Mizo National Front
General Headquarters
Mizoram : Aizawl

Press Release

‘Mizoram himna leh Zohnahthlakte himna thuah MNF a tlanchhe ngailo’-J. Sawma

Vawiin May ni 8, 2023 (Thawhtanni) hian Mizo Hnamrun chhung inkhawm neih a ni a. Hun hnihnaah Pu J. Malsawmzuala, Adviser, MNF Gen. Hqrs, MNF Publicity Board Vice Chairman nibawk chuan thusawiin, “Mizoram himna leh Zofate himna thuah hian MNF sorkar hi a tlanchhe ngailo a. Kan mite thlavang huai takin kan hauh ngam zel, Congress hunlai kum 2018 March thlaa Zirlaite thlavang hauh ngam lova, kut tawrhtir ang chi kha MNF sorkar kalphung a ni ve lo. MNF sorkar hnuaiah chuan kum 2021 July ni 26 ah khan kan police ten silai hmetpuakin, huaisen takin kan ram himna turin sorkarin hma a la anih kha. Pu Zoramthanga kaihhruai sorkar hi chuan kan ram, kan hnam leh kan sakhua himna turin huaisen takin, dinna nghet tak a nei a ni,” a ti.

Pu J. Sawma chuan, Manipur buaina thlengmek ah, sorkar in a tihtur diktak a hun takah a ti zel a. Mizoram mi leh sa, Manipura tangkhang zawng zawngte sorkarin a ngaihven reng a, a hruai haw zel dawn a ni, Zohnahthlak raltlan te tan pawh ruahmanna siamin, VC/LC te hriattirna a pe chhuak vek tawh a ni. Sorkar in amah maia thuthlukna siam lovin, NGO, Kohhran leh zirlai pawlte nen thawk hovin, thutkhawm vawi engemawzat kovin, kan mite himna turin fimkhur taka hmalak a ni a, hlawhtlinna kan hmu ta mek hi sorkar chauh nilovin, Mizo mipui zawng zawng tanrualna rah a ni a, a lawmawm hle a ni. Pathianin a hun takah kohhrante a hmang a, MKHC hmalaknaa tawngtai rualna neih anih hnuah boruak sosang zual pawh a tlahniam ta duai duai rih a. Kan mite hruaichhuak tur leh an himna tura sorkar ruahmanna te kha hlawhchham thei a ni a. Hlawhtlinna lawmawm tak kan hmu ta zel hi kan hruaitute vang nilovin, Pathianin Zofate tawngtaina a chhanna a ni tih a chiang hle, a ti.

MNF adviser chuan, MNF hi Zofate rorelna pakhat hnuaia kan awm theih hun thlirtu kan nih avangin, kan luah chin ramte kan humhim zel a pawimawh a. Ram neia min siamtu kan Pathian hnenah lawmthu kan sawi fo tur a ni. MLA term khat pawh a liam hmaa, MNF sorkar in harsatna kan tawh zozai hi tunhmaa la thleng ngailo, tunhnu zelah pawh a thlen leh rinawmlo khawpa nasa a ni a. Kechheh sual zeuha hnam pum tawrhna thleng thei a ni a. Chuvangin, sorkarin fimkhur takin hma a la a, duhthusam ang diak diaka hmalak theihloh tamtak a awm. Theihtawp a chhuah mek a, a chhuah zel dawn a ni.

Hetiang dinhmun harsaa kan ram, kan hnam leh kan sakhaw himna tura mawhphurhna la tur hian hruaitu huaisen leh dinna thlakkual zung zung mi nilo. Mi nghet leh a tul huna luhlul tlat ngam ramin a mamawh a. Chutiang tura, Pathianin hun harsa leh buaina tamtak hmachhawn tura MNF min dah tlat mai hi, kan hnam tana kan mawhphurhna sanbik zia hi party mipuiten kan hriatnawn fo a tul a. Kan hotuten thuthlukna diktak an siam zel theihnan i tawngtai pui zel ang u, a ti bawk.

Mizo Hnamrun chhung inkhawm hi Pu C. Manliana, Gen. Secretary, MNF Gen. Hqrs chuan kaihruaiin, Pi J. Chhawnkimi, Chaplain, Ebenezer Hospital chuan hunserh a hmang a. Tunlai Manipur buaina avanga Zofate tawrhna chungchangah Pathian hnena tawngtai rualna hun hman a ni. Pu R. Lalhnuna PAC leh Pu RK Hminga, Secretary, MNF Gen. Hqrs te hnen atangin zin report leh party hmasawnna chungchang report ngaihthlak a ni bawk.

Sd/-

(PETER CHHANGTE)
Jt. Secretary
Media & Publicity Department
Mizo National Front
Memo No.MNF/Media/04/2023/690
Dt.8.05.2023