Mizo National front
General Headquarters
Mizoram : Aizawl

 

Press Release
2018-22 inkarah khan MYC coaching atanga zirchhuak mi 141 ten sorkar hna an hmu tawh – Dr. Vanlaltanpuia, MLA, Chairman, MYC

 

Vawiin June ni 19, 2023 Thawhtanni hian Mizo Hnam Runah chhung inkhawm neih a ni a. Dr. Vanlaltanpuia, MLA, Adviser MNF Gen.Hqrs. leh MYC Chairman ni bawk chuan thu a sawi a.

Dr. Vanlaltanpuia chuan Mizoram Youth Commission in thalaite tana hna a thawh leh an hmalakna hrang hrang a tarlang a. MYC Chairman chuan June ni 12-a UPSC result a chhuakah Mizoram atangin thalai 5 ten prelims an inziak tling a. Hengte hi MYC in theihtawp chhuaha a hmalakna rah kan hmuh mek niin kan hria a. Vawi leh khata rahchhuak hmuh nghal theih chi a ni lo tih hria ila, nu leh pate pawhin fate tan kum khat na na na chu ran, lirthei leh rosum tiral phalin fate buaipui turin a ngen a; MYC chuan beidawng lovin thalaite tan a pen zel a, nakin lawkah rahchhuak tha kan hmu ngei ang a ti.

Dr. Tanpuia chuan MYC in thalai hna zawng laite tan coaching class a kalpui reng tih sawiin kum 2018-22 inkarah khan MYC coaching atanga zirchhuak mi 141 ten sorkar hna an hmu tawh a. Chung bakah chuan Bank a thawk turin mi 38 an lut tawh a, Private company leh Insurance company ang chi-ah mi 42 an lut tawh a ti. CIJW Vairengte nen MoU ziah a ni tawh a. MYC chuan Sipai lak runpuiah thalai, sipaia tang duh an buaipui a. MYC Coaching kaltlanga sipaia lut hi 70 chuang an ni tawh tih a sawi bawk.

Tunhnaiah Competitive thinlung hi kan thalaiten an neih theih nan hybrid coaching kalpui a ni a,hetah hian online leh offline hmangin mi 100 an kalpui a. Course pawh an zo ta chiah a,heta zirchhuakte pawhin hlawhtlinna an chan ngei a beisei tih a sawi.

Dr. Tanpuia chuan MYC-in hlawhtlinna pawimawh deuh an nei thar tih sawiin, sap rama hna thawk turten an paltlang ngei ngai Occupational English Test an kalpui thei ta a. Nurse zirzo tawh mi 9 te chu OET paltlangin sap ramah hnathawk turin MYC chuan a tirthla tawh a ni, a ti.

Covid hrilen laiin MYC chuan thalaite tan eizawnna inkawhhmuhna tha ‘Hna Inpui.Com’ a siam a, vanneihthlak takin North Eastern Council chuan Hmarchhak pumpui tana hman turin Hna Inpui.com hi an dil tih sawiin, MYC chuan hman phalna a pe a, NEC chuan lawmthu sawi nan MYC hnenah Vbc. 3 a pe a hial tih sawiin, Hmarchhak state danga thehlar turin MYC hi rin nghal an ni dawn a, ‘he thehlarna tur atan hian vaibelchhe tel min pek belh dawn bawk a ni’ a ti.

MYC chairman chuan Chief Minister Pu Zoramthanga’n Mizoram thalaite hma khua a ngai em em tih tarlangin, CM ruahmanna in Covid lai khan MYC chuan building thar 2 an sa zova, Lungleiah Vbc. 4 man MYC building sak zawh tawh a ni bawk a. Serchhipah MYC Pisa thar Vbc. 3 sengin sak zawh a ni leh a, hei hi hawn thuai a ni dawn, a ti. Tin, ‘Serkawna VC ten Lena Stadium sirah MYC Incubation Centre tur ram min pe a, hei hi karlehah kan tan leh mai dawn a ni,’ a ti.

Dr. Tanpuia chuan, Covid hrileng avanga state danga hnathawkte chu Supreme Court in an home state ah haw se, State sorkarin chhawmdawlna pe rawh se tiin order a chhuah a. Covid avanga state danga hnathawk lokir lehte tanpui nan Chief Minister in Vbc. 6 min pe a, hemi sum hian kan thalaite tanpuina kan pe ta a, covid kian hnuah an thawhna lamah an let leh tawh hlawm a ni, a ti.

MNF Adviser chuan ‘India ram hi Multi party system kalpuina a ni. Political party che tha tha an dam rei mai thin’ tih sawiin, India ramah National party hi paruk an awm mek a. National party zingah hian MNF party aia upa pakhat chiah an awm a ni. Hei hian MNF ropuizia a tilang a.Kan hruaitu hmasate, tha leh zung senga, thisen leh thlantui nena beitute hi Pathian hian a pawmpui (approved) tlat a ni. MNF politics innghahna (foundation) hi a dik a, Pathianin mal a sawm tlat a ni. Mizorama party duah chho mek awmchhun chu MNF hi a ni, a ti.

MNF Adviser Dr. Vanlaltanpuia chuan “MNF chu Mizo hnam movement kalpuitu kan ni a. Inremna siam dawn pawh khan Rajiv a ten ‘Rorelna Pakhat hnuaia awm in duh thu in sawi a, engvangin nge Tripura leh Manipur atangin in unauten an duhthu an rawn thlen ve si loh’ an ti tlat a. Rorelna pakhat hnuaia awm chu inremnaah telh an ni thei ta lo a ni. Chung lam remruat a ni ang e; Myanmara an buaia, kan unaute an lo lut a, Bangladesh lam unaute an lo lut bawk a, Manipur lamah rin loh deuhin a buai a. Inpuiah an rawn lut ruih ruih mai a. Zofaten hunkhirh an tawh laia Zoram kaihruai turin MNF hi chunglamin mal a sawm a lo ni. Hnam party ni turin chung lamin min hruai a. MNF hi a thang zel dawn a ni. Tuna ram enkawl tura Pathianin min ruat lai hian kan fimkhur a ngai a. He ram neitu hi ni mah ila keini aia thunei zawk Pathian a awm a ni tih theihnghilh lo ang u” a ti.

Dr. Tanpuia chuan ‘Pathianin min pek ram enkawl kawngah theihtawp kan chhuah a ngai. Tuihna kan nei tlem zel a, thalah kan tuihna a kang chat tan. Ram enkawltu kan nih vangin kan ram thing leh mau enkawl kawngah chet lak a ngai. Tuihna neih belh turin thing phun theihna laiah phun belhzel a hun’ a ti bawk.

Vawiin Hnam Run chhung inkhawm hi Pu Saihnuna Sailo, gen. Secy. MNF Gen. Hqrs. chuan a kaihruai a, Pu Zodailova, Secretary, MNF Gen. Hqrs. chuan hunserh a hmang bawk. Pu V.Zirsanga, CEM, LADC chuan report tawi a pe bawk.

Sd/-
LALLIANZUALA FANAI
Joint secretary
Media & Publicity Dept.
Mizo National Front
Memo No. MNF/Media/
04/2023/744
Dt. 19.06.2023