AGRICULTURE MINISTER-IN SERCHHIP ZAWLPUI LEILET NEITUTE HARSATNA ENFIAH

Vawiin July ni 5, 2023 (Nilaini) hian Agriculture Minister Pu C.Lalrinsanga chuan Serchhip, Zawlpui Leilet tlawhin, he lai hmuna kut hnathawktute nen inkawmhona an nei.

Pu C.Lalrinsanga, Agriculture Minister chuan Serchhip chu Mizorama kut hnathawktuten thlai an thar chhhuah tamna anih avanga sorkarin a ngaih pawimawh thu sawiin, tuna leivung paih avanga an leilet tuikawng leivungin a hnawhpin hi chu hmasawnna avanga harsatna anih thu a sawi a. Tuna a kal chhan pawh MNF party lama he laia hotupa Pu J.Malsawma Vanchhawng-in a ngaih pawimawh em avangin a sawmna anga tlawh anih thu a sawi bawk. Agriculture Minister chuan Serchhipah hian farmers-te thar chhuah dah thatna tur cold storage dah tuma hmalakna kal mek chu an bun thuai a beisei thu a sawi.

“Kan ram neihte hi a zim a, kan neih ang ang erawh kan humhalh that a ngai a, he in harsatna hi company lama hotute pawh biain theihtawp ka lo chhuahpui ang che u. Leilet zawl zauah hian Sanghadil siam erawh Revenue department-te nen pawh kan meeting naah phalloh anih thu kan sawi a. Heng kawng siam development hna avanga harsatna in tawh hi engemaw chenah in lo hriatthiam a tul a, a pawi ka tihpui takzet che u a ni, theihtawp chhuahin hma ka lakpui ang che u. A ven hna erawh nangni pawhin theih tawp lo chhuah zel u la. Tuna kawng laitute hi NHIDCL hnuaia contractor-ten an lak chhawn a ni a, Mizoramah hna tam tak an thawk mek a, kan lui dung leh khawimaw lai laiah leivung paih avanga harsatna hi thleng thei zel a ni tih lo hria ang che u,” a ti a. Leileta tui kawng siam hi tibovin PMKUSUM atanga ni zung tha chakna hmanga tui lak chu sorkarin an ngaih pawimawh thu a sawi a. Tunah hian Unit 1700 vendor tur ruahmanna kal mek thu leh, tihhlawhtlin anih hunah production pawh a tam phah tur thu a sawi bawk.

Collective farming system hman ni lawka Cabinet-in an pass thu sawiin FPO din zel a nih tur thu leh farmer 30 atang 50 enkawlin, leilehna khawl, buh sengna khawl, buh vuakna khawl thlenga pek an nih tur thu Agriculture Minister chuan a sawi a.

Leilet ah hian kum khata vawi thum thar thei sum chang thlai chin chu sorkar hmachhawp anih thu sawi bawk.

He lai hmuna Leilet zau neitute chuan Agriculture Minister-in a ngaihsak avanga lawmthu sawiin, an harsatna hrang hrangte an lo thlen a. Khuarel chhiatna pawh ni lo, kawng laituten an leivung paih avanga Tuilut, Lumtui leh Zawlpuia an tui laknaah harsatna an tawh thu an lo thlen a. Company leh Contractor-ten harsatna an siam avanga Serchhip DC leh Serchhip Police Station-ah pawh an thlen tawh thin thu an lo hrilh. Kawngpui tha an neih tur chu lawmawm an tih thu sawiin, kawng lailute an fimkhurlo erawh pawi an tih thu an lo sawi bawk. Sorkarin electric eng an pek avanga lawmthu an lo hrilh bawk a ni.

He hunah hian MNF Publicity Board Vice Chairman Pu J.Malsawma Vanchhawng pawhin thu a sawi.

Agriculture Minister hi Serchhip DAO, thawktu dangte leh loneituten an lo dawngsawng a. MNF General Headquarters hruaitute leh Aizawl lam atangin Agriculture Joint Director hovin Minister hi an tawiawm a ni.

Sd/-

(R.LALHMANGAIHA)

Secretary

Media & Publicity Deptt

Mizo National Front

Memo No.MNF/Media/04/2023/758

Dt.05.07.2023