Mizo National Front
General Headquarters
Mizoram : Aizawl

Press Release

THE SPIRIT OF 1966 KAN TIH CHU A TAKIN ALA THLENG ZE -Lalchamliana, Home Minister

Vawiin May ni 15, 2023 (thawhtanni) hian Mizo Hnam Runah chhung inkhawmna neih a ni a. MNF Adviser, Pu Lalchamliana, Home Minister leh DM&R Minister chuan thusawiin, Manipur buaina a Mizo zirlaite kan CM in a ngaih pawimawh avangin mi 200 chuang hruai haw an ni a, chulai karah ‘state dangin charter-in an mi leh sa an phur lut e,’ tiin thuthang diklo a awm a, mahse charter niloin kan hruaichhuah hnuah an hruaichhuak ve chauh zawk a ni, a ti.

DM & R minister chuan, tuna ‘Cyclone Mocha’ tleh mek hi Mizoramah mi 4,619 velin an tuar a, heng tuar tute chhawm dawlna tur hi district tinah pawisa dah lawk vek a ni a. District Disaster Management Committee-ten buaina awm lovin hma an la vek turah kan ngai a ni, a ti.

MNF Adviser chuan, “Kum 1966 kha i hre thar leh ang u (back to the 1966) tiin, Lunglei LMC inthlan avangin tlemin kan hnual deuh a, tan kan ngaihzia kan hria a, CADC kan inthlang leh a, kan kang leh deuh a. Inthlanah hian chak reng theih anih loh rualin kan thawhsak mipuite tan enge kan tih, tih hi kan chhutsak fo a ngai a. Martar chhungte pawh a theih dan dana kan ngaihsak a tul tawh tih hriain, kan sorkar tan tirh khan hma kan la chho tan a. Mahse, covid-in min tihbuai vangin duh angin hma kan la thei leh lo a ni. Mahni tan niloin midang tana an nun hlanna, the spirit of 1966 kan tih chu a takin ala thleng zel a ni,” a ti.

MNF hi pipute atangin India mi kan ni ngai loh thu sawiin, kum 1890-ah British-in min awp a, kum 1935-ah India Act-ah excluded area-ah min dah leh thu a sawi bawk. “Khang hun laia Mizoram politic kha chu chiri tak a ni a, khatih laia Mizo Union khan India Union a awm rih turin thuthlukna an siam a, kum 10 hnuah India laka chhuak leh turin dan an siam a. Mahse, an chhuak thei ta chuang lo a, Assam hnuaiah district council-ah bial 3 atangin biwl 2 ah MNF an chak a, tichuan mipui aiawh zovin Pu Denga ho khan zalenna an sual ta a, India chuan an lo phal lo nasa mai a, nasa takin kan tawrhphah ta a. Kum 20 hnuah Mizoram a kohhran leh pawl hrang hrang te ngenna angin remna hlawhtling tak kan nei ta a ni,” a ti bawk.

Home Minister chuan, “Lunglei by-pass chungchangah pawisa awmsa a tlem tham em avangin a daih dawn lo a, ‘chuvangin Lunglei khawchhung thuam thatna i hmang phawt ang u’ tiin kan Chief Minister zahawm takin ruahmanna a siam a, by-pass na tur hi tunah hian kan CM hian PM Divine a dilsak mek a, reiloteah Lunglei sawn by-pass road hi kan sorkar hmalakna azarah an ngei ang, tih kan ring a ni,” a ti.

Home minister chuan hnalak chungchang sawiin tunah chuan engkim lang tlang vek tih a ni tawh a. Finance leh DP&AR kaltlang vekin a ngai tawh a, written test leh interview paltlang lo tan chuan Minister-ten tih theih an nei tawh lo a, MNF hi MNF tan chauh a thawk kan nilo a, ram tana thawk kan ni tih hi ka sawi duh a, hei hi induhsak loh vang niloin system kan neih vang a ni, a ti.

MNF Adviser chuan, Opposition-ten kan CM leh Sport Minister-te an bei nasa em em a, kan pu hi chu ‘Beramno hmul mettu hma a ngawi reng angin’ tih ang deuhin a ngawi thei em em a. Pu Lalduhoma’n peace bonus chungchangah kan pu nasa takin a bei a, mahse, document nen lam Pu Robert-a’n home ministry-in a peace bonus a pekna lehkha nen lam a awm a lo nei vek si a. ZPM hotupa chu dawtsawi a lo ni ta a. Tun session-ah khan, infiammi pakhat inenkawlna pek chungchangah Assembly House-ah Pu Duha’n social media a rin lutuk vanga thudik lo a sawi vang leh ngaihdam a dil avangin, kan CM leh RRRa hi an hotupa timualphotu anih vangin an bei nasa bik a ni, a ti.

Pu Chama chuan, kan hruaitu hmasate khan nasa takin an theih tawkin ram tan hna an thawk a, development reng reng hian hun a duh a, state dang keini aia upa leh changkangte nen intehkhin chi pawh a nilo. ‘Mipui sorkar, kalphung thar kan din ang titute hian an zawm em?’ tih hi ka zawt duh a, an Val upa council-te hi khawnge an awm tak? Hlawhtlinna leh thangthat an han lak deuh chuan thehhmeh ang maiin an Val Upa Council-te chu an reh ta a, an MLA leh Corporator te hian an fund hman danah hian mipui a huap bik em? India Dan hnuaiah rinawmna kan tiam a. India hnuaia kan awm chhung chu dan bawhchhiain kan awm thiang lo, enge an kalphung thar tih hi sawi tur pawh an hre bik lo a ni, a ti a. Speaker kan nih lai khan, zin loh bill hi MLA tam takin tuna ZPM leader tiamin an lo la a. An hre chhuak a, tam takin an rul leh a, an rulh leh vang khan hrem an pumpelh a, mahse danah chuan a rulh lehna chiah kha evidence a ni a. Mahse an ngaidam ta hlawm a ni. ‘Ka hre lo alawm’ tih hi chu dawt a ni a, anmahni MLA-ten an siam zawk a ni. Sihhmui tui lak ruk nen a inang reng a ni, a ti. Leader chuan vision an nei a, chu an vision tihlawhtling tur chuan tan an la thin, kan pu an beihna te hi thu tlinglo a ni a, vision neilo hruaitu chu an hman tlakloh a ni, a ti bawk.

MNF Adviser chuan, ‘The spirit of 1966’ kha vawiiniah hian i tuaithar leh ang u, kan hnam sipai, ram leh hnam tana inpete khan phutlet an nei lo a. Khatiang chiah khan midang neih loh neitu MNF martar-te thisena leite hian kan ngaihtuahna i tithar ang u, tiin kalkhawm te ka ngen che u a ni, a ti.

Hnam Run chhung inkhawm hi Pu R.Lalthansanga Gen.Secy.chuan kaihhruaiin, Pi Lalrovi MNWF chuan hunserh a hmang a. Pu Lalhuthanga Sailo Adviser, MNYF hnen atangin Dampa bial zin report ngaihthlak a ni a, voter 246 MNF party-ah bialtu MLA Pu Lalrintluanga Sailo chuan a lawmluh thute ngaihthlak a ni bawk.

Sd/-

(B.LALHMANGAIHZUALA)
Jt. Secretary
Media & Publicity Department
Mizo National Front
Memo No. MNF/Media 04/2023/703
Dt. 15.05.2023