hmun ruak in luahkhah a la ngai ang. Chutiang tur chuan inbuatsaih ula, beidawng suh u a ti.

Thiamna a sang zela, mobile phone hmangin in zirna pui thei, in duh zawng zawng in hmu thei tawh a, zirna hi a awlsam tawh a ni tih hria ula, in future hi pianhmang that leh that lohah te, in hausak leh sak lohah te a innghat lo a ni tih in hriat a ngai. A pawimawh ber chu rilru putzia dik neih a ni. ‘Kan thinlungah hian hneh theih loh thiltih theihna ruk a awm a, chu chu hman thiam kan zir a ngai a ni’ a ti.

Pu K. Vena chuan Rajya Sabha ah Chairman phalna in vawi 14 thu a sawi tawh a, a phal lo chung chung vawi 2 a sawi tawh bawk tih a sawi. Hei hi chapopui vanga sawilang a nih loh thu sawiin, ‘kan thinlungah theihna leh tumna a awm tlat chuan kan ti thei mai a ni’ a ti.

Rajya Sabha MP chuan Mizo nationalism leh Mizo inpumkhatna tichhe zawnga thusawi leh ziak te pawh a awm thei a. Hemi kawngah hian fimkhur a ngaih thu a sawi.

MP chuan “Pu Modi-a hi Indian nationalist nge Hindu nationalist a nih ka ngaihtuah fo mai. A thusawi tam takah India tih aiah Hindustan tih a hmang thin a. Kei chuan ‘Hindustan rama min siam in tum chuan kan tel ve thei dawn lo’ tiin ka lo react ve thin a ni a ti.

A sawi zelnaah Mizo Nationalism kan tih chuan Mizote hi tu thuhnuaiah mah awm lova, mahnia ro in rela, mahni kea din duh tlatna thinlung hi Mizo nationalism hrilhfiahah ka ngai tlat a. Hei hi ka thinlunga riak reng a ni a, a reh maiin ka ring lo. Engtik niah emaw chuan ram khat niin kan la awmkhawm anga, eng hmingpuin nge kan la dinchhuah dawn tih erawh chunglam thu thu a ni. Kan insuihkhawma, rorelna pakhat hnuaiah mahnia ro inrela kan awm hi ka beisei tlat a ni a ti.

Pu Vena chuan mahni kutkea din tum tlatna nationalism a awm tih sawiin, kan rama tha duh em em te – buh leh thlai, sangha leh thei te hi tam taka thar turin engatinge kan uar loh? Keimahni, mitin thinlungah nationalism a len loh vang a ni’ a ti.

He hun hi Tv. Lalpeksanga Chenkual, President MZP Headquarters, Lunglei chuan a kaihruai a. Rev. R.Lalbiakliana, Gen.Secy. BCM in hunserh a hmang bawk.
Pu Lalnunmawia Pautu, President MZP General Headquarters chuan keynote Address a sawi a, Pu Lalhruaitluanga Chawngte, Adviser,MZP Gen.Hqrs. hnen atangin ram hmangaihna awmzia leh hmasawnna neih dan ngaihthlak a ni bawk.

Sd/-
LALLIANZUALA FANAI
Joint Secretary
Media & Publicity Deptt
Mizo National Front
Memo No.MNF/Media/04/2023/830
Dt.29.08.2023