Manipura kan unau pawisawilo Mizo hmeichhe pahnihte chunga rawng taka Meiteiho chetna hi MNF chuan paidam mai chiah a ngai lova. Saruaka kawng zawh pui a, pawngsual rawn a, sawisa zuiin, an nunna hial an lak sak kha a rawng kan ti a. Tunlai khawvel hmasawn tawh karah hmanlai rilru, ramsa ang maia insawisaknaah a thleng hi a mak kan tiin a na kan ti a. A tawp thlengin kan unaute thlavang hauh nan hian MNF chu a pen dawn a ni.

He thil rapthlak tak kan farnuten an tuar hi MNF chuan a dem takzet a. Mawhphurtu chhuichhuah leh hrem kawngah Manipur Sawrkar, N. Biren Singha kaihruai leh Central Sawrkar chu chak taka hma la a, an tih tur ti nghal turin a ngenin a hriattir nghal a. An tih tur an ti thei lo a nih chuan kan farnute thisen min auhna chhang tur hian MNF chuan hmalak nghal a inpeih reng a ni.

May ni 4, 2023-a thleng tawh vawiin thlenga hmalakna mumal ala awm lo hi Manipur Sawrkarin mimal zalenna humhim tura a hlawhchham zia leh hleih nei taka ro a rel zia a lang chiang hle tih a lang a. Central Sawrkar chu a tih tur ti a, mihring zalenna hum tura che nghal turin na takin a kar nghal bawk a ni. Kristiante Biak In sawisa a, hal ral a, nunau pawisawilo te nen lam chunga Meitei mipui rawva taka chettirtu N. Biren Singha chu a mawhphurhna hre lo, India Dan palzut a, hnambil politics, Dictator taka kalpui mektuah MNF chuan a ngai a ni. Manipur Sawrkar leh Central Sawrkar chu a state chhung buaina titawp a, chingfel nghal thuai turin a phut nawn leh a ni.

Kan farnu, tihduhdahna tinreng tuar a, a rapthlak thei ang bera sawisak tawkte thisen authawm chuan, Zalenna suala, nunna chan huamtu martar-te thisenin a bual tawh MNF thinlung a ti rum a. An thlarau muang takin chawl hahdam se, an vawiin nun naktuka Zofate tana an hlanna hi Zofate thinlungah a nung reng tawh dawn a ni.

Issued by

Media & Publicity Department

MNF, General Headquarters, Mizoram; Aizawl