Mizo National Front
General Headquarters
Mizoram : Aizawl
Press Release
ZOFATE TAWRHNA LEH THIL TAWN HIAN MIZORAM MIPUI THINLUNG A TI NA -MNF
Mizo National Front (MNF) chuan tunhnaia Manipur-a innghirnghona thleng chu pawi a ti tak zet a. Kan unau Zofate mangang leh thlabar taka an awm bakah sawisak leh thah an ni hi hriatthiam har kan tiin, tunhnuah mahni mihringpui laka hleilenna hi thleng tawh lo se kan ti. Kan unau Zofate tawrhna leh thil tawn hian Mizoram mipuite thinlung a tina hle a, an tawrhna hi kan natpuiin kan tawrhpui tak zet a ni.
Tin, Sakhaw zalenna ram India-a cheng kan nih laia, hnam leh hnam inkara inhriatthiam lohna thleng avanga Christian Biak In tam tak tihchhiat a ni hi kan dem tak zet a. Sorkar laipuiin hma a lakna hi kan duhkhawp lova, India Democracy lungphum leh a mawina a vul zel theih nan tun aia dik leh tan zawk nei lova hma la turin Sorkar laipui hi kan phut tlat a ni.
Manipur buaina hi a rang thei ang bera chingfel a, harsatna tawk mipuite hnena chhawmdawlna him leh rintlak pe turin Manipur sorkar leh Sorkar laipui kan phut a. Tin, he buaina chhan chhui chhuak thuai tur leh nunna chante zangnadawmna pek bakah natna tuarte tuamhlawm turin kan phut a ni. An tihlawhtling thei lo a nih chuan President rule puang mai turin sorkar laipui hi kan ngiat a ni.
He thil thleng meka tuartute leh tuar theia awm mekte hi kan unaute vek an ni a. Hun kal tawh sawi lovin Zofate tanrual a hun tih i hre thar ang u. Hrui khat vuan zel tur leh Social media lamah pawh kan unaute tana hriat nuam leh tangkai zawnga thu leh hla nei zawk turin kan in ngen a ni.
Buaina thlen tirh atangin Chief Minister Pu Zoramthanga’n Manipur-a Mizoram mi leh sa hruaichhuak tur hian theihtawp chhuahin kawng hrang hrangin hma a la zel a. Chief Minister bakah Home Department, GAD Civil Aviation Wing, Mizorama tlawmngai pawl hrang hrangte, kohhran leh political party hrang hrangin kan unaute tan theihtawp an chhuah a. An sahimna zawnga Mizorama rawn tlanlut kan unaute pawh chhawmdawl hna theih anga rangin kalpui mek zel a ni a, kan unau raltlante chhawmdawlna hna lo thawktu zawng zawng te inpekna MNF chuan achhuang tak zet cheu a. Thuthang dikhlel thehdarh kawngah pawh fimkhur leh zual ila, Mipui pawhin kan ram hruaitute hmalakna ngaichang thiamin, thu lengvak satliah vanga chiai mai lovin kan unau harsatna tawk mek te tan tawngtai zel turin kan inngen a ni.
Sd/-
LALLIANZUALA FANAI
Joint Secretary
Media & Publicity Dept
Mizo National Front
Memo No.MNF/Media/04/2023/688
Dt.06.05.2023